အိန္ဒိယတွင် အမျိုးသမီးတစ်ဦး အုပ်စုဖွဲ့ အဓမ္မပြုကျင့် အသတ်ခံရ

မေ ၁၅၊ ၂၀၁၇
M-Media

– အိန္ဒိယနိုင်ငံမြောက်ပိုင်း ဟာရ်ယာနာပြည်နယ်တွင် အမျိုးသမီးတစ်ဦးမှာ အုပ်စုဖွဲ့ အဓမ္မပြုကျင့်ခြင်း ခံခဲ့ရပြီး ရက်ရက်စက်စက် အသတ်ခံခဲ့ရသည်ဟု ရဲတပ်ဖွဲ့က ပြောကြားလိုက်သည်။

ဆိုနီပတ်မြို့တွင် ဖြစ်ပွားခဲ့ခြင်းဖြစ်ပြီး အသက် ၂၃ နှစ်အရွယ် အမျိုးသမီးကို ၎င်းနှင့်သိသူ တစ်ဦးအပါအ၀င် အမျိုးသားအုပ်စုတစ်ခု၏ အနီးအနားရှိ ရိုဟ်တက်မြို့သို့ ခေါ်ဆောင်သွားကာ အဓမ္မပြုကျင့်ခဲ့ခြင်းဖြစ်သည်ဟု ရဲတပ်ဖွဲ့ တာဝန်ရှိသူ အက်ရှက်ဝင် ရှန်ဗီက ဆိုသည်။

ထိုအမျိုးသမီးက အာဏာပိုင်များအား သွားရောက်တိုင်ကြားမည်ဟု ပြောသည့်အခါတွင် အဓမ္မကျင့်သူများက ခေါင်းကို အုတ်ခဲဖြင့်ထု၍ သတ်ဖြတ်ခဲ့သည်။

ရှန်ဗီကမူ လက်ရှိတွင် လူ ၂ ဦးကို ဖမ်းဆီးထားပြီး အခြား ၆ ဦးကိုလည်း စုံစမ်းစစ်ဆေးမှုများ ပြုလုပ်နေသည်ဟု ဆိုသည်။

အဓမ္မပြုကျင့်ခံရသူ အမျိုးသမီးမှာ မေလ ၉ ရက်နေ့က ပျောက်ဆုံးသွားခြင်းဖြစ်ပြီး ၂ ရက်အကြာတွင် ပုပ်ပွပြီး အပိုင်းပိုင်းဖြစ်နေသော သူမ၏ အလောင်းကို ရိုဟ်တက်မြို့တွင် တွေ့ရှိခဲ့ရသည်။ သူမ၏ ခန္ဓာကိုယ်ကို အပိုင်းပိုင်းဖြတ်တောက်ခြင်းမှာ အလောင်းကို မမှတ်မိစေရန်ဖြစ်သည်ဟု အလောင်းအား ခွဲစိတ်စစ်ဆေးမှုမှတ်တမ်းကို ကိုးကား၍ ဒေသတွင်းမီဒီယာတစ်ခုက ဖော်ပြခဲ့သည်။

သေဆုံးသူအမျိုးသမီး၏ မိခင်မှာ အမျိုးသားတစ်ဦးက သမီးဖြစ်သူအား လက်ထပ်ရန် အတင်းအကျပ်ပြုသည့်ကိစ္စနှင့်ပတ်သက်၍ ရဲတပ်ဖွဲ့ကို ယခင်က တိုင်ကြားဖူးသည်။

အိန္ဒိယတွင် အမျိုးသမီးများအပေါ် လိင်ပိုင်းဆိုင်ရာ စော်ကားမှုများမှာ အဖြစ်များပြီး ရဲတပ်ဖွဲ့၏ ကိုင်တွယ်မှု ညံ့ဖျင်းခြင်းကြောင့် ကျူးလွန်သူများမှာ လွတ်မြောက်သွားခြင်း၊ ထိုက်သင့်သည့် ပြစ်ဒဏ်ကို မခံစားရခြင်းတို့ ရှိသည်ဟု တက်ကြွလှုပ်ရှားသူများက ဝေဖန်ပြောကြားထားသည်။

Ref: Aljazeera