ကနေဒါရှိ ဟိန္ဒူဘုရားကျောင်း ၁၀ နှစ်ပြည့်အခမ်းအနားသို့ ၀န်ကြီးချုပ် တက်ရောက်ချီးမြှင့်

ဇူလိုင် ၂၄၊ ၂၀၁၇
M-Media

– တိုရွန်တိုအခြေစိုက် ဟိန္ဒူဘုရားကျောင်း BAPS Shri Swaminarayan Mandir ရဲ့ ၁၀ နှစ်ပြည့် နှစ်ပတ်လည် အထိမ်းအမှတ် အခမ်းအနားကို မနေ့က ကျင်းပပြုလုပ်ခဲ့ပြီး ကနေဒါဝန်ကြီးချုပ် ဂျက်စတင် ထရူဒူ တက်ရောက်ချီးမြှင့်ခဲ့ပါတယ်။

ထရူဒူဟာ အိန္ဒိယရိုးရာဝတ်စုံ ကုရ်သာအပြာနဲ့ ပဂျာမားကို ၀တ်ဆင်ကာ ပန်းကုံးကို လည်ပင်းမှာစွပ်ပြီး ဟိန္ဒူဘာသာဝင်တွေရဲ့ ၀တ်ပြုဆုတောင်းမှုမှာ ပါဝင်ခဲ့ပါတယ်။ အဲဒီအခမ်းအနားကို တိုရွန်တို မြို့တော်ဝန် ဂျွန်တိုရီ၊ ကနေဒါနိုင်ငံဆိုင်ရာ အိန္ဒိယသံအမတ် ဗီကက်စ် ဆွာရပ်တို့လည်း တက်ရောက်ခဲ့ကြပါတယ်။

BAPS အဖွဲ့ဟာ ဟိန္ဒူဘာသာရဲ့ ဂိုးဏ်ခွဲတစ်ခုဖြစ်တဲ့ Swaminarayan က နိုင်ငံတကာ ဘာသာရေးနဲ့ လူမှုရေးဆိုင်ရာ အဖွဲ့အစည်းတစ်ခု ဖြစ်ပါတယ်။

Shri Swaminarayan Mandir ဘုရားကျောင်းဟာ တိုရွန်တိုရဲ့ ကလိုင်ရီဗီလီဒရိုက်ဗ်ဒေသမှာရှိပြီး သက်တမ်းကတော့ ၁၀ နှစ်ရှိပြီ ဖြစ်ပါတယ်။

“ကျွန်တော်တို့တိုင်းပြည်ရဲ့ အကြီးဆုံး Pearson International လေယာဉ်ကွင်းကနေတစ်ဆင့် ကနေဒါကို လာရောက်ကြတဲ့ ဧည့်သည်တွေ ကနေဒါမှာ ပထမဆုံးမြင်လိုက်ရတဲ့ မြင်ကွင်းတွေထဲက တစ်ခုဟာ အဝေးပြေးလမ်း ၄၂၇ က ဒီဘုရားကျောင်းကြီး ဖြစ်နေတာက ဘယ်လောက်တောင် အံ့ဖွယ်ကောင်းပြီး၊ လိုက်ဖက်သလဲဗျာ။ ကျွန်တော်ဆိုရင် ဒီထက်ပိုပြီး ဂုဏ်ယူစရာမျိုး မရှိတော့ပါဘူး” လို့ ကနေဒါဝန်ကြီးချုပ်က ဘုရားကျောင်းမိန့်ခွန်းမှာ ထည့်သွင်းပြောဆိုခဲ့ပါတယ်။

BAPS ကမ္ဘာတစ်ဝှမ်းမှာ ကွန်ရက်ပေါင်း ၃၈၅၀ အထိ ဖြန့်ကျက်ထားပြီး အကူအညီပေးရေးလုပ်ငန်းတွေ လုပ်ဆောင်နေကာ ကုလအပါအ၀င် နိုင်ငံတကာက လူသားချင်း စာနာထောက်ထားမှုဆိုင်ရာ ဂုဏ်ပြုဆုတွေကိုလည်း ရရှိထားပါတယ်။

Ref : Hindustantimes