ဗလီထဲမ၀င်ရသည့်အတွက် အပြင်တွင်ဝတ်ပြုနေသည့် ပါလက်စတိုင်းတစ်ဦးကို အစ္စရေးစစ်သားက ကန်ကျောက်

ဇူလိုင် ၂၂၊ ၂၀၁၇
M-Media

– ပါလက်စတိုင်းပိုင် အရှေ့ဂျေရုစလင်က အလ်-အက်ဆာ ဗလီဝတ်ကျောင်းတော်ကို အစ္စရေးရဲ့ သိမ်းပိုက်လိုတဲ့ လုပ်ရပ်တွေကို မကျေနပ်လို့ မနေ့က ဆန္ဒပြမှုအတွင်း ဗလီဝတ်ကျောင်းတော်အပြင်ဘက်မှာ ၀တ်ပြုနေတဲ့ ပါလက်စတိုင်းတစ်ဦးကို အစ္စရေးရဲတပ်ဖွဲ့က ပြင်းပြင်းထန်ထန် ကန်ကျောက်ခဲ့တာဖြစ်ပါတယ်။

ပြီးခဲ့တဲ့သောကြာနေ့က အလ်-အက်ဆာ ဗလီအပြင်ဘက် အစ္စရေးစစ်ဆေးရေးဂိတ်မှာ ပါလက်စတိုင်း ၃ ဦးက ပစ်ခတ်မှုတွေ ပြုလုပ်ခဲ့တာကြောင့် အစ္စရေးရဲတပ်ဖွဲ့ဝင် ၂ ဦး သေဆုံးခဲ့ပြီး၊ ပါလက်စတိုင်း သေနတ်သမားတွေလည်း အပြန်အလှန်ပစ်ခတ်မှုအတွင်း သေဆုံးခဲ့ပါတယ်။

အဲဒီနောက်ပိုင်းမှာ အစ္စရေးက သောကြာနေ့ဝတ်ပြုမှုကို ပိတ်ပင်ကာ ဗလီဝတ်ကျောင်းတော်ကို ပိတ်ပစ်ခဲ့ပါတယ်။ ဒီလုပ်ရပ်ကြောင့် အာရပ်နိုင်ငံတွေနဲ့ ကမ္ဘာတစ်ဝှမ်းက ရှုတ်ချမှုတွေ ရှိလာတာကြောင့် တနင်္ဂနွေနေ့မှာ ဗလီကို ပြန်ဖွင့်ပေးခဲ့ပေမယ့် သတ္တုရှာဖွေရေးစက်တွေ၊ လုံခြုံရေးကင်မရာတွေ မြောက်များစွာ တပ်ဆင်ခဲ့ပြီး ပါလက်စတိုင်းတွေကတော့ ဒါကို လက်မခံတဲ့အတွက် ဆန္ဒပြမှုတွေပြုလုပ်ခဲ့ကာ အစ္စရေးလုံခြုံရေးတပ်ဖွဲ့တွေကလည်း ပြင်းပြင်းထန်ထန် နှိမ်နင်းခဲ့ပြီး ဒဏ်ရာရှိသူတွေ တော်တော်များများ ရှိခဲ့ပါတယ်။

မနေ့က သောကြာနေ့ဝတ်ပြုမှုအတွက်လည်း အလ်-အက်ဆာ ဗလီဝတ်ကျောင်းတော်အတွင်း အသက် ၅၀ အောက် အမျိုးသားတွေကို အစ္စရေးက ၀င်ခွင့်မပြုတဲ့အတွက် ပါလက်စတိုင်းပြည်သူတွေဟာ ဗလီအပြင်ဘက်မှာ ၀တ်ပြုခဲ့ရပါတယ်။

ဝတ်ပြုမှုအပြီးမှာ အစ္စရေးရဲ့ အလ်-အက်ဆာဗလီကို အပိုင်စီးလိုတဲ့လုပ်ရပ်ကို မကျေနပ်တဲ့အတွက် ပါလက်စတိုင်းတွေက အကြီးအကျယ် ဆန္ဒပြခဲ့ပြီး အစ္စရေးလုံခြုံရေးတပ်ဖွဲ့တွေရဲ့ ပစ်ခတ်မှုနဲ့ ဂျူး အခြေချနေထိုင်သူတွေရဲ့ သတ်ဖြတ်မှုကြောင့် ပါလက်စတိုင်း ၃ ဦး သေဆုံးခဲ့ပါတယ်။

စနေနေ့မနက်မှာ ပါလက်စတိုင်းပိုင်နက် အနောက်ဖက်ကမ်းက အစ္စရေးရဲ့ တရားမ၀င်အခြေချနေအိမ်ယာမှာ နေထိုင်သူတွေကို ပါလက်စတိုင်းတစ်ချို့က ဓားနဲ့လိုက်ထိုးတာကြောင့် ၃ ဦး သေဆုံးခဲ့ပါတယ်။