အာဖဂန်နှင့် ပါကစ္စတန်တို့တွင် အသေခံဗုံးခွဲတိုက်ခိုက်မှုများ ဖြစ်ပွား

ဇူလိုင် ၂၄၊ ၂၀၁၇
M-Media

– အာဖဂန်နစ္စတန်နိုင်ငံ ကဘူးလ်မြို့နှင့် ပါကစ္စတန်နိုင်ငံ လာဟိုးရ်မြို့တို့၌ ယနေ့တွင် ဗုံးခွဲတိုက်ခိုက်မှုများ ဖြစ်ပွားခဲ့သောကြောင့် လူအများအပြား သေဆုံးခဲ့သည်ဟု သိရသည်။

ကဘူးလ်မြို့တွင် အစိုးရ ရေနံနှင့် သတ္ထုတွင်းဝန်ကြီးဌာနမှ လုပ်သားများ တင်ဆောင်လာသည့် ဘတ်စ်ကားမှာ အသေခံ ကားဗုံးဖြင့် တိုက်ခိုက်ခံခဲ့ရပြီး အနည်းဆုံး ၃၅ ဦး သေဆုံးခဲ့သည်။ ယနေ့မနက် ၇ နာရီခန့်တွင် ဖြစ်ပွားသော အဆိုပါ တိုက်ခိုက်မှုအတွက် တာလီဘန်က ၎င်းတို့လက်ချက်ဖြစ်သည်ဟု ကြေငြာခဲ့သည်။

တိုက်ခိုက်မှုကြောင့် ဘတ်စ်ကားအပါအ၀င် အခြားကားများ၊ ပတ်ဝန်းကျင်ရှိဆိုင်များ ပျက်ဆီးခဲ့ကြောင်း ဒဏ်ရာရသူများတွင် ကလေးများ ပါဝင်ကြောင်း ကဘူးလ်ရဲတပ်ဖွဲ့အကြီးအကဲ ဘဆီရ် မူဂျာဟစ်က ပြောကြားခဲ့သည်။ သေဆုံးဒဏ်ရာမှုစာရင်းမှာ တိုးလာဖွယ်ရှိနေသည်။

ပြီးခဲ့သည့်နှစ် ဇူလိုင်လ ၂၃ ရက်နေ့က ကဘူးလ်မြို့ရှိ ဟာဇရာရပ်ကွက်တွင် အသေခံဗုံးခွဲမှုတစ်ခုကြောင့် လူ ၈၀ ကျော် သေဆုံးခဲ့ပြီး ထိုတိုက်ခိုက်မှုအတွက် ယနေ့တွင် ဆန္ဒပြရန် စီစဉ်နေစဉ် ထိုနေရာ၌ပင် တိုက်ခိုက်မှု ထပ်မံ ဖြစ်ပွားခဲ့ခြင်းဖြစ်သည်။

လာဟိုးရ် ပေါက်ကွဲမှု

ပါကစ္စတန်နိုင်ငံ လာဟိုးရ်မြို့ရှိ Lahore Technology Park အနီး ယနေ့မနက်ပိုင်းတွင် ဖြစ်ပွားသော ပေါက်ကွဲမှုကြောင့် အနည်းဆုံး ၂၅ ဦး သေဆုံခဲ့ပြီး ၅၃ ဦး ဒဏ်ရာရရှိခဲ့သည်။

ရဲတပ်ဖွဲ့ တာဝန်ရှိသူတစ်ဦးက အဆိုပါအဖြစ်အပျက်မှာ အသေခံဗုံးခွဲမှု ဖြစ်နိုင်ပြီး သေဆုံးသူများတွင် ရဲတပ်ဖွဲ့များလည်း ပါဝင်ကြောင်း ပြောကြားခဲ့သည်။

ဧပြီလကလည်း လာဟိုးရ်မြို့တွင် သန်းခေါင်စာရင်းကောက်ယူသည့် ၀န်ထမ်းများကို တင်ဆောင်လာသော ကားတစ်စီး အသေခံဗုံးခွဲခံရမှုကြောင့် အနည်းဆုံး လူ ၆ ဦး သေဆုံးခဲ့သည်။

လာဟိုးရ်မြို့လယ်ကောင်တွင် ယခုနှစ် ဖေဖော်ဝါရီလအတွင်းက ပြုလုပ်သော ဆန္ဒပြမှုတွင် လုံခြုံရေးယူပေးထားသည့် ရဲတပ်ဖွဲ့ဂိတ်ကို ပစ်မှတ်ထားသော အသေခံဗုံးခွဲမှုတစ်ခု ဖြစ်ပွားခဲ့ပြီး အနည်းဆုံး ၁၃ ဦးသေဆုံးခဲ့သည်။

Ref: Aljazeera