မြောက်ကိုရီးယား၏ ရန်စမှုကို သည်းခံတော့မည်မဟုတ်ဟု ဂျပန်ပြော

မေ ၂၉၊ ၂၀၁၇
M-Media

– ယနေ့မနက်ပိုင်းတွင် မြောက်ကိုရီးယားက ဂျပန်ပင်လယ်ပြင်ထဲသို့ ဒုံးကျည်စမ်းသပ်မှု ပြုလုပ်ခဲ့ပြီးနောက် မိမိတို့အနေဖြင့် မြောက်ကိုရီးယား၏ လုပ်ရပ်များကို ထိထိရောက်ရောက် တုန့်ပြန်ရန်အတွက် အမေရိကန်နှင့် ဆက်သွယ်ဆောင်ရွက်သွားမည်ဟု ဂျပန်ဝန်ကြီးချုပ် ရှင်ဇိုအာဘေးက ပြောကြားလိုက်သည်။

မြောက်ကိုရီးယားမှာ စကဒ်ဒုံးကျည်ကို စမ်းသပ်ပစ်လွှတ်ခဲ့ခြင်းဖြစ်ပြီး သီတင်းပတ်များအတွင်း ၃ ကြိမ်မြောက် ဒုံးကျည်စမ်းသပ်ခြင်းဖြစ်ကာ၊ ယခုနှစ်အတွင်း ၁၂ ကြိမ်မြောက်လည်း ဖြစ်သည်။

“နိုင်ငံတကာအသိုင်းအ၀ိုင်းက အကြိမ်ကြိမ်သတိပေးမှုကို လစ်လျူရှုပြီး မြောက်ကိုရီးယားက ဆက်လက်ရန်စနေတာကို ကျွန်တော်တို့ သည်းခံတော့မှာ မဟုတ်ပါဘူး။ G7 ထိပ်သီးအစည်းအဝေးမှာ သဘောတူ ညီထားတဲ့အတိုင်း မြောက်ကိုရီးယားနဲ့ ပြဿနာဟာ နိုင်ငံတကာအသိုင်းအ၀ိုင်းရဲ့ ထိပ်တန်းဦးစားပေးဖြစ်ပါတယ်။ မြောက်ကိုရီးယားကို တားဆီးဖို့အတွက် အမေရိကန်နဲ့အတူ ကျွန်တော်တို့ ထိထိရောက်ရောက် တုန့်ပြန်မှု ပြုလုပ်သွားမှာပါ” ဟု အာဘေးက မြောက်ကိုရီးယား၏ ဒုံးကျည်စမ်းသပ်မှုအပြီး သိပ်မကြာခင်မှာပင် သတင်းထောက်များအား ပြောကြားခဲ့သည်။

မြောက်ကိုရီးယားမှာ ပြီးခဲ့သည့် ၃ ပတ်အတွင်း သီတင်းပတ်တိုင်းနီးပါးတွင် ဒုံးကျည်စမ်းသပ်မှုများ ပြုလုပ်ခဲ့ပြီး ယနေ့မနက်က ပြုလုပ်ခဲ့သည့် တာတိုပစ် စကဒ်ဒုံးကျည်မှာ ကီလိုမီတာ ၄၅၀ ခန့် ပျံသန်းသွားပြီးနောက် ကိုရီးယားနှင့် ဂျပန်အကြား ဂျပန်ပင်လယ်ပြင်တွင် ကျရောက်ခဲ့သည်ဟု အမေရိကန် ပစိဖိတ်စစ်ဌာနချုပ်က
ပြောကြားခဲ့သည်။

အဆိုပါ ဒုံးကျည်မှာ ယခုနှစ်အတွင်း ပစ်လွှတ်ခဲ့ပြီး ဂျပန်နိုင်ငံအနီးသို့ ကျရောက်ခဲ့သည့် ဒုတိယမြောက် ဒုံးကျည်ဖြစ်သည်။

Ref: Aljazeera