အလ္လာဟ်အရှင်မြတ်ကို ချစ်ခြင်းမေတ္တာဖြင့် ယုံကြည်ကိုးကွယ်ပါ (အကြမ်းဖက်တိုက်ဖျက်ရေး ပညာပေး ဗီဒီယို)

မေ ၃၁၊ ၂၀၁၇
M-Media

– “အလ္လာဟ်အရှင်မြတ်ကို ချစ်ခြင်းမေတ္တာဖြင့် ယုံကြည်ကိုးကွယ်ပါ။ အကြမ်းဖက်မှုနဲ့ မကိုးကွယ်ပါနဲ့” (Worship your God with love, not terror) ဆိုတဲ့ အကြမ်းဖက်တိုက်ဖျက်ရေး ပညာပေး ဗီဒီယိုအတိုလေးတစ်ခုဟာ လက်ရှိ အရှေ့အလယ်ပိုင်းမှာ ရေပန်းစားနေပါတယ်။

ကူဝိတ်ဆက်သွယ်ရေးကုမ္ပဏီ Zain က ရမ်ဇာန်ဥပုသ်လ အထိမ်းအမှတ်အဖြစ် ဒီ ဂီတဗီဒီယိုလေးကို ထုတ်ပြန်လိုက်တာဖြစ်ပြီး၊ အကြမ်းဖက်သမားတွေက ဘာသာတရားကို အလွဲသုံးစား လုပ်နေတယ်ဆိုတာ ပြည်သူတွေသိဖို့၊ အကြမ်းဖက်မှုတွေကို တိုက်ဖျက်ဖို့ ရည်ရွယ်တဲ့ စာသားတွေကို ထည့်သွင်းထားပါတယ်။

ဒီဗီဒီယိုထဲမှာ ကူဝိတ်နိုင်ငံအတွင်း ဖြစ်ပွားခဲ့တဲ့ အကြမ်းဖက်တိုက်ခိုက်မှုတွေကနေ လွတ်မြောက်လာသူတွေလည်း ပါဝင်သရုပ်ဆောင်ထားပါတယ်။

ထုတ်လုပ်တဲ့ ရည်ရွယ်ချက်၊ ပါဝင်တဲ့စာသားတွေက ကောင်းမွန်တဲ့အတွက် M-Media ပရိတ်သတ်တွေ ကြည့်ရှုခံစားနိုင်ဖို့ စာတမ်းထိုးကာ ပြန်လည်ဖော်ပြလိုက်ပါတယ်။