အရေးပါသည့်ဗလီအား ပြန်သိမ်းပြီးနောက် IS အကြမ်းဖက်အဖွဲ့ ကျဆုံးပြီဟု အီရတ်ကြေငြာ

ဇွန် ၂၉၊ ၂၀၁၇
M-Media

IS က ဖျက်ဆီးပြီးနာက် တွေ့ရသည့် အလ်-နူရီဗလီဝတ်ကျောင်းတော် အစိတ်အပိုင်းတစ်ချို့

– လွန်ခဲ့သည့် ၃ နှစ်အရင် IS က ခလီဖာနိုင်ငံအဖြစ် ကြေငြာခဲ့သည့် မူဆိုးလ်မြို့ရှိ သမိုင်းဝင် အလ်-နူရီဗလီနေရာအား သိမ်းယူခဲ့ပြီးနောက် IS အကြမ်းဖက်အဖွဲ့ ကျရှုံးသွားပြီဟု အီရတ်စစ်တပ်က ယနေ့တွင် ကြေငြာလိုက်သည်။

နှစ်ပေါင်း ၈၅၀ သက်တမ်းရှိ အဆိုပါဗလီဝတ်ကျောင်းတော်ကို ပြန်လည်သိမ်းပိုက်နိုင်ခြင်းမှာ ၈ လတာ ကြာမြင့်ခဲ့သည့် မူဆိုးလ်မြို့ ပြန်လည်သိမ်းယူရေး အီရတ်စစ်တပ်မှ ပြုလုပ်သော ထိုးစစ်တွင် အရေးပါသည့် အောင်ပွဲလည်း ဖြစ်သည်။

“သူတို့ရဲ့ စိတ်ကူးယဉ်တိုင်းပြည်ကြီးက ကျဆုံးသွားပါပြီ” ဟု အီရတ်စစ်တပ်မှ ပြောရေးဆိုခွင့်ရှိသူ ဗိုလ်မှူး ယဟ်ယာ ရဆူလ်က ပြောကြားခဲ့သည်။

IS အကြမ်းဖက်အဖွဲ့မှာ မူဆိုးလ်မြို့တစ်ဝိုက်ရှိ ရပ်ကွက်အချို့တွင် ခုခံတိုက်ခိုက်မှုများ ပြုလုပ်နေသောကြောင့် လာမည့်ရက်အနည်းငယ်ကျမှသာ တိုက်ပွဲကို အဆုံးသတ်နိုင်မည်ဟု အီရတ်အာဏာပိုင်များက မျှော်လင့်ထားသည်။

အလ်-နူရီဗလီဝတ်ကျောင်းတော်၏ အစိတ်အပိုင်း အများအပြားကို IS က ပြီးခဲ့သည့်တစ်ပတ်တွင် ဖောက်ခွဲ ဖျက်ဆီးခဲ့သည်။

အီရတ်အစိုးရနှင့် အမေရိကန်ဦးဆောင်သော မဟာမိတ်တပ်မှ တာဝန်ရှိသူများက အလ်-နူရီဗလီကို IS က ဖျက်ဆီးလိုက်ခြင်းမှာ ၎င်းတို့အဖွဲ့ မူဆိုးလ်အား မကြာခင် ဆုံးရှုံးတော့မည်ဆိုသည့် လက္ခဏာဖြစ်သည်ဟု ပြောကြားခဲ့သည်။

ဝန်ကြီးချုပ် ဟိုင်ဒါ အလ်-အာဘာဒီကလည်း ထိုလုပ်ရပ်မှာ ၎င်းတို့ရှုံးနိမ့်ကြောင်း ‘တရားဝင်ကြေငြာလိုက်ခြင်း’ ဖြစ်သည်ဟု ဆိုသည်။

IS အကြမ်းဖက်အဖွဲ့က ၂၀၁၄ ခုနှစ်တွင် အီရတ်ဒုတိယမြို့တော် မူဆိုးလ်ကို သိမ်းပိုက်ခဲ့ပြီးနောက် အဖွဲ့ခေါင်းဆောင် ဘဂ္ဂဒါဒီမှာ အလ်-နူရီဗလီဝတ်ကျောင်းတော်တွင် သောကြာနေ့ ၀တ်ပြုမှုအတွင်း ခလီဖာနိုင်ငံ တည်ထောင်ကြောင်း ကြေငြာခဲ့သည်။

Ref: Aljazeera