အလ်-အက်ဆာဗလီကို အစ္စရေးက အပိုင်စီးထားမှုကြောင့် ဂျေရုစလင်တွင် တင်းမာမှုများ မြင့်တက်

ဇူလိုင် ၂၁၊ ၂၀၁၇
M-Media

အလ်-အက်ဆာဗလီအား အစ္စရေးက အပိုင်စီးထားမှုကြောင့် ဗလီအပြင်ဘက်တွင် ပါလက်စတိုင်းပြည်သူများ ၀တ်ပြုနေစဉ်

– အစ္စရေးက သိမ်းပိုက်ထားတဲ့ ပါလက်စတိုင်းပိုင် ဂျေရုစလင်မြို့ဟောင်းက အလ်-အက်ဆာ ဗလီဝတ်ကျောင်းတော်ကို အစ္စရေးက တင်းတင်းကျပ်ကျပ် ပိတ်ပင်ထားမှုအတွက် တင်းမာမှုတွေ မြင့်တက်နေတဲ့အချိန် ဒီနေ့ သောကြာဝတ်ပြုမှုမှာ ကန့်သတ်ချက်တစ်ခု ထပ်ထုတ်လိုက်တဲ့အတွက် အခြေအနေက ပိုပြီးဆိုးမယ့် အနေအထားတွေ ရှိနေပါတယ်။

ပြီးခဲ့တဲ့တစ်ပတ် သောကြာနေ့က အလ်-အက်ဆာ ဗလီအပြင်ဘက် အစ္စရေးစစ်ဆေးရေးဂိတ်မှာ ပါလက်စတိုင်း ၃ ဦးက ပစ်ခတ်မှုတွေ ပြုလုပ်ခဲ့တာကြောင့် အစ္စရေးရဲတပ်ဖွဲ့ဝင် ၂ ဦး သေဆုံးခဲ့ပြီး၊ ပါလက်စတိုင်း သေနတ်သမားတွေလည်း အပြန်အလှန်ပစ်ခတ်မှုအတွင်း သေဆုံးခဲ့ပါတယ်။

အဲဒီနောက်ပိုင်းမှာ အစ္စရေးက သောကြာနေ့ဝတ်ပြုမှုကို ပိတ်ပင်ကာ ဗလီဝတ်ကျောင်းတော်ကို ပိတ်ပစ်ခဲ့ပါတယ်။ ဒီလုပ်ရပ်ကြောင့် အာရပ်နိုင်ငံတွေနဲ့ ကမ္ဘာတစ်ဝှမ်းက ရှုတ်ချမှုတွေ ရှိလာပြီး တနင်္ဂနွေနေ့မှာ ဗလီကို ပြန်ဖွင့်ပေးခဲ့ပေမယ့် သတ္တုရှာဖွေရေးစက်တွေ၊ လုံခြုံရေးကင်မရာတွေ မြောက်များစွာ တပ်ဆင်ခဲ့ပြီး ပါလက်စတိုင်းတွေကတော့ ဒါကို လက်မခံတဲ့အတွက် ဆန္ဒပြမှုတွေ ပြုလုပ်ခဲ့ကာ အစ္စရေးလုံခြုံရေးတပ်ဖွဲ့တွေကလည်း ပြင်းပြင်းထန်ထန် နှိမ်နင်းခဲ့ပါတယ်။

ဒီနေ့ သောကြာဝတ်ပြုမှုအတွက် အသက် ၅၀ အောက် ပါလက်စတိုင်းအမျိုးသားတွေ ဗလီထဲ ၀င်ရောက်ခွင့်မပြုဘူးလို့ အစ္စရေးက အမိန့်ထုတ်ပြန်ခဲ့ပါတယ်။

“အသက် ၅၀နဲ့အထက် အမျိုးသားတွေကိုသာ မြို့ဟောင်းနဲ့ Tempole Mount အတွင်း ၀င်ရောက်ခွင့်ပြုပါတယ်။ အမျိုးသမီးတွေကိုတော့ အသက်ကန့်သတ်ထားခြင်း မရှိပါဘူး” လို့ အစ္စရေးရဲတပ်ဖွဲ့က ထုတ်ပြန်တဲ့ ကြေငြာချက်မှာ ဖော်ပြထားပါတယ်။

သောကြာနေ့မနက်ပိုင်း ပါလက်စတိုင်းရပ်ကွက်တွေမှာ အစ္စရေးလုံခြုံရေးတပ်ဖွဲ့ဟ အင်အားတော်တော်များများနဲ့ ၀န်းရံထားပြီး ထူးသဖြင့် ဗလီဝတ်ကျောင်းတော်တစ်ဝိုက်မှာ ဖြစ်ပါတယ်။

နေ့စဉ် ဆန္ဒပြမှု

ဆန္ဒပြသူများအား အစ္စရေးရဲတပ်ဖွဲ့ နှိမ်နှင်းမှု

အစ္စရေးက ဗလီဝတ်ကျောင်းတော်တစ်ဝိုက်မှာ သတ္တုရှာဖွေရေးစက်တွေ၊ တစ်ဦးချင်းသာ ၀င်ရောက်ရမယ့် စက်တွေ၊ လုံခြုံရေးကင်မရာတွေ တပ်ဆင်ခဲ့တာကို ပါလက်စတိုင်းပြည်သူတွေက မကျေနပ်ဘဲ အလ်-အက်ဆာဗလီရဲ့ အမှတ်သညာကို ပြောင်းလဲဖို့ ကြိုးစားတဲ့လုပ်ရပ်လို့ မှတ်ယူခဲ့ကြပါတယ်။

ဒါ့ကြောင့် ပြီးခဲ့တဲ့ တနင်္ဂနွေနေ့ကစလို့ နေ့တိုင်းလိုလို ဗလီဝတ်ကျောင်းတော်ရှေ့မှာ ဆန္ဒပြခဲ့ကြပြီး အစ္စရေးရဲတပ်ဖွဲ့ကလည်း ရာဘာကျည်ဆံတွေ၊ မျက်ရည်ယိုဗုံးတွေနဲ့ ပြန်လည်နှိမ်နင်းတာကြောင့် ထိခိုက်ဒဏ်ရာရသူတွေ ရှိခဲ့ပါတယ်။

အစ္စရေးလုံခြုံရေးကက်ဘိနတ်က ဗလီဝတ်ကျောင်းတော်မှာ ချထားတဲ့ လုံခြုံရေးဆိုင်ရာပစ္စည်းတွေကို ဘယ်အချိန်မှာ ဖယ်ရှားမလဲဆိုတာကိုတော့ ရဲတပ်ဖွဲ့က ဆုံးဖြတ်မယ်လို့ ဆိုပါတယ်။

အင်္ဂါနေ့က အစ္စရေးလုံခြုံရေးတပ်ဖွဲ့တွေရဲ့ ရာဘာကျည်တွေနဲ့ ပစ်ခတ်မှုအတွင်း ဒဏ်ရာရသူတွေထဲမှာ အလ်-အက်ဆာ ဗလီဝတ်ကျောင်းတော်ရဲ့ ရှေ့ဆောင်အီမာမ်ဖြစ်ပြီး၊ မွတ်စလင်ကောင်စီရဲ့ အကြီးအကဲဖြစ်တဲ့ ရှိခ် အက်ရီမာ ဆဘ်ရီလည်း ပါဝင်ခဲ့ပါတယ်။

မနေ့က အစ္စရေးဝန်ကြီးချုပ် နေတန်ယာဟုဟာ အစ္စရေးလုံခြုံရေးဌာနတွေရဲ့ အကြံပြုချက်တွေကို ရရှိခဲ့ပြီး အချို့ဌာနတွေက ဗလီမှာထားရှိတဲ့ လုံခြုံရေးအဆီးအတားတွေကို ဖယ်ရှားပစ်ဖို့ အကြံပြုခဲ့ပေမယ့် ဂျေရုစလင်ရဲတပ်ဖွဲ့ကတော့ သူတို့ ဆက်ရှိနေမယ်လို့ ဆိုပါတယ်။

လက်ရှိ ဂျေရုစလင်မှာ ထင်ရှားတဲ့ ပါလက်စတိုင်းတက်ကြွလှုပ်ရှားသူ ၁၀ ဦလောက် အဖမ်းခံထားရပြီး ပါလက်စတိုင်းသမ္မတ မဟ်မူးဒ်အဘတ်စ်ရဲ့ ဖာတာပါတီက ဂျေရုစလင်အဖွဲ့ခွဲခေါင်းဆောင်လည်း ဖမ်းဆီးခံရမှုမှာ ပါဝင်ပါတယ်။

ဒေါသများမြင့်တက်

ဆန္ဒပြသူများအား အစ္စရေးရဲတပ်ဖွဲ့ နှိမ်နှင်းမှု

အလ်-အက်ဆာဗလီကို အပိုင်စီးတဲ့သဘောမျိုး ဖြစ်နေတဲ့ အစ္စရေးရဲ့လုပ်ရပ်အတွက် ပါလက်စတိုင်းက ဟားမက်စ်အဖွဲ့နဲ့ ကမ္ဘာ့ခေါင်းဆောင်တွေက ဒီနေ့မှာ အကြီးအကျယ် ဆန္ဒပြဖို့ တိုက်တွန်းထားပါတယ်။

ဗုဒ္ဓဟူးနေ့က ဟားမက်စ်ခေါင်းဆောင် အစ္စမေးလ် ဟာနီယာက အစ္စရေးရဲ့လုပ်ရပ်တွေဟာ ဘောင်ကျော်နေပြီလို့ သတိပေးခဲ့ပါတယ်။

ဒိုဟာအခြေစိုက် နိုင်ငံတကာ မွတ်စလင်ဓမ္မပညာရှင်များအစည်းအရုံးကလည်း အလ်-အက်ဆာဗလီမှာ ၀တ်ပြုသူတွေနဲ့ တစ်သားတည်းရှိကြောင်း ပြသဖို့ ကမ္ဘာတစ်ဝှမ်းက မွတ်စလင်တွေကို တိုက်တွန်းထားပါတယ်။

“ဂျေရုစလင်မှာ ဇိုင်ယွန်တွေရဲ့ လုပ်ရပ်ကို ဆန့်ကျင်တဲ့ သဘောထားကို သောကြာနေ့မှာ ပြသဖို့အတွက် မွတ်စလင်အားလုံးနဲ့ အဲဒီမှာ နေထိုင်သူအားလုံးကို ကျွန်တော်တို့ တိုက်တွန်းပါတယ်” လို့ ဒီအဖွဲ့က ထုတ်ပြန်တဲ့ ကြေငြာချက်မှာ ဖော်ပြခဲ့ပါတယ်။

အခုသီတင်းပတ်အစောပိုင်းကလည်း ဂျေရုစလင်က ထိပ်တန်း မွတ်စလင်ခေါင်းဆောင် မွဖ်သီကြီး မိုဟာမက် ဟူစိန်က ဒီတစ်ပတ်သောကြာနေ့မှာ မြို့တွင်းက ဗလီတွေအားလုံးပိတ်ပြီး အလ်-အက်ဆာဗလီရဲ့ ဂိတ်ပေါက်ဝတွေမှာ သောကြာနေ့ ၀တ်ပြုမှုကို ဆုပေါင်းဝတ်ပြုကြဖို့ တိုက်တွန်းခဲ့ပါတယ်။

နိုင်ငံတကာက ကြားဝင်ရန်

အလ်-အက်ဆာဗလီအား အစ္စရေးက အပိုင်စီးထားမှုကြောင့် ဗလီအပြင်ဘက်တွင် ပါလက်စတိုင်းပြည်သူများ ၀တ်ပြုနေစဉ်

အစ္စရေးဝန်ကြီးချုပ် နေတန်ယာဟုက သူတို့အနေနဲ့ အလ်-အက်ဆာဗလီရဲ့ လက်ရှိအနေအထားကို ပြောင်းလဲလိုတဲ့ဆန္ဒ မရှိဘူးလို့ ပြောထးပေမယ့် ပါလက်စတိုင်းပြည်သူတွေကတော့ သူတို့ပိုင်ဆိုင်တဲ့ အဲဒီနေရာကို အစ္စရေးက သိမ်းယူလိုက်မှာ စိုးရိမ်နေပါတယ်။

ဂျေရုစလင်မှာ တင်းမာမှုတွေ မြင့်တက်လာတာကြောင့် ပါလက်စတိုင်းသမ္မတ မဟ်မူးဒ်အဘတ်စ်ဟာ ဗုဒ္ဓဟူးနေ့က တရုတ်နိုင်ငံကိုသွားမယ့်အစီအစဉ် ဖျက်သိမ်းကာ အနောက်ဖက်ကမ်းကို ပြန်ရောက်လာပါတယ်။

ဒီကိစ္စနဲ့ပတ်သက်ပြီး နိုင်ငံတကာအသိုင်းအ၀ိုင်းက ကြားဝင်ပေးဖို့ကိုလည်း အဘတ်စ်က တိုက်တွန်းဆော်သြထားပါတယ်။

ပါလက်စတိုင်းပိုင် ဂျေရုစလင်မြို့ဟောင်းပြ မြေပုံ

Ref: Aljazeera