အင်ဒိုကဆောက်ပေးသည့် ရခိုင်ပြည်နယ်က ဆေးရုံသစ် နားလည်မှု ပိုမိုရရှိရေး ရည်မှန်း

ဇူလိုင် ၃၀၊ ၂၀၁၇
M-Media

(RFA မှ ကူးယူဖော်ပြပါသည်)

– ရခိုင်ပြည်နယ်မှာ အင်ဒိုနီးရှားနိုင်ငံက ဆောက်လုပ်လှူဒါန်းမယ့် ဆေးရုံသစ်အတွက် တာဝန်ထမ်းဆောင်မယ့် မြန်မာပြည်က ဆရာဝန်တွေကို အင်ဒိုနီးရှားမှာရှိတဲ့ ဆေးရုံတချို့မှာ ဦးစွာပထမ လေ့ကျင့်သင်ကြားပေးမယ်လို့ မနေ့က သတင်းရပါတယ်။

အဲဒီဆေးရုံကို ဆောက်လုပ်လှူဒါန်းမယ့် (MERC) လို့ အတိုကောက်ခေါ်တဲ့ (Medical Emergency Rescue Committee) အရေးပေါ်ကယ်တင်ကုသပေးရေး ကော်မတီ က မြန်မာဆရာဝန်တွေကို လက်ခံသင်ကြားပေးဖို့ လတ်တလောမှာ ဆေးရုံ ၂ ခုက သဘောတူထားကြောင်း နဲ့ အဲဒီ ဆေးရုံတွေမှာ အင်ဒိုနီးရှားနိုင်ငံအနှံ့က ရောက်ရှိလာကြတဲ့ လူနာအားလုံးကို တိုင်းရင်းသား လူမျိုးဘာသာမခွဲခြားပဲ တန်းတူရည်တူဆက်ဆံ ကုသမှုပေးနေပုံကို မြန်မာ ဆရာဝန်တွေ လေ့လာသင်ယူနိုင်ကြမှာ ဖြစ်ကြောင်း ပြောပါတယ်။

အခုလို မြန်မာဆရာဝန်တွေကို အင်ဒိုနီးရှားမှာ လေ့လာသင်ကြားပေးဖို့နဲ့ မိမိတို့ နိုင်ငံက ဆရာဝန်တွေကိုလည်း မြန်မာနိုင်ငံမှာ လာရောက်ကုသပေးဖို့ မြန်မာအစိုးရက ပြောဆိုခဲ့ကြောင်း၊ ရခိုင်ပြည်နယ်က ဆေးရုံကိုလည်း ဗုဒ္ဓဘာသာနဲ့ မွတ်စလင် အသိုင်းအဝန်း ၂ ခုလုံးက ပြည်သူတွေကို တန်းတူရည်တူ ကုသပေးဖို့အတွက် တည်ဆောက်လှူဒါန်းမှာဖြစ်ကြောင်း MERC အင်ဒိုနီးရှားအဖွဲ့က ပြောပါတယ်။

အဲဒီ ဆေးရုံကို မောင်းဘွဲ့ရွာက ကုဗမီတာ ၇ဝဝဝ ကျော်ကျယ်ဝန်းတဲ့မြေကွက်လပ်မှာ လာမယ့် စက်တင်ဘာလ စတင်တည်ဆောက်မှာဖြစ်ပြီး ၂ဝ၁၈ နှစ်ဦးပိုင်းမှာ ပြီးစီးမယ်လို့ မျှော်လင့်ထားပါတယ်။ အင်ဒိုနီးရှား ရူပီးယားငွေ ၂၅ ဘီလီယံ သို့မဟုတ် အမေရိကန် ဒေါ်လာ ၁၉ သိန်းနီးပါး ကုန်ကျမယ်လို့ ခန့်မှန်းထားပါတယ်။

MERC အဖွဲ့ဟာ ပါလက်စတိုင်း ဂါဇာဒေသမှာ အလားတူ ဆေးရုံတရုံ ဆောက်လုပ်လှူဒါန်းခဲ့ဖူးပါတယ်။ လူမျိုးဘာသာမတူတဲ့ အသိုင်းအဝန်း၂ ခုအကြား ပဋိပက္ခဖြစ်ပွားနေတဲ့ဒေသမှာ တင်းမာမှုလျှော့ပါးပြီး နားလည်မှုတွေ ပိုမိုရရှိလာနိုင်တယ်လို့ ဆိုပါတယ်။

(Photo Credit – MER-C Indonesia)