တန်းဆင်းလျှင် သတ်မည်ဆိုသောကြောင့် ဘရာဇီးလ်ကလပ်အသင်းဥက္ကဌ ရာထူးမှ နှုတ်ထွက်

ဇူလိုင် ၇၊ ၂၀၁၇
M-Media

အသက်အန္တရာယ် ခြိမ်းခြောက်ခံရမှုကြောင့် အသင်းဥက္ကဌရာထူးမှ နှုတ်ထွက်သွားသည့် ဆာဂျီယို

– အသင်းတန်းဆင်းပါက သတ်ပစ်မည်ဟု ခြိမ်းခြောက်မှုကြောင့် ဘရာဇီးလ်မြောက်ပိုင်း နာမည်ကြီးကလပ်အသင်းတစ်ခု၏ ဥက္ကဌမှာ ရာထူးမှ နှုတ်ထွက်သွားခဲ့သည်ဟု သိရသည်။

ဒုတိယတန်းကလပ် Paysandu Sport အသင်း၏ ဥက္ကဌဖြစ်သူ ဆာဂျီယို ဆာရာဖြစ်ပြီး တနင်္ဂနွေနေ့က မိသားစုနှင့်အတူ လမ်းလျှောက်နေစဉ် လက်နက်များကိုင်ဆောင်ထားသည့် ဆိုင်ကယ်သမားများက လာရောက်ကာ အသက်အန္တရာယ်ကို ခြိမ်းခြောက်ခဲ့ခြင်းဖြစ်သည်။

နိုင်ငံမြောက်ပိုင်း နာမည်ကြီးအသင်းများထဲမှ တစ်သင်းဖြစ်သော်လည်း Paysandu Sport အသင်းမှာ ဘရာဇီးလ် စီးရီးဘီတွင် အဆင့် ၁၆ နေရာ ရောက်နေပြီး တန်းဆင်းဇုန်နှင့် တစ်ဆင့်သာ ကွာတော့သည်။

ဆာဂျီရို၏ ညီမဖြစ်သူ ခရစ္စတီးနား ဆာရာကလည်း ၎င်း၏အစ်ကိုမှာ ဇနီး၊ ကလေးများနှင့်အတူ လမ်းလျှောက်နေစဉ် ထိုကဲ့သို့ အသက်အန္တရာယ်ကို ခြိမ်းခြောက်ခံရသောကြောင့် ဥက္ကဌအဖြစ်မှ နှုတ်ထွက်ရန် ဆုံးဖြတ်ခဲ့ခြင်းဖြစ်သည်ဟု ဆိုရှယ်မီဒီယာတွင် ရေးသားခဲ့သည်။

ဘရာဇီးလ်တွင် ဘောလုံးပရိတ်သတ်များ၏ အကြမ်းဖက်မှုများ၊ ကစားသမားများကို အသက်အန္တရာယ်ခြိမ်းခြောက်မှုများမှာ ဆယ်စုနှစ်ချီ၍ ရှိခဲ့သည်။

Ref: BBC