နိုင်ငံတစ်ဝှမ်း ဟာလာလ်စားသောက်ဆိုင်များ ထပ်တိုးဖွင့်လှစ်ရန် တောင်ကိုရီးယား စီစဉ်

ဇူလိုင် ၂၆၊ ၂၀၁၇
M-Media

တောင်ကိုရီးယားနိုင်ငံ ဆိုးလ်မြို့မှ ဂျာမေ ဗလီဝတ်ကျောင်းတော်

– မွတ်စလင်ခရီးသွားများ အစားအသောက်အဆင်ပြေစေရန်အတွက် တောင်ကိုရီးယား ခရီးသွားလာရေးအဖွဲ့ (KTO) မှ ဦးဆောင်ကာ နိုင်ငံတစ်ဝှမ်းတွင် စားသောက်ဆိုင်သစ် ၁၁၇ ခု ဖွင့်လှစ်သွားမည်ဟု သိရသည်။

လက်ရှိတွင် တောင်ကိုရီးယား၌ မွတ်စလင်ခရီးသွားများ စားသောက်နေထိုင်ရန် အဆင်ပြေစေမည့်နေရာ စုစုပေါင်း ၂၅၂ ခု ရှိနေသည်။

“မွတ်စလင်တွေအတွက် အဆင်ပြေစေမယ့် စားသောက်ဆိုင်တွေကို စစ်ဆေးသတ်မှတ်တဲ့ လုပ်ငန်းစဉ်ဟာ KTO က ဆောင်ရွက်နေတဲ့ စီမံကိန်းတစ်ခုဖြစ်ပြီး ကိုရီးယားကို ရောက်လာတဲ့ မွတ်စလင်ခရီးသွားတွေ စိုးရိမ်မှုမရှိဘဲ အစားအသောက်တွေကို သုံးဆောင်နိုင်ဖို့ ဖြစ်ပါတယ်” ဟု KTO က ပြောကြားခဲ့သည်။

KTO မှာ ဟာလာလ်လက်မှတ်ရ စားသောက်ဆိုင်၊ ကိုယ်ပိုင်ကြေငြာထားသော စားသောက်ဆိုင်၊ မွတ်စလင်များနှင့် သင့်လျော်သည့် စားသောက်ဆိုင်၊ ၀က်သားမရောင်းသည့် စားသောက်ဆိုင် စသဖြင့် အဆင့် ၄ ခု သတ်မှတ်ထားသည်။

ဟာလာလ်အစားသောက်သာ သီးသန့်ရောင်းသည့်ဆိုင်များမှာ နိုင်ငံရပ်ခြား ဟာလာလ်အသိအမှတ်ပြုလက်မှတ် ထုတ်ပေးရေးအဖွဲ့မှာ လက်မှတ်များကို လျှောက်ထားရယူထားကြသည်။

ဆိုင်ရှင်က ၎င်းတို့ဆိုင်ရှိ စားသောက်ဖွယ်ရာများ ဟာလာလ်ဖြစ်သည်ဟု ကြေငြာရောင်းချသော စားသောက်ဆိုင်များကို ကိုယ်ပိုင်ကြေငြာထားသော စာသောက်ဆိုင်အဖြစ် သတ်မှတ်ပြီး၊ မွတ်စလင်များနှင့် သင့်လျော်သည့်စားသောက်ဆိုင်များမှာ ၎င်းတို့၏ ဟင်းလျာများတွင် ဟာလာလ်အစားအသောက်များကို ထည့်သွင်းပေးထားခြင်းဖြစ်ပြီး ထိုဆိုင်တွင် ဟာလာလ်မဟုတ်သော အစားအစာများကိုလည်း ရရှိနိုင်သည်။

ဝက်သားမရောင်းသည့် စားသောက်ဆိုင်မှာ ၎င်းတို့၏ဟင်းလျာများတွင် ၀က်သားမသုံးခြင်းဖြစ်သည်။

ယခု ဖွင့်လှစ်ရန် ပြင်ဆင်နေသည့် စားသောက်ဆိုင် ၁၁၇ ခုတွင် ၇၅ ရာခိုင်နှုန်းမှာ ကျေးလက်ဒေသများတွင်ဖြစ်ပြီး နိုင်ငံတစ်ဝှမ်း နေရာမရွေး ဟာလာလ်အစားအသောက်များ ရရှိရန် ရည်ရွယ်ခြင်းဖြစ်သည်။

လာမည့် စက်တင်ဘာနှင့် အောက်တိုဘာ ၂ လတွင် ‘ဟာလာလ် စားသောက်ဆိုင် သီတင်းပတ်’ လှုပ်ရှားမှုတစ်ခုကို ပြုလုပ်မည်ဟု KTO က ကြေငြာထားပြီး နာမည်ကြီး စာဖိုမှူးများကို ဖိတ်ခေါ်ကာ ကိုရီးယားနိုင်ငံတစ်ဝှမ်းရှိ မွတ်စလင်များနှင့် သင့်လျော်သော စားသောက်ဆိုင်များတွင် အစားအသောက်များ ချက်ပြုတ်ပြင်ဆင်ပေးသွားမည်ဖြစ်သည်။

Ref: Jakarta Post