အီရန် နိုင်ငံတော်လေကြောင်းလိုင်း စီအီးအိုအဖြစ် အမျိုးသမီးတစ်ဦးကို ပထမဆုံး ခန့်အပ်

ဇူလိုင် ၁၃၊ ၂၀၁၇
M-Media

Iran Air ၏ အကြီးအကဲသစ်ဖြစ်လာသည့် ဖာရ်ဇာနဟ် ရှာရက်ဖ်ဘာဖီ

– ထိပ်တန်း ခရီးသည်တင်လေယာဉ်များကို ၀ယ်ယူကာ လုပ်ငန်းချဲ့ထွင်ရန် ပြင်ဆင်နေသည့် အီရန် အမျိုးသားလေကြောင်းလိုင်း Iran Air ၏ စီအီးအိုအဖြစ် အမျိုးသမီးတစ်ဦး ပထမဆုံး ခန့်အပ်ခံခဲ့ရသည်ဟု သိရသည်။

ဖာရ်ဇာနဟ် ရှာရက်ဖ်ဘာဖီဆိုသူဖြစ်ပြီး အင်္ဂါနေ့က ခန့်အပ်ခြင်းခံခဲ့ရကာ လက်ရှိအကြီးအကဲ ဖာရ်ဟဒ် ပါရ်ဗာရက်ရှ်၏နေရာတွင် အစားထိုး တာဝန်ယူသွားမည်ဖြစ်သည်။

အသက် ၄၄ နှစ်အရွယ် ရှာက်ဖ်ဘာဖီမှာ အာကာသလေကြောင်းပညာရပ်ဖြင့် ဒေါက်တာဘွဲ့ရထားသူဖြစ်ပြီး Iran Air ၏ သုတေသနဌာနကို တာဝန်ယူကာ ဘုတ်အဖွဲ့အ၀င်အဖြစ်လည်း ယခင်က တာဝန်ထမ်းဆောင်ခဲ့သည်။

သူမမှာ အရပ်ဖက်လေကြောင်း စီမံကိန်းများစွာတွင် ပါဝင်ဆောင်ရွက်ပေးခဲ့ကာ နိုင်ငံ၏ နာမည်ကြီး Amir Kabir နည်းပညာတက္ကသိုလ်၊ Shahid Sattari အာကာသလေကြောင်း အင်ဂျင်နီယာတက္ကသိုလ်တို့တွင် ဘာသာရပ်များစွာကို သင်ကြားပို့ချပေးခဲ့သည်။

Iran Air ၏ အကြီးအကဲသစ်အဖြစ် ဆောင်ရွက်ရမည့် ရှာက်ဖ်ဘာဖီမှာ လေကြောင်းလိုင်းတွင် ရှိနေသည့် အိုမင်းဟောင်းနွမ်းနေသော လေယာဉ်များကိစ္စကို ဦးစားပေး ဖြေရှင်းရမည် ဖြစ်သည်။

အီရန်အမျိုးသားလေကြောင်းလိုင်းမှာ ဒီဇင်ဘာလက ကန်ဒေါ်လာ ၁၆.၆ ဘီလီယံတန်ဖိုးရှိ လေယာဉ် အစီး ၈၀ ၀ယ်ယူရန် ဘိုးအင်းကုမ္ပဏီနှင့် စာချုပ်ချုပ်ဆိုခဲ့ပြီး၊ ဇန်န၀ါရီလတွင်မူ Airbus မှ ၁၁၂ စီးဝယ်ယူရန် လက်မှတ်ရေးထိုးခဲ့ကာ ကန်ဒေါ်လာ ၂၅ ဘီလီယံတန်ဖိုး ရှိသည်။

အီရန်နှင့် အနောက်နိုင်ငံများအကြား နျူကိစ္စ သဘောတူညီချက် နောက်ဆက်တွဲအဖြစ် စီးပွားရေးပိတ်ဆို့မှု ဖယ်ရှားခဲ့ပြီးနောက်ပိုင်း Iran Air မှာ ၎င်းတို့၏ လုပ်ငန်းကို တိုးချဲ့ရန် အရှိန်အဟုန်ဖြင့် ကြိုးစားလာသည်။

Ref: Press TV