၂ နှစ်အတွင်း တရုတ်က ကန်ထောက်လှမ်းရေးသတင်းပေး ၂၀ ကို ဖြိုခွင်း

မေ ၂၁၊ ၂၀၁၇
M-Media

– တရုတ်နိုင်ငံမှာ ပြီးခဲ့သည့် ၂ နှစ်တာကာလအတွင်း အမေရိကန်ထောက်လှမ်းရေး CIA သတင်းပေး ၁၈ ဦးမှ ၂၀ အကြားကို သတ်ဖြတ်ခြင်း၊ ထောင်သွင်းအကျဉ်းချခြင်းတို့ ပြုလုပ်ခဲ့သည်ဟု အမေရိကန် အာဏာပိုင်များ၏ ပြောကြားမှုကို New York Times က ယမန်နေ့တွင် ဖော်ပြခဲ့သည်။

ထိုဆောင်ရွက်ချက်က တရုတ်နိုင်ငံအတွင်းရှိ အမေရိကန်၏ သူလျှိုကွန်ယက်ကို အသက်မဲ့စေပြီး စီအိုင်အေ၏ စစ်ဆင်ရေးများ ပြိုကွဲသွားစေသည်ဟုလည်း ဆိုသည်။

ထိုကိစ္စနှင့်ပတ်သက်၍ CIA နှင့် FBI တို့က ကုဒ်နာမည် Honey Badger ဖြင့် ဗာဂျီးနီးယားပြည်နယ်တွင် အခြေစိုက်ကာ စုံစမ်းစစ်ဆေးခဲ့ခြင်းဖြစ်သည်။

တရုတ်က အမေရိကန် ထောက်လှမ်းရေးကွန်ယက်ကို ထိုကဲ့သို့ ဖျက်ဆီးနိုင်မှုမှာ စီအိုင်အေ၏ ဆက်သွယ်ရေးစနစ်ကို ဟက်နိုင်ခြင်း သို့မဟုတ် သူလျှိုတစ်ဦးက သတင်းပေးခြင်းတို့ကြောင့် ဖြစ်နိုင်သည်ဟု ဆိုသည်။

FBI လုပ်သားတစ်ဦးမှာ ငွေကြေးရရှိရန်အတွက် အရေးပါသည့် နည်းပညာ အချက်အလက်များကို တရုတ်အား ပေးခဲ့သည်ဟု ၀န်ခံခဲ့ပြီး ပြီးခဲ့သည့်နှစ်တွင် တရားစွဲဆိုခံခဲ့ရသည်။

မကြာသေးမီက တရုတ်သမ္မတ ရှီကျင့်ဖျင် အမေရိကန်သို့ လာရောက်သည့်အချိန်တွင် သမ္မတ ဒေါ်နယ်ထရမ့်က တရုတ်နှင့် အလွန့်အလွန်ကြီးကျယ်သော ဆက်ဆံရေးတစ်ခု၏ အစဖြစ်သည်ဟု ပြောကြားခဲ့သည်။

Ref: Press TV