အလ်-အက်ဆာဗလီပြန်ရရေး ယနေ့ဆန္ဒပြမှုအတွင်း အနည်းဆုံး ပါလက်စတိုင်း ၂ ဦး အသတ်ခံရ

ဇူလိုင် ၂၁၊ ၂၀၁၇
M-Media

– အလ်-အက်ဆာဗလီအား အစ္စရေးက အပိုင်စီးလိုသည့် လုပ်ရပ်များကို ဆန့်ကျင်သည့် အနေဖြင့် ယနေ့ပြုလုပ်သည့် ပါလက်စတိုင်းများ၏ ဆန္ဒပြမှုအတွင်း အနည်းဆုံး ၂ ဦး သေဆုံးခဲ့သည်ဟု သိရသည်။

အစ္စရေးက သိမ်းပိုက်ထားသည့် ပါလက်စတိုင်းပိုင် အရှေ့ဂျေရုစလင်ရှိ ရက်စ် အလ်-အေမွဒ်ရပ်ကွက်တွင် အသက် ၁၈ နှစ်အရွယ် ပါလက်စတိုင်းတစ်ဦးကို အစ္စရေးအခြေချသူတစ်ဦးက သတ်ဖြတ်ခဲ့ပြီး အစ္စရေး လုံခြုံရေးတပ်ဖွဲ့နှင့် လခြမ်းနီအဖွဲ့တို့ကလည်း ထိုအဖြစ်အပျက်ကို အတည်ပြုခဲ့သည်။

အခြားတစ်ဦးမှာ သောကြာနေ့ဝတ်ပြုမှုအပြီးနောက် ပြုလုပ်သည့် ဆန္ဒပြမှုအတွင်း အစ္စရေးလုံခြုံရေးတပ်ဖွဲ့များ၏ ပစ်ခတ်မှုကြောင့် သေဆုံးခဲ့ခြင်းဖြစ်သည်။

ပြီးခဲ့သည့်တစ်ပတ် သောကြာနေ့က အလ်-အက်ဆာဗလီအပြင်ဘက်ရှိ အစ္စရေးစစ်ဆေးရေးဂိတ်ကို ပါလက်စတိုင်း သေနတ်သမား ၃ ဦးက တိုက်ခိုက်မှုအတွင်း အစ္စရေးရဲတပ်ဖွဲ့ဝင် ၂ ဦး သေဆုံးခဲ့ပြီး၊ အပြန်အလှန်ပစ်ခတ်မှုကြောင့် သေနတ်သမား ၃ ဦးလည်း သေဆုံးခဲ့သည်။

ထိုနောက်ပိုင်းတွင် အစ္စရေးက သောကြာနေ့ဝတ်ပြုမှုကို ပိတ်ပင်ကာ၊ အလ်-အက်ဆာဗလီကိုလည်း ပိတ်ပစ်ခဲ့သည်။ ပြီးခဲ့သည့် တနင်္ဂနွေနေ့မှစ၍ ဗလီကို ပြန်လည်ဖွင့်ပေးခဲ့သော်လည်း သတ္တုရှာဖွေရေးစက်များ၊ ကင်မရာများကဲ့သို့ လုံခြုံရေးဆောင်ရွက်မှုများ တင်းကြပ်စွာပြုလုပ်ခဲ့ပြီး ပါလက်စတိုင်းများကမူ အလ်-အက်ဆာဗလီဝတ်ကျောင်းတော်၏ မူလအခြေအနေကို ပြောင်းလဲကာ အပိုင်စီးသည့်လုပ်ရပ်ဟု ယူဆခဲ့သည်။

ထို့ကြောင့် နေ့စဉ် ဆန္ဒပြခဲ့ကြပြီး ယနေ့ သောကြာဝတ်ပြုမှုအပြီးအတွင် လူထောင်သောင်းချီပါဝင်သည့် ကြီးမားသည့် ဆန္ဒပြမှုကြီးကို ပြုလုပ်ခဲ့ကာ အစ္စရေးတပ်ဖွဲ့များက ကျည်အစစ်များ၊ မျက်ရည်ယိုဗုံးများ၊ ရာဘာကျည်ဆံများဖြင့် ပစ်ခတ်နှိပ်နှင်းခဲ့သည်။

ပါလက်စတိုင်း လခြမ်းနီအဖွဲ့က ထိုနှိမ်နင်းမှုအတွင်း အနည်းဆုံး ပါလက်စတိုင်းပြည်သူ ၁၄၀ ဒဏ်ရာရရှိခဲ့သည်ဟု အတည်ပြုခဲ့သည်။

ယခုနောက်ဆုံးရရှိသည့် သတင်းများအရ သေဆုံးသူအရေအတွက်မှာ ၃ ဦးအထိ ရှိလာပြီဟု ပါလက်စတိုင်းအာဏာပိုင်များက သတင်းထုတ်ပြန်ခဲ့သည်။

Ref: Aljazeera