အလ်ရှာဘတ်အဖွဲ့ကို ချေမှုန်းနိုင်ရေး လက်နက်တင်ပို့ခွင့်ပြုရန် ဆိုမာလီယာ တောင်းဆို

မေ ၁၂၊ ၂၀၁၇
M-Media

– အလ်ရှာဘတ် အကြမ်းဖက်အဖွဲ့က ထိန်းချုပ်ထားသည့် ဒေသများကို ပြန်လည်ရရှိရန် မိမိတို့တပ်များက တိုက်ပွဲဝင်နေသည့် အချိန်တွင် နိုင်ငံတကာအသိုင်းအ၀ိုင်းက မိမိတို့အပေါ် လက်နက်တင်ပို့မှု ပိတ်ဆို့ထားခြင်းအား ပယ်ဖျက်ပေးရန်အတွက် ဆိုမာလီ သမ္မတ မိုဟာမက် အဘ်ဒူလာဟီ မိုဟာမက်က တောင်းဆိုလိုက်သည်။

ကြာသာပတေးနေ့က လန်ဒန်မြို့တွင် ကျင်းပပြုလုပ်ခဲ့ပြီး ကမ္ဘာ့ခေါင်းဆောင်များ တက်ရောက်ခဲ့သည့် ဆိုမာလီညီလာခံတွင် အဘ်ဒူလာဟီက ထိုကဲ့သို့ ပြောကြားခဲ့ခြင်းဖြစ်ပြီး အလ် ကိုင်းဒါးနှင့် ဆက်နွယ်နေသည့် အဆိုပါ အဖွဲ့ကို နှစ်အနည်းငယ်အတွင်း ချေမှုန်းနိုင်မည်ဖြစ်သော်လည်း မိမိတို့ တပ်ဖွဲ့ဝင်များ အနေဖြင့် ပိုမိုကောင်းမွန်သည့်လက်နက် လိုအပ်သည်ဟု ဆိုသည်။

“ကျွန်တော်တို့ လုံခြုံရေးတပ်ဖွဲ့တွေနဲ့ အကြမ်းဖက် အုပ်စုတွေဟာ AK47 လို အပေါ့စား လက်နက်တွေကို နှစ်ဖက်စလုံး အသုံးပြုပြီး တော်တော်ကြာကြာ တိုက်ခိုက်နေရပါတယ်။ ဆိုမာလီယာအပေါ် အချိန်အတော်ကြာ ရှိနေတဲ့ လက်နက်တင်ပို့မှု ပိတ်ပင်တာဟာ လက်နက်ကြီးတွေကို ရရှိဖို့ ကျွန်တော်တို့ရဲ့
ကြိုးပမ်းမှုကို အလွန်အမင်း ကန့်သတ်သလို ဖြစ်နေပါတယ်” ဟု ဆိုမာလီသမ္မတက ပြောကြားခဲ့သည်။

ကုလ လုံခြုံရေးကောင်စီမှာ ဆိုမာလီယာကို ၁၉၉၂ ခုနှစ်ကတည်း လက်နက်တင်ပို့မှု ပိတ်ပင်ထားခဲ့ပြီး ကမ္ဘာအပေါ်တွင် သက်တမ်းအရှည်ဆုံး လက်နက်တင်ပို့မှု ပိတ်ပင်ခြင်းဖြစ်သည်။ သို့သော်လည်း ၂၀၁၃ ခုနှစ်တွင် အပေါ့စား လက်နက်များကို တင်ပို့ခွင့်ပြုခဲ့သော်လည်း ပိတ်ပင်ထားမှုကို ပယ်ဖျက်ခြင်းမရှိသေးပေ။

Ref: Aljazeera