အမေရိကန်တွင် လူမည်းလူငယ်ကိုရိုက်နှက်သည့် ရဲတစ်ဦး တရားစွဲခံရ

ဇွန် ၁၃၊ ၂၀၁၇
M-Media

– ဆယ်ကျော်သက် လူမည်းတစ်ဦးကို ရိုက်နှက်ခဲ့သည့် အမေရိကန်ပြည်ထောင်စု နယူးဂျာဆီပြည်နယ်မှ ရဲတပ်ဖွဲ့ဝင်တစ်ဦးကို ပြင်းပြင်းထန်ထန် နာကျင်စေမှုဖြင့် တရာစွဲဆိုထားသည်ဟု NBC သတင်းဌာနက ဖော်ပြခဲ့သည်။

ကာတီရတ်မြို့မှ အသက် ၃၁ နှစ်အရွယ် ရဲတပ်ဖွဲ့ဝင် ဂျိုးဆက်ပ် ရိုင်မန်ဆိုသူဖြစ်ပြီး အသက် ၁၆ နှစ်အရွယ် လူမည်းလူငယ်က ၎င်း၏ကားဖြင့် ဂျိုးဆက်ပ်၏ ရဲကားကို တိုက်ခဲ့ပြီးနောက် ရိုင်မန်မှာ ထိုလူငယ်ကို အကြိမ်များစွာ ထိုးကြိတ်ကန်ကျောက်ခဲ့သည်ဟု အစိုးရ ရှေ့နေများက ပြောကြားခဲ့သည်။

ဂျိုးဆက်ပ်မှာ ကာတီရတ်မြို့တော်ဝန် ဒန်နီယဲလ် ရိုင်မန်၏ ညီလည်းဖြစ်သည်။

ထိုသို့ ထိုးကြိတ်ခဲ့ပြီးနောက် လူမည်းလူငယ်ကို ဆေးရုံသို့ ခေါ်ဆောင်သွားခြင်း၊ လူနာတင်ယာဉ် ခေါ်ပေးခြင်းမရှိပေ။ အခင်းဖြစ်ပွားချိန်တွင် ဂျိုးဆက်ပ်၏ ခန္ဓာကိုယ်ပေါ်တွင် တပ်ဆင်ရသည့် ကင်မရာ မပါသော်လည်း ရဲပတ္တရောင်ကား၏ ဒက်ရ်ှဘုတ်ပေါ်မှ ကင်မရာက ထိုအဖြစ်အပျက်ကို မှတ်တမ်းတင်ထားနိုင်ခဲ့သည်။

ရဲတပ်ဖွဲ့ဝင် ဂျိုးဆက်ပ်မှာ ပြင်းပြင်းထန်ထန် နာကျင်စေမှု အပါအ၀င် စွဲချက်များစွာဖြင့် တရားစွဲဆိုခံထားရပြီး ရာထူးမှလည်း လစာမဲ့ အနားပေးခြင်း ခံထားရသည်။ ထိုအဖြစ်အပျက်ကို ရဲတပ်ဖွဲ့က စုံစမ်းစစ်ဆေးမှု ပြုလုပ်နေသည်။

အရိုက်ခံခဲ့ရသည့် လူမည်းလူငယ်၏ မိသားစုများက အဆိုပါ ရဲတပ်ဖွဲ့ဝင်ကို တရားဥပဒေကြောင်းအရ ရင်ဆိုင်ရန် စီစဉ်နေသည်။

Ref: Blackmatters US