တောင်အာဖရိကရှိ ကမ္ဘာ့ဖလားကွင်းတွင် လူတိုးမှုကြောင့် ၂ ဦးသေဆုံး

ဇူလိုင် ၃၀၊ ၂၀၁၇
M-Media

– တောင်အာဖရိကရှိ ၂၀၁၀ ကမ္ဘာ့ဖလားဗိုလ်လုပွဲ ကျင်းပရာ ဘောလုံးကွင်းတွင် ယမန်နေ့က ပရိတ်သတ်များ တိုးဝှေ့မှုကြောင့် လူ ၂ ဦး သေဆုံးခဲ့သည်ဟု တာဝန်ရှိသူများက ပြောကြားခဲ့သည်။

နိုင်ငံ၏ နာမည်ကျော် ကလပ်အသင်းနှစ်ခုဖြစ်ပြီး မြို့ခံပြိုင်ဘက်များဖြစ်သော Kaizer Chiefs နှင့် Orlando Pirates အသင်းတို့၏ ရာသီအကြိုပွဲအဖြစ် ကစားရာတွင် ဂျိုဟန်နစ္စဘတ်တောင်ပိုင်းရှိ အဆိုပါဘောလုံးကွင်းသို့ နှစ်ဖက်ပရိတ်သတ်များ တိုးဝှေ့ဝင်ရောက်ရာမှ ယခုကဲ့သို့ လူသေဆုံးသည်အထိ ဖြစ်ပွားခဲ့ခြင်းဖြစ်သည်။

ထိုအဖြစ်အပျက်တွင်း အခြားသူများလည်း ဒဏ်ရာရရှိခဲ့ပြီး ရဲတပ်ဖွဲ့ကမူ စုံစမ်းစစ်ဆေးမှုများကို ပြုလုပ်နေသည်။

ဘောလုံးသတင်းများကို တင်ဆက်ပေးနေသော KickOff ၀ဘ်ဆိုက်က ပြိုင်ပွဲ၏ စပွန်ဆာ Carling Black Label ကုမ္ပဏီက လူတိုးမှုအတွင်း ၂ ဦးသေဆုံးကြောင်း ၁ ဦးမှာ ပြင်းပြင်းထန် ဒဏ်ရာရရှိခဲ့ပြီး အခြား ၁၆ ဦးမှာ အသေးစားဒဏ်ရာများ ရရှိခဲ့ကြောင်း အတည်ပြုခဲ့သည်ဟု ဖော်ပြခဲ့သည်။

ပွဲကိုမူ စီစဉ်ထားသည့်အတိုင်း ကစားခဲ့ပြီး Kaizer Chiefs က ၁ ဂိုး ဂိုးမရှိဖြင့် အနိုင်ရခဲ့သည်။ တောင်အာဖရိကဘောလုံးအဖွဲ့ချုပ် SAFA က ထိုဆိုးရွားသောအဖြစ်အပျက်အတွက် ၀မ်းနည်းမိသည်ဟု ပြောကြားခဲ့သည်။

ယခင်က အဆိုပါကလပ်အသင်းနှစ်ခု ကစားသောပွဲများတွင် ဘောလုံးဖြစ်ရပ်ဆိုးနှစ်ခု ဖြစ်ပွားခဲ့ဖူးပြီး ၂၀၀၁ ခုနှစ်တွင် ၄၃ ဦး သေဆုံးခဲ့ကာ ၁၉၉၁ ခုနှစ်တွင် ၄၂ ဦးအထိ သေဆုံးခဲ့သည်။

Ref: Aljazeera