အကြမ်းဖက်များ ကြီးစိုးနေသည့် မာရာဝီမြို့အား ၀ါကျွတ်အီးဒ်အမီ ပြန်သိမ်းရန် ဖိလစ်ပိုင် ထိုးစစ်ဆင်

ဇွန် ၂၀၊ ၂၀၁၇
M-Media

– ယခုတစ်ပတ်နှောင်းပိုင်းတွင် ကျရောက်မည့် အီးဒ်ပွဲတော်အမီ မာရာဝီမြို့အား အကြမ်းဖက်သမားများလက်မှ သိမ်းပိုက်ရန် ထိုးစစ်ဆင်နေသည်ဟု ဖိလစ်ပိုင်စစ်တပ်က ပြောကြားလိုက်သည်။

ယခုစစ်ဆင်ရေးကို လေတပ်နှင့် ကြည်းတပ်တို့မှ ပူးပေါင်းဆောင်ရွက်မည်ဖြစ်ပြီး မာရာဝီမြို့အနီးရှိ ကာဂါယန် ဒီအိုရိုမြို့တွင် ရဲတပ်ဖွဲ့နှင့် စစ်တပ်မှ အကြီးအကဲများမှာ ပြီးခဲ့သည့်ရက်ပိုင်းအတွင်း မဟာဗျူဟာများကို ဆွေးနွေးခဲ့သည်။

“ရမ်ဇာန်လကုန်ပိုင်းလောက်မှာ မာရာဝီမြို့ ရှင်းလင်းဖို့ ကျွန်တော်တို့ ရည်ရွယ်ထားပါတယ်။ တိုက်ပွဲရဲ့ ရှုပ်ထွေးမှုကို သိတဲ့အတွက်ကြောင့် နောက်ဆုံးရက်ကိုတော့ သတ်မှတ်မထားပါဘူး။ မာရာဝီမြို့ကို အမြန်ဆုံးလွတ်မြောက်ဖို့အတွက် အကောင်းဆုံး ဆောင်ရွက်သွားဖို့ ကျွန်တော်တို့ လုပ်နေပါတယ်” ဟု ဖိလစ်ပိုင်စစ်တပ်မှ ပြောရေးဆိုခွင့်ရှိသူ ဗိုလ်မှူးချုပ် ရက်စ်တီတူတို ပါဒီလာက ပြောကြားခဲ့သည်။

မာရာဝီမြို့တွင် IS သစ္စာခံ အကြမ်းဖက်အဖွဲ့နှင့် ဖိလစ်ပိုင်စစ်တပ်တို့ တိုက်ပွဲဖြစ်ပွားနေသည်မှာ သီတင်းပတ် ၅ ပတ်တာ ကြာမြင့်ခဲ့ပြီးဖြစ်ပြီး လူပေါင်း ၃၅၀ နီးပါး သေဆုံးခဲ့ကာ ဒေသခံပြည်သူများမှာလည်း အိုးအိမ်စွန့်ခွာ ထွက်ပြေးခဲ့ရသည်။

မွတ်စလင်တို့၏ ရမ်ဇာန်ဥပုသ်လအကုန်တွင် ကျရောက်မည့် အီဒွလ်ဖိသီရ် ၀ါကျွတ်အီးဒ်နောက်ပိုင်းတွင် သူပုန်အဖွဲ့သို့ စစ်ကူများ ရောက်လာနိုင်သည်ဆိုသည့် စိုးရိမ်မှုများလည်း ရှိနေသည်။

ပါဒီလာကမူ ရမ်ဇာန်ဥပုသ်လအပြီးနောက်ပိုင်း တိုက်ခိုက်မှုများ မြင့်တက်လာမှုမရှိစေရေး ဆောင်ရွက်ရန် စစ်တပ်က ရည်ရွယ်ထားသည်ဟုလည်း ထည့်သွင်းပြောကြားခဲ့သည်။

Ref: CNA