ကမ္ဘာ့ အားအကောင်းဆုံး ဒုံးပျံကို Space X စမ်းသပ်အောင်မြင်

မေ ၁၁၊ ၂၀၁၇
M-Media

– အမေရိကန် အာကာသဆိုင်ရာ နည်းပညာကုမ္ပဏီတစ်ခုဖြစ်တဲ့ Space X ဟာ ကမ္ဘာ့ အားအကောင်းဆုံး ဒုံးပျံတစ်ခုရဲ့ အင်ဂျင်ပိုင်းဆိုင်ရာ စမ်းသပ်မှုကို အောင်မြင်စွာ လုပ်ဆောင်နိုင်ခဲ့ပြီး အင်္ဂါဂြိုဟ်ကို သွားရောက်နိုင်ဖို့အတွက် သူတို့ရဲ့ စီမံကိန်းမှာ ရှေ့တစ်လှမ်း တိုးလိုက်နိုင်တာလည်း ဖြစ်ပါတယ်။

Falcon Heavy လို့အမည်ပေးထားတဲ့ အဲဒီဒုံးပျံရဲ့ မြေပြင်မှပျံတက်အားဟာ ဘိုးအင်း ၇၄၇ လေယာဉ် ၁၈ စီးရဲ့ စွမ်းအင်နဲ့ ညီမျှပြီး ဒီနှစ်နွေရာသီနှောင်းပိုင်းမှာ လက်တွေ့ လွှတ်တင်စမ်းသပ်မှုကို ပြုလုပ်မှာ ဖြစ်ပါတယ်။

ဒီ ဒုံးပျံဟာ လက်ရှိ နိုင်ငံတကာ အာကာသစခန်းကို ပစ္စည်းတွေပို့ရာမှာ အသုံးပြုနေတဲ့ Falcon 9 ကို အကြီးအကျယ် အဆင့်မြှင့်တင်ထားတာဖြစ်ပြီး မြေပြင်က ထွက်ခွာအားကတော့ ပိုကောင်းလာကာ ကမ္ဘာပတ်လမ်းကြောင်းကို အလေးချိန် ပေါင် ၁ သိန်း ၄ သောင်း၊ အင်္ဂါဂြိုဟ်ကို ပေါင် ၃၇၀၀၀ သယ်ဆောင်နိုင်မှာဖြစ်ပါတယ်။

အင်္ဂါနေ့က Space X ဟာ တက္ကဆက်ပြည်နယ်က သူတို့ရဲ့ ကုမ္ပဏီဝင်းမှာ Falcon Heavy ဒုံးပျံရဲ့ အင်ဂျင်စမ်းသပ်မှု ဗီဒီယိုကို Twitter စာမျက်နှာမှာ လွှင့်တင်ခဲ့ပါတယ်။

ကုမ္ပဏီပိုင်ရှင် အေလွန် မက်စ်က ဒီ ဒုံးပျံကို ၂၀၁၃ ခုနှစ်မှာ ထုတ်ပြမယ်လို့ ပြောကြားထားပေမယ့် အခုမှ ထွက်ပေါ်လာတာပါ။

အခု ဒုံးပျံအသစ်နဲ့ ၂၀၁၇ ခုနှစ်မှာ လကမ္ဘာကို ခရီးသွား ၂ ဦး ပို့ဆောင်ပေးဖို့ Space X က စီစဉ်ထားပြီး၊ အင်္ဂါဂြိုဟ်ကို သွားရောက်နိုင်ရေး စီမံကိန်းအတွက် ကနဦးခြေလှမ်းလည်း ဖြစ်ပါတယ်။

Ref: RT