Confederations Cup ပြိုင်ပွဲတွင် ရုရှားက ဆိုးသွမ်းပရိတ်သတ်များကို တင်းတင်းကျပ်ကျပ် ကိုင်တွယ်မည်

ဇွန် ၁၆၊ ၂၀၁၇
M-Media

– ယခုသီတင်းပတ်နှောင်းပိုင်းတွင် စိန့်ပီတာစဘတ်၌ ကျင်းပမည့် ကွန်ဖက်ဒရေးရှင်းဖလား ဘောလုံးပြိုင်ပွဲတွင် ဆိုးသွမ်းဘောလုံးပရိတ်သတ် ပြဿနာကို ကိုင်တွယ်ဖြေရှင်းသွားမည်ဟု ရုရှားက ပြောကြားလိုက်သည်။

ရုရှားပရိတ်သတ်များမှာ ပြိုင်ဘက် အသင်း ပရိတ်သတ်များ၊ ဘောလုံးသမားများကို အုပ်စုဖွဲ့တိုက်ခိုက်သည့် နာမည်ဆိုးဖြင့် ကျော်ကြားပြီး မနှစ်က ပြင်သစ်တွင် ကျင်းပခဲ့သည့် ယူရို ၂၀၁၆ တွင် အထင်ရှားဆုံး ဖြစ်ခဲ့သည်။

ထို့ကြောင့် ရုရှားက အိမ်ရှင်အဖြစ် လက်ခံကျင်းပမည့် ယခု ကွန်ဖက်ဒရေးရှင်းဖလားပြိုင်ပွဲတွင် ထိုကဲ့သို့သော အဖြစ်အပျက်မျိုး ထပ်မံဖြစ်ပွားမည်ကို စိုးရိမ်မှုများ ရှိနေသည်။ သို့သော်လည်း ရုရှားတာဝန်ရှိသူများက ထိန်းသိမ်းသွားမည်ဟု ဆိုသည်။

“ကျွန်တော်တို့ဟာ ပရိတ်သတ်တွေနဲ့ ပူးပေါင်းပြီး ဖြစ်နိုင်တဲ့ ခြိမ်းခြောက်မှုတွေကို ဆန်းစစ်နေပါတယ်” ဟု ပြည်ထဲရေးဝန်ကြီးဌာနမှ အကြီးတန်းတာဝန်ရှိသူတစ်ဦးက ယခု ကွန်ဖက်ဒရေးရှင်းဖလားနှင့် ၂၀၁၈ ကမ္ဘာ့ဖလားအတွက် လုံခြုံရေးဆိုင်ရာ သတင်းစာရှင်းလင်းပွဲတွင် ပြောကြားခဲ့သည်။

လက်ရှိတွင် ရုရှားပရိတ်သတ် ၉၁ ဦးကို ဘောလုံးပွဲများသို့ ၀င်ရောက်ကြည့်ရှုခွင့် ပိတ်ပင်ထားသည်ဟုလည်း ၎င်းက ထည့်သွင်းပြောဆိုခဲ့ပြီး ထိုအရေအတွက်မှာ ပြင်သစ်တွင် ဖြစ်ပွားခဲ့သည့်ကိစ္စ မတိုင်ခင်ထက် ၂ ဆ မြင့်တက်လာခြင်းဖြစ်သည်။

“လူမျိုးရေးခွဲခြားမှု၊ မီးကျည်လွှတ်မှုနဲ့ တိုက်ခိုက်မှုတွေအပါဝအင် ဆိုးဆိုးဝါးဝါး ကျူးလွန်ခဲ့ကြတဲ့ အဲဒီလူတွေဟာ ကျွန်တေ်ာတို့ရဲ့ ထိန်းချုပ်မှုအောက်မှာ ရှိနေပါတယ်”

ရုရှားမှာ ‘ပရိတ်သတ် ပတ်စပို့’ စနစ်ကိုလည်း ဆောင်ရွက်ရန် စီစဉ်ထားပြီး လက်မှတ်လာဝယ်သူတိုင်းမှာ ၎င်းတို့၏ ဓာတ်ပုံဖြင့် ကွင်းဝင်ခွင့်ပတ်စပို့ကို လျှောက်ထားရမည်ဖြစ်သည်။ နိုင်ငံခြား ပရိတ်သတ်များအတွက် ဗီဇာဖြင့် အစားထိုးပေးသည်။

Ref: BBC