လူမျိုးရေးခွဲခြားစိတ်ကြောင့် အာရှသူအား အခန်းငှားရန်ငြင်းသည့် ကန်လူဖြူအမျိုးသမီး ပြစ်ဒဏ်ချခံရ

ဇူလိုင် ၁၄၊ ၂၀၁၇
M-Media

လူမျိုးရေးခွဲခြားဆက်ဆံခံရသည့် ဒိုင်နီဆူး

– ကယ်လီဖိုးနီးယားပြည်နယ်မှာ အာရှနွယ်ဖွားတစ်ယောက်ရဲ့ အခန်းဘိုကင်လုပ်မှုကို လူမျိုးရေးခွဲခြားစိတ်နဲ့ ငြင်းဆိုခဲ့တဲ့ လူဖြူအမျိုးသမီးတစ်ဦးဟာ လျော်ကြေး ကန်ဒေါ်လာ ၅၀၀၀ အပါအ၀င် ပြစ်ဒဏ်အများအပြား ချမှတ်ခံခဲ့ရတယ်လို့ သိရပါတယ်။

ကယ်လီဖိုးနီးယားတက္ကသိုလ်က ဥပဒေကျောင်းသူ အာရှနွယ်ဖွား ဒိုင်နီဆူးဟာ နာမည်ကျော် Big Bear အပန်းဖြေစခန်းမှာ ဖေဖော်ဝါရီလက နှင်းလျှောစီးခရီးအတွက် အွန်လိုင်းအခန်းငှားဝန်ဆောင်မှုလုပ်ငန်းဖြစ်တဲ့ Airbnb ကနေ အခန်းတစ်ခု ကြိုတင်ဘိုကင်လုပ်ခဲ့တာပါ။

ဒါပေမယ့် အဲဒီက တာဝန်ရှိသူ တာမီဘာရ်ကာက သူ့အနေနဲ့ အာရှနွယ်ဖွားတစ်ယောက်ကို အခန်းမငှားနိုင်ကြောင်း ပြောကြားခဲ့ပါတယ်။

Youtube မှာ လွှင့်တင်ထားတဲ့ ဗီဒီယိုမှာ ဆူးက သူတို့သူငယ်ချင်းတစ်စု နှင်းတောထဲမှာ Big Bear ဆီ ကားမောင်းသွားနေတဲ့အချိန် Airbnb မိုဘိုင်းအက်ပလီကေးရှင်းကနေ အခန်းမငှားနိုင်ကြောင်း ပြန်စာလာခဲ့တယ်လို့ မျက်ရည်လည်ရွဲနဲ့ ပြောကြားခဲ့ပြီး screenshoot ရိုက်ထားတဲ့ သူနဲ့ တာမီဘာရ်ကာတို့ရဲ့ အပြန်အလှန်ပြောဆိုမှုတွေကိုလည်း ပြသခဲ့ပါတယ်။

“ကျွန်မက ဒီမှာ အသက် ၃ နှစ်ကတည်းက နေလာတာရှင့်။ အမေရိကန်က ကျွန်မရဲ့ ဌာနေပါပဲ။ ကိုယ့်ကိုယ်ကို အမေရိကန်တစ်ယောက်လို့ပဲ ကျွန်မ ခံယူတယ်။ ဒါပေမယ့် ဒီအမျိုးသမီးက ကျွန်မဟာ အာရှနွယ်ဖွားတစ်ယောက်ဖြစ်တဲ့အတွက် ခွဲခြားခဲ့တာပါ” လို့ ဆူးက ပြောကြားခဲ့ပါတယ်။

ဘာကာရဲ့ပြန်စာမှာ “ဒီအကြောင်းကြောင့်ပဲ ထရမ့် တက်လာတာ” “ဒီတိုင်းပြည်ကို နိုင်ငံခြားသားတွေပြောတဲ့အတိုင်း လိုက်လုပ်ရတဲ့တိုင်းပြည်မျိုး ငါအဖြစ်မခံနိုင်ဘူး” ဆိုတာတွေလည်း ပါဝင်ခဲ့ပါတယ်။

ကယ်လီဖိုးနီးယားက အလုပ်အကိုင်နှင့် အိမ်ယာ တရားမျှတရေးဌာနက ဒီကိစ္စကို စုံစမ်းစစ်ဆေးမှု ပြုလုပ်ခဲ့ပြီးတဲ့နောက် ဘာကာနေနဲ့ နစ်နာကြေး ကန်ဒေါ်လာ ၅၀၀၀ ပေးဖို့၊ ဆူးကို ပြန်လည်တောင်းပန်ဖို့၊ ကောလိပ်အဆင့်ရှိတဲ့ အာရှအမေရိကန် လေ့လာရေးသင်တန်း တက်ဖို့အပါအ၀င် အခြားသောပြစ်ဒဏ်တွေ ကျခံဖို့ အမိန့်ချခဲ့ပါတယ်။

ကယ်လီဖိုးနီးယား နိုင်ငံသားဆိုင်ရာဥပဒေအရ နေထိုင်မှုဆိုင်ရာ ကိစ္စတွေမှာ လူမျိုးရေးခွဲခြားမှုနဲ့ပတ်သက်တဲ့ ပြစ်မှုတစ်ခုတိုင်းအတွက် ဒဏ်ငွေဟာ ကန်ဒ်ါလာ ၄၀၀၀ ဖြစ်ပါတယ်။

Ref: LaTimes