အထောက်အထားမဲ့ နိုင်ငံခြားအလုပ်သမားများ လာရောက်အဖမ်းခံရန် မလေးရှားကြေငြာ

ဇူလိုင် ၇၊ ၂၀၁၇
M-Media

– မလေးရှားအစိုးရက ထုတ်ပေးသည့် E-card လျှောက်ထားခြင်းမရှိသော နိုင်ငံခြားသား အလုပ်သမားများအနေဖြင့် ရဲတပ်ဖွဲ့ထံ လာရောက်အဖမ်းခံကြရန် မလေးရှား လူဝင်မှုကြီးကြပ်ရေး ညွှန်ကြားရေးမှူးချုပ် မွတ်စ်တာဖာ အလီက တိုက်တွန်းလိုက်ပြီး သို့မဟုတ်ပါက ထောင်ဒဏ်၊ ငွေဒဏ် ကျခံရမည်ဟု သတိပေးလိုက်သည်။

မလေးရှား လူဝင်မှုကြီးကြပ်ရေးမှာ တရားမ၀င်အလုပ်သမားများအတွက် အထောက်အထားအဖြစ် E-card များကို ဇွန်လ ၃၀ ရက်နေ့ နောက်ဆုံးထား၍ အခမဲ့ထုတ်ပေးခဲ့သည်။ အဆိုပါ E-card ကိုင်ဆောင်ထားသူများမှာ ၂၀၁၈ ခုနှစ် ဖေဖော်ဝါရီလ ၁၅ ရက်နေ့ နောက်ဆုံးထားကာ အလုပ်လုပ်ကိုင်ခွင့် ပါမစ်များကို လျှောက်ထားရမည်ဖြစ်သည်။

မွတ်စ်တာဖာ အလီက E-card လျှောက်ထားခြင်း မရှိသော နိုင်ငံခြားသား အလုပ်သမားများအနေဖြင့် ရဲတပ်ဖွဲ့တွင် အလိုအလျောက် လာရောက်အဖမ်းခံပါ ဒဏ်ကြေး ရင်းဂစ် ၄၀၀ သာ ဆောင်ရမည်ဖြစ်ပြီး၊ ရဲတပ်ဖွဲ့၏ စစ်ဆင်ရေးတွင် ဖမ်းဆီးခံရလျှင် ရင်းဂစ် ၅၀၀၀ အထိ ဒဏ်ငွေဆောင်ရမည်ဖြစ်ကြောင်း၊ တရားရုံးတွင် ဖြေရှင်းပါက တစ်သောင်းအထိ ပေးဆောင်ရမည်ဖြစ်ကြောင်း ယမန်နေ့ ကွာလာလမ်ပူ၌ ပြုလုပ်ခဲ့သည့် APEC Business Travel Card အခမ်းအနား အဖွင့်မိန့်ခွန်းတွင် ထည့်သွင်းပြောဆိုခဲ့သည်။

“သူတို့ (နိုင်ငံခြားအလုပ်သမား) တွေ လာအဖမ်းခံလို့ရပြီး ချက်ခြင်း နယ်နှင်မှာပါ။ ဒါပေမယ့် အဲဒီမတိုင်ခင်တော့ စုံစမ်းစစ်ဆေးခံရပါမယ်။ 3-Plus-1 အစီအစဉ်အရ သူတို့ဟာ ဒဏ်ကြေး ၄၀၀ ပေးရမှာဖြစ်ပြီး ပြီးရင် လေယာဉ်လက်မှတ်ဝယ်ကာ သူတို့မူရင်းတိုင်းပြည်ကို ပြန်ရမှာပါ။ သူတို့ဟာ နောက် ၅ နှစ်အတွင်း မလေးရှားကို
ဝင်လို့မရတဲ့ အမည်ပျက်စာရင်း သွင်းခံရမှာဖြစ်ပါတယ်” ဟု အလီကဆိုသည်။

ထို့ပြင် E-card လျှောက်ထားမှုလုပ်ငန်းကို သက်တမ်းတိုးပေးတော့မည် မဟုတ်ကြောင်း၊ E-card ကုန်ဆုံးရက်ပြီးနောက် နေ့စဉ်လိုလို ပြုလုပ်နေသည့် အထူးစစ်ဆင်ရေးများကြောင့် ထိန်းသိမ်းရေးစခန်းများ ပြည့်သွားမည်ဟု မျှော်လင့်ကြောင်း၊ ဖမ်းဆီးခံရသူများအား စုံစမ်းစစ်ဆေးမှု၊ တရားစွဲဆိုမှုကို အလျင်အမြန်ပြုလုပ်သွားမည်ဖြစ်ပြီး နယ်နှင်ဒဏ်ပေးခြင်းက တရားမ၀င်နေထိုင်သူပြဿနာကို ဖြေရှင်းရေး အထောက်အကူဖြစ်မည်ဖြစ်ကြောင်း အလီက ထည့်သွင်းပြောကြားခဲ့သည်။

ဇူလိုင်လ ၁ ရက်နေ့မှ စတင်ပြုလုပ်ခဲ့သည့် စစ်ဆင်ရေးအတွင်း နိုင်ငံခြားအလုပ်သမား ၂၀၀၀ ကျော်နှင့် အလုပ်ရှင် ၄၄ ဦးကို ဖမ်းဆီးထားသည်ဟုလည်း သိရသည်။

Ref: Malaysiakini