အဟာရချို့တဲ့မှုကြောင့် မြန်မာကလေးငယ်များ နေ့စဉ်သေဆုံးနေဟု ကုလ ထုတ်ပြန်

မေ ၂၆၊ ၂၀၁၇
M-Media

ကချင်ပြည်နယ်မှ သမီးငယ်တစ်ဦး၏ ပုံရိပ်

– မြန်မာနိုင်ငံတွင် အဟာရချို့တဲ့မှုကြောင့် နေ့စဉ် အသက် ၅ နှစ်အောက်ကလေးငယ် ၁၅၀ ခန့် သေဆုံးနပြီး၊ ကလေးငယ်များ၏ ၃၀ ရာခိုင်နှုန်းမှာ အလယ်အလတ် အဟာရချို့တဲ့မှု၊ ဆိုးရွားသည့် အဟာရ ချို့တဲ့မှုများကို ခံစားနေရသည်ဟု ယူနီဆက်ဖ်မှ မကြာသေးမီက ထုတ်ပြန်သော အစီရင်ခံစာတွင် ဖော်ပြထားသည်။

၂၀၁၀ ခုနှစ်မှစ၍ မြန်မာနိုင်ငံမှာ ပြုပြင်ပြောင်းလဲမှုများ ပြုလုပ်ခဲ့သော်လည်း စစ်ပွဲများ၊ ဆင်းရဲမွဲတေမှု၊ ဖွံ့ဖြိုးမှု နိမ့်ကျခြင်းတို့ကြောင့် ဝေးလံခေါင်ဖျား ဒေသများမှ ကလေးငယ်များမှာ ထိုအကျိုးဆက်ကို ခံစားရခြင်းမရှိဟုလည်း ယူနီဆက်ဖ်က ဆိုသည်။

“ကလေးငယ် ၂.၂ သန်းလောက်အတွက် ငြိမ်းချမ်းရေးကတိက၀တ်ကို မဖြည့်ဆည်းပေးနိုင်သေးသလို၊ ပိုကောင်းတဲ့အနာဂတ်ရဖို့ သူတို့ရဲ့ မျှော်လင့်ချက်ကလည်း ဆင်းရဲမွဲတေမှု၊ အခွင့်အလမ်းနည်းပါးမှု၊ အကြမ်းဖက်ခံရမယ်ဆိုတဲ့ ကြောက်ရွံ့မှု အမြဲတမ်းရှိနေမှုကြောင့် အဟန့်အတား ဖြစ်နေပါတယ်” ဟု အစီရင်ခံစာတွင်
ဖော်ပြထားသည်။

၂၀၁၅ ခုနှစ်က တိုင်းရင်းသားလက်နက်ကိုင်များနှင့် ချုပ်ဆိုခဲ့သည့် အပစ်ရပ်ရေးစာချုပ်၊ ၂၀၁၆ ခုနှစ်တွင် ဒေါ်အောင်ဆန်းစုကြည်ဦးဆောင်သည့် အစိုးရတက်လာမှုတို့ကြောင့် အကောင်းမြင်မှုမှာလည်း စီးပွားရေး ပြုပြင်ပြောင်းလဲမှု မျှော်မှန်းထားသည်ထက် ပို၍ နှေးကွေးနေသောကြောင့် မှေးမှိန်သွားသည်ဟု ယူနီဆက်ဖ်က ဆိုသည်။

သို့သော်လည်း ကာကွယ်ဆေးထိုးရေး အစီအစဉ်နှင့် ပညာရေးအတွက် အစိုးရက ဘက်ဂျက်တိုးပေးခြင်း၊ ကလေးငယ်များကို ကာကွယ်ပေးမည့် ဥပဒေမူကြမ်းရေးဆွဲခြင်းတို့မှာ ကလေးငယ်များ၏ အခွင့်အရေးကို ခိုင်မာအောင် ဆောင်ရွက်လိုသည့် သဘောထားဖြစ်သည်ကို တွေ့ရကြောင်း ချီးကျူးခဲ့သည်။

Ref: smh