ဗြိတိန်တော်ဝင်မင်းသားဟယ်ရီ စင်ကာပူမွတ်စလင်များနှင့် စုပေါင်း ၀ါဖြေ

ဇွန် ၄၊ ၂၀၁၇
M-Media

စင်ကာပူ မွတ်စလင်များနှင့် စုပေါင်းဝါဖြေနေသည့် မင်းသားဟယ်ရီ

– ဗြိတိန်တော်ဝင်မင်းသား ဟယ်ရီဟာ အလည်အပတ်ခရီးစဉ်အဖြစ် ဒီနေ့မှာ စင်ကာပူနိုင်ငံကို ရောက်ရှိလာခဲ့ပြီး မလေးလူမျိုး အစ္စလာမ်ဘာသာဝင်တွေရဲ့ စုပေါင်း အစ်ဖ်သာရ် ၀ါဖြေပွဲမှာ ပါဝင်ခဲ့ပါတယ်။

စင်ကာပူ မွတ်စလင်အဖွဲ့အစည်းတစ်ခုဖြစ်တဲ့ Jamiyah Singapore ရဲ့ Guillemard Crescent ရပ်ကွက်က ရုံးချုပ်ကို လာရောက်ခဲ့တာဖြစ်ပြီး မလေးလူမျိုးတွေရဲ့ ရိုးရာ အတီးအမှုတ်တွေနဲ့ ကြိုဆိုခဲ့ပါတယ်။

မင်းသားကို စင်ကာပူက ဆီလတ်ကိုယ်ခံပညာ ကမ္ဘာ့ချန်ပီယံဟောင်း ရှိခ် အလူဒင် ယာကွဘ်က ဦးဆောင်ကာ ခေါ်ဆောင်လာတာဖြစ်ပြီး ကြိုဆိုမှုမှာ ဆီလတ်ကိုယ်ခံပညာနဲ့ အလှပြကစားမှုလည်း ပါဝင်ခဲ့ပါတယ်။

နေ၀င်သွားချိန်မှာတော့ မင်းသားဟာ မွတ်စလင်လူငယ် ၈၀ နဲ့ အစ်ဖ်သာရ် ၀ါဖြေပွဲမှာ ပါဝင်စားသောက်ခဲ့ပါတယ်။

နောက်ပိုင်းမှာ မွတ်စလင်ငယ်တွေနဲ့ တစ်ဝိုင်းချင်း သွားရောက်တွေ့ဆုံကာ ရမ်ဇာန်ဥပုသ်လနဲ့ပတ်သက်လို့ စကားစမြည် ပြောဆိုခဲ့ပါတယ်။

“ရမ်ဇာန်ဥပုသ်လဟာ ကိုယ့်ကိုယ်ကို ပြန်လည်ဆန်းစစ်ရတဲ့လပါ။ မိသားစုတွေ၊ မိတ်ဆွေတွေကို အချိန်ပေးတာမျိုး၊ ကိုယ့်ထက်နိမ့်ပါးသူတွေကို ကူညီထောက်ပံ့တာမျိုးလည်း လုပ်ရပါတယ်။ အစ်ဖ်သာရ်ဝါဖြေပွဲမှာ မင်းသားဟယ်ရီ ပါဝင်လာတဲ့အတွက်၊ Jamiyah Singapore အဖွဲ့က အစိတ်အပိုင်းတွေဖြစ်တဲ့ လူငယ်တွေနဲ့
တွေ့ဆုံတဲ့အတွက် ကျွန်တော်တို့ ဂုဏ်ယူပါတယ်” လို့ Jamiyah Singapore ဥက္ကဌ ဒေါက်တာ မိုဟာမက် ဟက်စ်ဘီ အဘူ ဘာကာရ်က ပြောကြားခဲ့ပါတယ်။

ဒီနေ့မနက်ပိုင်းကလည်း မင်းသား Action for AIDS အခမ်းအနားကို သွားရောက်ခဲ့ပြီး စင်ကာပူနိုင်ငံက အိခ်ျအိုင်ဗီ၊ အေအိုင်ဒီအက်စ်ပြဿနာအကြောင်းကို လေ့လာခဲ့ပါတယ်။

Ref: CNA