ကာတာနိုင်ငံသားများအား အလ်-ဟရမ် ၀တ်ကျောင်းတော်သို့ ဆော်ဒီက ၀င်ရောက်ခွင့်မပြုဟု သတင်းထွက်လာ

ဇွန် ၁၁၊ ၂၀၁၇
M-Media

– ဆော်ဒီသို့ ဘာသာရေးခရီးစဉ်အဖြစ် ရောက်ရှိနေသည့် ကာတာနိုင်ငံသားများအား မက္ကာမြို့ရှိ ကအ်ဗာဝတ်ကျောင်းတော်ရှိရာ အလ်-ဟရမ် ဗလီဝတ်ကျောင်းတော်သို့ ဆော်ဒီအာဏာပိုင်များက ၀င်ရောက်ခွင့်မပေးဟု ဒိုဟာ အခြေစိုက် Al Sharq သတင်းစာက ယမန်နေ့တွင် ဖော်ပြခဲ့သည်။

မက္ကာသို့ရောက်ရှိနေသည့် ကာတာနိုင်ငံသားများက ၎င်းတို့မှာ ထိုကဲ့သို့ တားမြစ်ပိတ်ပင်ခံရကြောင်း ကာတာအမျိုးသားလူ့အခွင့်အရေးကော်မရှင်(NHRC) သို့ တိုင်ကြားခဲ့ခြင်းဖြစ်သည်။

NHRC အကြီးအကဲ အလီ ဘင် ဆာမင်ခ် အလ်-မာရီက ထိုလုပ်ရပ်မှာ လူ့အခွင့်အရေး ကြေငြာစာတမ်းတွင် အာမခံပေးထားသေ ဘာသာရေးလွတ်လပ်ခွင့်ကို ရှက်ဖွယ် ချိုးဖောက်ခြင်းဖြစ်သည်ဟု တုန့်ပြန်ခဲ့ကြောင်း သတင်းစာက ဆိုသည်။ ထို့ပြင် ကော်မရှင်ကလည်း ထိုလုပ်ရပ်ကို ရှုတ်ချခဲ့သည်။

ဆော်ဒီမှာ ပုံမှန်အားဖြင့် အလ်-ဟရမ် ဗလီဝတ်ကျောင်းတော်သို့ ၀င်ရောက်သူများအား လူမျိုး၊ ဂိုးဏ်ဂနကို ကြည့်၍ မေးမြန်းခြင်း၊ ၀င်ရောက်ခွင့် ပိတ်ပင်ခြင်းတို့ မရှိဘဲ ယခုလုပ်ရပ်မှာ ကာတာနှင့် ပင်လယ်ကွေ့နိုင်ငံများအကြား တင်းမာမှုများ ပိုမိုမြင့်တက်လာမှုကို ပြသနေသည်။

ဆော်ဒီဦးဆောင်သည့် နိုင်ငံ ၈ နိုင်ငံမှာ ပြီးခဲ့သည့် သီတင်းပတ်က ကာတာနှင့် သံအဆက်အသွယ်၊ ကုန်သွယ်မှု၊ ခရီးသွားလာမှု အားလုံးကို ဖြတ်တောက်ခဲ့ကာ ကာတာနိုင်ငံမှာ အကြမ်းဖက်အဖွဲ့များကို ထောက်ပံ့နေသည်ဟု စွပ်စွဲခဲ့သည်။

Ref: Aljazeera