လန်ဒန်တွင် မွတ်စလင်များအား ကားဖြင့်ဝင်တိုက်သူကို ယူကေက အကြမ်းဖက်မှုဖြင့် တရားစွဲ

ဇွန် ၂၁၊ ၂၀၁၇
M-Media

– တနင်္လာနေ့မနက်က ဗလီဝတ်ကျောင်းတော်မှ ထွက်လာသူ မွတ်စလင်များအား ကားဖြင့် ၀င်တိုက်ခဲ့သူကို အကြမ်းဖက်မှုဖြင့် တရားစွဲဆိုထားသည်ဟု ယူကေရဲတပ်ဖွဲ့က ပြောကြားလိုက်သည်။

လန်ဒန်မြောက်ပိုင်း ဖင်စ်ဘူရီပါ့ခ်ဗလီမှ ၀တ်ပြုဆုတောင်းပြီး ထွက်လာသော မွတ်စလင်များကို အသက် ၄၇ နှစ်အရွယ် ဒါရန် အော့စ်ဘုန်းဆိုသူက ဗန်ကားဖြင့် ၀င်တိုက်ခဲ့ခြင်းဖြစ်ပြီး လူအများအပြား ဒဏ်ရာရရှိခဲ့သည်။

လန်ဒန်ရဲတပ်ဖွဲ့က ဗန်ကားမောင်းသူကို ကနဦးတွင် လူသတ်ရန် ကြိုးစားမှုဖြင့် ဖမ်းဆီးထားသော်လည်း နောက်ပိုင်းတွင် လူသတ်မှု၊ လူသတ်ရန် ကြိုးပမ်းမှုများအပါဝင် အကြမ်းဖက်လုပ်ရပ်ကို လှုံ့ဆော်မှု၊ ပြင်ဆင်မှု ဆောင်ရွက်မှုများဖြင့် တရားစွဲဆိုခဲ့သည်။

“အခုအချိန်အထိ စုံစမ်းစစ်ဆေးမှုအရတော့ သံသယရှိသူဟာ တစ်ယောက်တည်းလုပ်တယ်လို့ ယုံကြည်ရပါတယ်။ ဒါပေမယ့် ဒီလိုတိုက်ခိုက်မှုကို ဦးတည်စေတဲ့ အဖြစ်အပျက်အားလုံးကို ကျွန်တော်တို့ စုံစမ်းစစ်ဆေးနေပါတယ်” ဟု ရဲတပ်ဖွဲ့က ထုတ်ပြန်သော ကြေငြာချက်တွင် ဖော်ပြထားသည်။

ထို့ပြင် ထိခိုက်ဒဏ်ရာရသူများ အားလုံးမှာ ဖင်စ်ဘူရီပါ့ခ်ရှိ မွတ်စလင်လူ့အဖွဲ့အစည်းမှဖြစ်ကြောင်း၊ ထိုပတ်ဝန်းကျင် အထူးသဖြင့် ရမ်ဇာန်ဥပုသ်လကို ဖြတ်သန်းကြသူများ ဘေးအန္တရာယ်ကင်းရေးအတွက် ရဲတပ်ဖွဲ့ဝင်များကို ထပ်တိုးချသွားမည်ဖြစ်ကြောင်း ရဲတပ်ဖွဲ့က ပြောကြားခဲ့သည်။

Ref: Aljazeera