![](http://www.m-mediagroup.com/wp-content/uploads/2017/06/66-D.jpg)
ဆက်သွယ်ရေး ဥပဒေပုဒ်မ ၆၆ (ဃ) အမြန်ဆုံး ပြင်ဆင်ပေးရေး လှုပ်ရှားမှု ၂ဝ၁၆ ခုနှစ် အောက်တိုဘာလ ၁၈ ရက်နေ့က ရန်ကုန်မြို့မှာ ပြုလုပ်ခဲ့စဉ် Photo: Htet Arkar/RFA
ယနေ့ကမ္ဘာကြီး ရွာကဲ့သို့ ဖြစ်လာရခြင်းသည် အင်တာနက်ခေါ် ဆက်သွယ်ရေးနည်းပညာ ကြောင့်ဖြစ်သည်။ Information Technology (IT) ခေတ်ကြီးတွင် လူမှု့ရေး၊ စီးပွားရေး၊ ပညာရေး၊ ကျန်းမာရေး၊ နိုင်ငံရေး စသည့် ကဏ္ဍအစုံစုံကို သိရှိဖို့ရန် လူမှုရေးကွန်ရက်များကို အသုံးပြုလာသည့် ဦးရေသည် တစ်နှစ်ထက်တစ်နှစ်များပြားလာပါသည်။ ယင်းတို့အနက် Instagram, Twitter နှင့် Facebook တို့သည် လူသုံးများသည့် လူမှု့ရေးကွန်ရက်များ ဖြစ်ကြပါသည်။ ကမ္ဘာ့လူဦးရေသန်း ပေါင်း ၇၀၀၀ကျော်အနက် Facebook သုံးစွဲသူပေါင်းမှာ သန်း ၂၀၀၀ ကျော်ဖြစ်ပြီး မြန်မာပြည်တွင် ၁၂ သန်းကျော် ရှိကြောင်းသိရပါသည်။
စတုတ္ထမဏ္ဏိုင် မီဒီယာတို့သည် တိုင်းပြည်နှင့်ပြည်သူလူထုကြီးအတွက် လိုအပ်ရင် လိုအပ် သလို အကြံပြုသည်။ ဝေဖန်သည်။ ထောက်ပြကြသည်မှာ တာဝန်တစ်ရပ်ဖြစ်ပေသည်။ ဒီမိုကရေစီ အရပ်သားအစိုးရ လက်ထက်တွင် လူမှုရေးကွန်ရက်သုံးစွဲသူ လူထုတစ်ရပ်လုံးအား တုန်လှုပ် ခြောက်ခြားဖွယ်ရာ အရုပ်ဆိုးအကျည်းတန်စေသည့် ပုဒ်မ ၆၆ (ဃ) ကြောင့် နိုင်ငံအကျိုးပြု စာရေး ဆရာများ၊ အယ်ဒီတာချုပ်များ၊ ထောင်နန်းစံရသည့်ဖြစ်ရပ်သည် နိုင်ငံပုံရိပ်ကျဆင်းစေသည့်အပြင် ကမ္ဘာ့မီဒီယာများပင် အံ့သြတုန်လှုပ်ခဲ့ရသည်။ ပုဒ်မ ၆၆(ဃ)ဟူသည် ၂၀၁၃ခုနှစ် အောက်တိုဘာ လ ၈ရက်နေ့၌ ပြည်သူ့လွှတ်တော် ဥပဒေပုဒ်မ ၃၁ အဖြစ် သမ္မတဟောင်း ဦးသိန်းစိန် လက်မှတ်ရေး ထိုး ထုတ်ပြန်ခဲ့သော ဆက်သွယ်ရေးဥပဒေ တစ်ခုဖြစ်သည်။ “ ဆက်သွယ်ရေး ကွန်ရက်တစ်ခုခုကို အသုံးပြု၍ ပုဂ္ဂိုလ်တစ်ဦးဦးအား ခြောက်လှန့်ခြင်း၊ အနိုင်အထက်ပြုခြင်း၊မတရားတားဆီးကန့်ကွက် ခြင်း၊ အသရေဖျက်ခြင်း၊ နှောင့်ယှက်ခြင်း၊ မလျော်သြဇာသုံးခြင်း” တို့နှင့် ပတ်သက်၍ စွဲဆိုသော ရဲ အရေးယူပိုင်ခွင့်ရှိသော ပြစ်မှုဖြစ်သည်။ ဥပမာပေးတင်ပြရလျှင် – ဆက်သွယ်ရေးပုဒ်မ ၆၆(ဃ) ဖြင့် တက်ကြွလှုပ်ရှားသူ ဂုဏ်သရေရှိ ဒိမိုကရေစီဘက်တော်သား တစ်ဦးဦးကို ရဲက စစ်ဆေးဖို့ အချိန် မရွေးလာဖမ်းနိုင်တယ်။ တရားစွဲခံရသူက အချုပ်ထဲကနေ တရားရင်ဆိုင်ရပါမယ်။ အထူးသဖြင့် လူမှု့ရေးကွန်ရက် Facebook ကိုသုံး၍ ကျွန်တော့်ကို ချောက်တွန်းလိုသူတစ်ဦးက ကျွန်တော့်နာမည် နဲ့ Facebook အကောင့်အတု တစ်ခုဖွင့်မယ်။ ကျွန်တော့်ရဲ့ဓာတ်ပုံတွေ၊စာတွေ ကိုဖြစ်စေ ယူလိုက်မယ်။ ကျွန်တော်ရေးတင်ခဲ့တဲ့ post တွေကနေ copy ယူပြီးတင်မယ်။ ဒါကိုမသိ တဲ့ မိတ်ဆွေတွေက ကျွန်တော်ထင်ပြီး “ Add Friend” လုပ်ကြမယ်။ အချိန်အတိုင်းအတာ တစ်ခုမှာ ဒီအကောင့်အတု (Fake Account) ကနေ နိုင်ငံတော်အကြီးအကဲဆိုသူ တစ်ဦးဦးကို စော်ကားရိုင်း ပြတဲ့ post တွေတင်မယ်။ ဓာတ်ပုံတွေတင်မယ်။ comment တွေမှာ စည်းလွတ် ဝါးလွတ်တွေ လျှောက်ရေးမယ်။ အဲဒီလို ရေးတင်လိုက်တဲ့ မဖွယ်မရာတွေကို screen shot ရိုက်ပြီး ၆၆ (ဃ)နဲ့ ရဲ စခန်းမှာ အမှု့ဖွင့်တိုင်ကြားမယ်။ တရားစွဲမယ်။ ဒီလိုဖြစ်ရပ်မျိုးတွေကို လက်ရှိဝန်ကြီးဋ္ဌာန အားလုံး လိုလိုက ခွင့်ပြုနေတော့ တရားလိုရဲ့ screen shot လုပ်ပြီးတင်လာတဲ့ ဓာတ်ပုံအထောက်အထား ကနေ အကောင့်အတု လုပ်ခံရသူကိုပဲ ရဲကစစ်ဆေးမယ်။ အချုပ်ထဲနေရမယ်။ တရားရုံးကနေ အာမ ခံပေးမယ်၊ မပေးမသေချာဘူး။ ဒီလို၆၆(ဃ) နဲ့တရားစွဲခံရသူတွေကို လေ့လာကြည့်လျှင် အာမခံရတဲ့သူတွေရှိသလို၊ အာမခံငြင်းပယ်ပြီး ချုပ်ရမန်ယူကာ ထောင်ပို့ခံလိုက်ရသူတွေလည်းရှိ ပါတယ်။ ဒါကြောင့်လည်း ဥပဒေပညာရှင် အချို့က ဒီဆက်သွယ်ရေးဥပဒေကို “သားရေကွင်းလို ဥပဒေ” ဟုတင်စားခေါ်ဝေါ်ကြပါတယ်။
ထိုဆက်သွယ်ရေးဥပဒေဖြင့် ဗဟန်းမြို့နယ် တရားရုံးတွင် တရားရင်ဆိုင်နေရသော “ကျည်တောင်စုသစ္စာ” ဆောင်းပါးကိုရေးသားခဲ့သည့် ဗြိတိသျှကိုကိုမောင်က “မီဒီယာဥပဒေတွေရှိ ပါလျက်နဲ့ ပုံနှိပ်မီဒီယာတစ်ခုကို အွန်းလိုင်းပေါ်တင်တာနဲ့ တရားစွဲခံထားရတဲ့ The Voice Daily အယ်ဒီတာချုပ် ဦးကျော်မင်းဆွေ အနေနဲ့ အများကြီးနစ်နာသလို ကျွန်တော်အတွက်လည်း အများ ကြီး နစ်နာခဲ့ပါတယ်။ ကျွန်တော်တို့ အပြစ်မရှိကြောင်း မသေချာခင်မှာပဲ ထောင်ထဲမှာနေခဲ့ရပါ တယ်။ ကျွန်တော်တို့အတွက် ဂုဏ်သိက္ခာပိုင်းပါ ထိခိုက်ပါတယ်” ဟု မီဒီယာများအားပြောဆိုခဲ့ပါ သည်။ ထို့နောက် ဆောင်းပါးရှင်အား တရားရုံးမှ အပြစ်မရှိဟု ဆုံးဖြတ်ပြီး အမှု့မှ ပလပ်ခဲ့ပါသည်။
ဇွန်လ ၇ရက်နေ့က ကျင်းပခဲ့သည့် ဒုတိယအကြီမ် အမျိုးသားလွှတ်တော် ပဉ္စမပုံမှန် အစည်းအဝေး ခေတ္တရပ်နားချိန်၌ သတင်းမီဒီယာများ၏ ပုဒ်မ ၆၆ (ဃ) နှင့်ပတ်သက်၍ မေးမြန်း ချက်ကို ယခင်အမျိုးသားလွှတ်တော်ဥက္ကဋ္ဌဟောင်း မန္တလေးတိုင်းဒေသကြီး မဲဆန္ဒနယ်မှ အမျိုးသား လွှတ်တော်ကိုယ်စားလှယ် ဦးခင်အောင်မြင့်က “ပုဒ်မ ၆၆(ဃ) နှင့်ပတ်သက်၍ မိမိနိုင်ငံ၏ အခြေအ နေပေါ် မူတည်၍ မလျှော့မတင်းလုပ်ရန် လိုကြောင်း တင်းတင်းကြီး ပြတ်ပြတ်ကြီး မလုပ်သင့်ဖူး” ဟု သတင်းမီဒီယာများအား ဖြေကြားသွားခဲ့ပါသည်။
“ပုဒ်မ ၆၆(ဃ) နဲ့ တရားစွဲထားတဲ့ အမှု့ပေါင်း ၇၀ ကို သုံးသပ်ကြည့်လျှင် ၆၁မှု့မှာ လက်ရှိ အစိုးရသစ် လက်ထက်မှာ ဖြစ်ပြီး အမုန်းစကား (Hate Speech) ပြောဆိုရေးသားလို့ တရားစွဲခံထား ရတဲ့ အမှု့မှာ တစ်မှု့မျှ မရှိသည်မှာ ထူးဆန်းနေသည်” ဟု ၆၆(ဃ)ဖျက်သိမ်းရေး၊ ဆက်သွယ်ရေး ဥပဒေ ပြင်ဆင်ရေး ပူးပေါင်းအဖွဲ့တို့မှ ဒေါ်ဝေဖြိုးမြင့်က ထောက်ပြပါသည်။ အမျိုးသားလွှတ်တော် အမတ် စစ်ကိုင်းတိုင်းဒေသကြီး မဲဆန္ဒနယ် အမှတ် (၆)မှ ဦးရဲထွဋ် (ခ) စာရေးဆရာ ဝင်းထွဋ်ဇော် က “၆၆ (ဃ) ဖျက်လိုက်ရင်ရပါတယ်။ တခြားစွဲလို့ရတဲ့ ရာဇသတ်ကြီး ပုဒ်မတွေလည်း ရှိနေတာပဲ။ အခုဒီပုဒ်မကို ကြောက်ပြီး စာရေးဆရာတွေက စာမရေးတော့ရင် သတင်းမီဒီယာတွေက သတင်းအမှန်မတင်ပြနိုင်တော့ရင် ဒီမိုကရေစီကိုသွားတဲ့ အရွေ့က ပိုနှောင့်နှေးသွားနိုင်တယ်” ဟု ထောက်ပြပါသည်။
ထို့ကြောင့် ပုဒ်မ ၆၆(ဃ) အရ လူတစ်ယောက်သည် “ဒီနေ့အပြင်မှာ နောက်နေ့ထောင်ထဲ မှာ ရောက်ရှိနိုင်သည့် မတရားသည့် ဥပဒေတစ်ရပ်ဖြစ်ကြောင်း” ဥပဒေပညာရှင်များက ထောက် ပြနေပါသည်။ နိုင်ငံသားတစ်ဦးချင်း၏ ဂုဏ်သရေထိခိုက်ပျက်ပြားနစ်နာမှု မရှိအောင် နိုင်ငံ တော်လုံခြုံရေး အများပြည်သူတည်ငြိမ်အေးချမ်းမှုရှိရေးအတွက် ပြဋ္ဌာန်းထားသော တည်ဆဲဥပဒေ များလည်းရှိနေပါသည်။ ဗြိတိသျှနယ်ချဲ့လက်ထက်က မဆလပါတီအာဏာရှင် အစိုးရလက်ထက် က နဝတ၊နအဖ စစ်အစိုးရများလက်ထက်က သမ္မတဟောင်း ဦးသိန်းစိန် အစိုးရလက်ထက်က ပြဋ္ဌာန်းခဲ့သော ဥပဒေများသည် နိုင်ငံတကာ လူ့အခွင့်အရေး စံချိန်၊ စံညွှန်းများနှင့် ဆန့်ကျင်နေမည်။ မြန်မာပြည်သူလူထုအတွက် အမှန်တကယ် အကျိုးရှိ၊မရှိဆိုသည်ကို ပြည်သူ့ကိုယ်စားလှယ်များက လေ့လာသုံးသပ်ပြီး ပြင်ဆင်သင့်သည်ကို ပြင်ဆင်ဖျက်သိမ်းသင့်သည်တို့ကို ဖျက်သိမ်းဖို့ အချိန်တန် နေပါပြီ။
ပြည်သူ့လွှတ်တော် ဥက္ကဋ္ဌကြီး ဦးဝင်းမြင့်ကလည်း “နိုင်ငံသားတစ်ယောက်ချင်းစီရဲ့ ဥပဒေပါ အခွင့်အရေးတွေကို ကာကွယ်ပေးရမှာက ဥပဒေရဲ့အလုပ်ပါ” ဟု ပြည်သူ့ဆန်စား ပြည်သူ့ကိုယ် စားလှယ်များအား ပြောကြားခဲ့ဖူးသည်ကို ကိုယ်စားလှယ်တော်ကြီးများ နှလုံးပိုက်ကာ အစွမ်းကုန် အလုပ်လုပ်ကြဖို့ လိုပြီ ဖြစ်ပါကြောင်း တင်ပြလိုက်ပါသည်။
ဂျက်ဖရီတင်အုန်း (ရန်ကုန်စက်မှု့တက္ကသိုလ် R.I.T)
Comments