ဆီးရီးယားဒေသတစ်ချို့ အပစ်ရပ်ရေး ကန်-ရုရှား သဘောတူ

ဇူလိုင် ၈၊ ၂၀၁၇
M-Media

– ဆီးရီးယားနိုင်ငံ အနောက်တောင်ပိုင်းဒေသ အပစ်ရပ်ရေး ကိစ္စအတွက် အမေရိကန်သမ္မတ ဒေါ်နယ်ထရမ့်နှင့် ရုရှားသမ္မတ ပူတင်တို့မှာ ဟမ်းဘတ်မြို့တွင် ကျင်းပပြုလုပ်နေသည့် ဂျီ ၂၀ ထိပ်သီးအစည်းအဝေးအတွင်း သဘောတူညီခဲ့သည်ဟု သိရသည်။

သောကြာနေ့က ခေါင်းဆောင်နှစ်ဦး သီးခြားတွေ့ဆုံမှုအတွင်း ထိုကဲ့သို့ သဘောတူခဲ့ခြင်းဖြစ်ပြီး ဒါရာ၊ ကွမ်အစ်ထရာ၊ ဆူဝေဒါဒေသများမှာ အဆိုပါ အပစ်ရပ်ရေးသဘောတူညီချက်တွင် အကျုံးဝင်မည်ဟု ရုရှားနိုင်ငံခြားရေးဝန်ကြီး ဆာဂျီလာဗရော့က ပြောကြားခဲ့သည်။ ဆွေးနွေးမှုအတွင်း ဂျော်ဒန် တာဝန်ရှိသူများလည်း ပါဝင်သည်။

အပစ်ရပ်ရေးကို ဇူလိုင် ၉ ရက်နေ့တွင် စတင်မည်ဖြစ်ကာ အမေရိကန်နိုင်ငံခြားရေးဝန်ကြိး ရက်စ် တီလာဆန်က အဆိုပါ သဘောတူညီချက်မှာ ဆီးရီးယားကိစ္စတွင် အမေရိကန်နှင့် ရုရှားတို့ ပူးတွဲဆောင်ရွက်နိုင်သည်ဆိုသည်ကို ပြသခြင်းဖြစ်သည်ဟု ပြောကြားခဲ့သည်။

ဆီးရီးယားတွင် ယခင်ကလည်း အပစ်ရပ်ရေးသဘောတူညီချက်များ ရယူခဲ့ပြီး အောင်မြင်ခြင်းမရှိခဲ့ပေ။

၆ နှစ်တာ ကြာမြင့်ခဲ့ပြီဖြစ်သည့် ဆီးရီးယားစစ်ပွဲတွင် လူသန်းဝက်ခန့် သေဆုံးခဲ့ပြီး သန်းနှင့်ချီ၍ အိုးအိမ်စွန့်ခွာထွက်ပြေးနေရသည်။

ရုရှားမှာ အာဏာရှင် အာဆတ်အစိုးရကို ကျောထောက်နောက်ခံပြုထားပြီး အမေရိကန်က သူပုန်များကို ထောက်ပံ့မှုများ ပြုလုပ်နေသည်။

Ref: Aljazeera