ပါကစ္စတန်တွင် တိမ်းမှောက် ဓာတ်ဆီတင်ကား ပေါက်ကွဲမှုကြောင့် လူ ၁၄၀ ကျော် သေဆုံး

ဇွန် ၂၅၊ ၂၀၁၇
M-Media

– ပါကစ္စတန်နိုင်ငံ ပန်ဂျပ်ပြည်နယ်တွင် တိမ်းမှောက်သွားသော ဓာတ်ဆီတင်ကားမှ ဆီများကို ယူနေစဉ် မီးလောင်ပေါက်ကွဲမှုကြောင့် အနည်းဆုံး လူ ၁၄၀ ခန့် မီးလောင်းသေဆုံးခဲ့ပြီး အများအပြား ဒဏ်ရာရရှိခဲ့သည်ဟု သိရသည်။

ဘာဟာဝါလ်ပူးရ်မြို့အပြင်ဘက်ရှိ အဝေးပြေးလမ်းတွင် ယနေ့မနက်ပိုင်းက ဓာတ်ဆီတင်ကားတစ်စီးမှာ စလစ်ဖြစ်၍ တိမ်းမှောက်သွားပြီးနောက် ထိုဒေသတစ်ဝိုက်တွင် နေထိုင်သူများမှာ မော်တော်ဆိုင်ကယ်များ၊ ကားများဖြင့် စုရုံးရောက်ရှိလာကာ အိုးခွက်များ၊ ရေဘူးများ၊ ရေပုံးများ၊ ဓာတ်ဆီပုံးများနှင့် ဓာတ်ဆီများကို ယူဆောင်နေစဉ် ကားမှာ မီးလောင်ပေါက်ကွဲခဲ့ခြင်း ဖြစ်သည်။

သေဆုံးသူများနှင့် ဒဏ်ရာရရှိသူများတွင် ကလေးငယ်များလည်း ပါဝင်ပြီး ရုပ်သံမှတ်တမ်းများတွင် မီးတောက်ကြီးများ၊ မီးလောင်ထားသော ကားများ၊ မော်တော်ဆိုင်ကယ်များ၊ မီးလောင်ထားသေဆုံးနေသည့် ရုပ်အလောင်းများ အဝေးပြေးလမ်းမတွင် ပြန့်ကျဲနေသည်ကို တွေ့ရှိခဲ့ရသည်။

အခင်းဖြစ်ပွားမှုနှင့်ပတ်သက်၍ ရှင်းရှင်းလင်းလင်း မသိရသေးဘဲ မျက်မြင်သက်သေများကမူ ဆီတင်ကားမှာ ကားဘီးပေါက်၍ တိမ်းမှောက်သွားသည်ဟု ပြောကြားကြောင်း၊ အနီးနားရှိလူများက ဓာတ်ဆီများ လာယူနေစဉ် ၁၀ မိနစ်ခန့်အကြာတွင် ကားမှာ ပေါက်ကွဲသွားကြောင်း၊ အဘယ့်ကြောင့် မီးလောင်သွားသည်ကို မသိရှိရသေကြောင်း ဒေသဆိုင်ရာ ရဲတပ်ဖွဲ့အကြီးအကဲက ပြောကြားခဲ့သည်။

ဒဏ်ရာရရှိသူများမှာ ၁၀၀ နှင့် ၂၀၀ ကြား ရှိနေသည်ဟုလည်း ဒေသတွင်း ဆေးဘက်ဆိုင်ရာ တာဝန်ရှိသူများက ပြောကြားခဲ့သည်။

Ref: Aljazeera