ပါလက်စတိုင်းပြဿနာ ဖြေရှင်းရေး ဂျော်ဒန်နှင့် အီဂျစ်က ယခင်ရပ်တည်ချက်အတိုင်းသာ ဆက်ရှိမည်

မေ ၁၅၊ ၂၀၁၇
M-Media

– ပါလက်စတိုင်း-အစ္စရေး ပြဿနာတွင် နှစ်နိုင်ငံတည်ရှိရေးသည်သာ တစ်ခုတည်းသောအဖြေ ဖြစ်သည်ဆိုသည့် သဘောထားကို ဂျော်ဒန်၊ ပါလက်စတိုင်းနှင့် အီဂျစ်တို့က ထပ်မံ ထုတ်ဖော် ပြောကြားလိုက်ပြီး ထိုရည်မှန်းချက် အောင်မြင်ရေး အမေရိကန်အစိုးရနှင့် ပူးပေါင်းဆောင်ရွက်ရန် စိတ်ဆန္ဒရှိသည်ဟုလည်း ဆိုသည်။

ဂျော်ဒန်နိုင်ငံခြားရေးဝန်ကြီး အေမန် ဆာဖာဒီက အီဂျစ်နိုင်ငံခြားရေးဝန်ကြီး ဆာမဟ် ရှူကရီ၊ ပါလက်စတိုင်း လွတ်မြောက်ရေးအဖွဲ့၏ အမှုဆောင်ကော်မတီမှ အတွင်းရေးမှူးနှင့် ညှိနှိုင်းဆွေးနွေးမှုအဖွဲ့ခေါင်းဆောင် ဆအစ်ဘ် အီရီကတ်တို့နှင့် ယမန်နေ့က ဂျော်ဒန်မြို့တော် အမ်နန်၌ တွေ့ဆုံစဉ် ထိုကဲ့သို့ ပြောကြားခဲ့ခြင်းဖြစ်သည်။

၎င်းတို့ ၃ ဦးမှာ ငြိမ်းချမ်းရေးလုပ်ငန်းစဉ်နှင့် ပတ်သက်၍ ရှေ့ဆက် ခြေလှမ်းများလှမ်းရန် ဆွေးနွေးခဲ့ကြသည်။

ဆွေးနွေးပွဲအပြီး ပူးတွဲထုတ်ပြန်သော ကြေငြာချက်တွင် ဂျော်ဒန် နိုင်ငံခြားရေးဝန်ကြီးက ငြိမ်ချမ်းရေးကို မဟာဗျူဟာမြောက် ရွေးချယ်မှုတစ်ခုအဖြစ် ၃ နိုင်ငံစလုံးက သဘောထားပြီး၊ မကြာသေးမီက ဂျော်ဒန်နိုင်ငံတွင် ကျင်းပခဲ့သည့် ၂၈ ကြိမ်မြောက် အာရပ် ထိပ်သီးအစည်းဝေးတွင် ‘အာရပ်ငြိမ်းချမ်းရေး အစီအစဉ်’ကို အာရပ်နိုင်ငံများအားလုံးက ပြန်လည်အတည်ပြု လက်ခံခဲ့သည်ဟု ပြောကြားခဲ့သည်။

အမေရိကန်သမ္မတ ဒေါ်နယ်ထရမ့်မှာ အမေရိကန်က အချိန်ကာလအတော်ကြာ ရပ်တည်ခဲ့သည့် နှစ်နိုင်ငံ ငြိမ်းချမ်းစွာ အတူယှဉ်တွဲတည်ရှိရေးအဖြေမှ လမ်းကြောင်းပြောင်းရန် ပြောကြားမှုများ ရှိလာခဲ့ပြီး၊ အမေရိကန်သံရုံးကိုလည်း နိုင်ငံတကာအသိုင်းအ၀ိုင်းက အနာဂတ် ပါလက်စတိုင်းနိုင်ငံ၏ မြို့တော်အဖြစ် သတ်မှတ်ထားသည့် အရှေ့ဂျေရုစလင်သို့ ပြောင်းရွှေ့ရန် ဆောင်ရွက်လာခဲ့သောကြောင့် ပါလက်စတိုင်း ပြဿနာအတွက် စိုးရိမ်မှုများ မြင့်တက်လာခဲ့သည်။

Ref: Alarabiya