လန်ဒန်မီးဘေးသင့်ပြည်သူများအတွက် ဗြိတိန်မွတ်စလင်များ အင်တိုက်အားတိုက် ကူညီ

ဇွန် ၁၇၊ ၂၀၁၇
M-Media

– ကြာသပတေးနေ့က လန်ဒန်မြို့အနောက်ပိုင်း ကန်ဆင်တန်ရပ်ကွက်က မိုးမျှော်တိုက်တစ်ခု မီးလောက်မှုအတွင်း မီးဘေးသင့် ပြည်သူတွေကို ထောက်ပံ့ကူညီပေးရေးမှာ ဒေသခံမွတ်စလင်တွေလည်း အင်တိုက်အားတိုက် ပါဝင်နေတယ်လို့ သိရပါတယ်။

Grenfell Tower လိုခေါ်တဲ့ အဲဒီအဆောက်အဦးမီးလောင်မှုအတွင်း အနည်းဆုံး လူ ၂၀ ကျော် သေဆုံးခဲ့ပြီး တော်တော်များများလည်း ဒဏ်ရာရရှိခဲ့ပါတယ်။ မီးဘေးသင့်သူတွေဟာ အဲဒီရပ်ကွက်အတွင်း ဘုရားကျောင်းနဲ့ တစ်ချို့နေရာတွေမှာ ခိုလှုံနေရပြီး ပြည်သူတွေကလည်း အစားအသောက်၊ အ၀တ်အထည်နဲ့ လိုအပ်တဲ့ အသုံးအဆောင်တွေကို အဆက်မပြတ် လာရောက် လှူဒါန်းနေကြပါတယ်။

ကန်ဆင်တန်မွတ်စလင်လူ့အဖွဲ့စည်းက ဒီမီးဘေးသင့် ပြည်သူတွေအတွက် အချိုရည်၊ ပါမုန့်တွေကို လာရောက် လှူဒါန်းကြသလို၊ အစားအသောက်တွေကို ချက်ပြုတ်ပြီး လာရောက် တည့်ခင်းကျွေးမွေးတာမျိုးတွေလည်း လုပ်ကြပါတယ်။

နောက်ပြီး မီးဘေးသင့်ပြည်သူတွေအတွက် ရန်ပုံငွေရှာဖွေရေး လှုပ်ရှားမှုတွေမှာလည်း မွတ်စလင်တွေ ပါဝင်ခဲ့ပြီး အခုအချိန်အထိ ကန်ဒေါ်လာ ၃ သန်းလောက် ရနေပါတယ်။

Islamic Relief ပရဟိတအဖွဲ့ခေါင်းဆောင် ဇီယာ ဆာလစ်က သူတို့အဖွဲ့ဟာ ကူညီရေးလုပ်ငန်းတွေကို နေ့ရောညပါ ဆောင်ရွက်နေတယ်လို့ The Indepedent သတင်းစာကို ပြောကြားခဲ့ပါတယ်။

“‘ကျွန်တော်တို့ တစ်ခုခု လုပ်ပေးပါရစေ’ လို့ ပြောကြတဲ့သူတွေ အများကြီးဗျ” လို့ ဆာလစ်က ဆိုပါတယ်။

လူတွေအိပ်မောကျနေချိန် သန်းခေါင်ယံလောက်မှာဖြစ်ပွားတဲ့ ဒီမီးလောင်မှုကို မနက် ဥပုသ်ထမင်းစားဖို့ ထကြတဲ့ မွတ်စလင်တွေက တွေ့သွားပြီး အချိန်မီသတိပေးကာ၊ ကယ်ဆယ်တာတွေလုပ်ပေးတာကြောင့် မီးလောင်တာဝါက လူတော်တော်များများ အသက်ဘေးကနေ လွတ်မြောက်သွားတာဖြစ်တယ်လို့ မျက်မြင်သက်သေတွေက ပြောကြားခဲ့ပါတယ်။

“လူတွေ လွတ်သွားအောင်လုပ်ပေးတဲ့နေရာမှာ မွတ်စလင်တွေက ကြီးမားတဲ့ အခန်းကဏ္ဍကနေ ပါဝင်ခဲ့ပါတယ်” လို့ ဒီတိုက်မှာ နေထိုင်သူတစ်ဦးက ပြောကြားခဲ့ပါတယ်။

Ref: Independent