လူနည်းစုကို မကာကွယ်ပေးသည့် ရဲတပ်ဖွဲ့နှင့် အစိုးရကို အာဖဂန်ပြည်သူများ ဆန္ဒပြ

သြဂုတ် ၂၊ ၂၀၁၇
M-Media

ယနေ့ဈာပနအခမ်းအနားကို တက်ရောက်ခဲ့သည့် ရှီအာပြည်သူများ

– မနေ့က ရှီအာဗလီဝတ်ကျောင်းတော်မှာ ဖြစ်ပွားခဲ့တဲ့ အသေခံဗုံးခွဲတိုက်ခိုက်မှုမှာ သေဆုံးသွားကြသူတွေကို ဒီနေ့ မြှုပ်နှံမှုအပြီး အာဖဂန်ပြည်သူတွေက ဆန္ဒပြမှုတွေ ပြုလုပ်ခဲ့ပါတယ်။

နိုင်ငံအနောက်ပိုင်း ဟီရတ်ပြည်နယ် ဟီရတ်မြို့မှာ ဖြစ်ပွားခဲ့တဲ့ ဒီတိုက်ခိုက်မှုဟာ ၄၈ နာရီအတွင်း အာဖန်မှာ ဖြစ်ပွားခဲ့တဲ့ တိုက်ခိုက်မှုတွေထဲက တစ်ခုဖြစ်ပြီး အနည်းဆုံး ရှီအာဝတ်ပြုသူ ၂၉ ဦး သေဆုံးခဲ့ပါတယ်။

သေဆုံးသွားသူတွေကို ဒီနေ့မှာ မြှုပ်နှံသင်္ဂြီုဟ်ပြီးနောက်ပိုင်းမှာ လူနည်းစုတွေကို ကာကွယ်မပေးနိုင်တဲ့ ရဲတပ်ဖွဲ့နဲ့ လုံခြုံရေးတပ်ဖွဲ့တွေကို ပြည်သူတွေက ဆန္ဒပြခဲ့ကြပါတယ်။

ဗလီဝတ်ကျောင်းတော်အတွင်း ဖောက်ခွဲမှု မပြုလုပ်ခင်မှာ သေနတ်သမား ၂ ဦးဟာ ဗလီဝတ်ကျောင်းတော် အပြင်ဘက်က လုံခြုံရေးအစောင့် ၂ ယောက်ကို ပစ်သတ်ခဲ့ပြီး နောက်ပိုင်းမှာ ဗလီအတွင်းက ၀တ်ပြုသူတွေကိုလည်း ပစ်ခတ်ခဲ့ပါတယ်။

ဟီရတ်ပြည်နယ် အုပ်ချုပ်ရေးမှူး ဂျီလာနီ ဖာရ်ဟဒ်က ဒဏ်ရာရသူတွေဟာ ၆၀ ကျော်လောက် ရှိတဲ့အတွက် သေဆုံးသူအရေအတွက် တိုးလာမယ်ဆိုတဲ့ စိုးရိမ်မှုတွရှိနေတယ်လို့ ပြောကြားခဲ့ပါတယ်။

ပစ်ခတ်မှုကို ကိုယ်တိုင်မြင်တွေ့ခဲ့ရတဲ့ တက်ကြွလှုပ်ရှားသူ မိုဟာမက် ဂျာဝဒ် အေမစ်က ရဲတပ်ဖွဲ့နဲ့ အစောင့်တွေဟာ သေနတ်သမားတွေကို တုန့်ပြန်ပစ်ခတ်တာမျိုး မရှိဘူးလို့ ဆိုပါတယ်။

“လူတွေက အော်ပြီး၊ ပြေးကြတယ်။ အကြည့်တွေအားလုံးက ရဲတပ်ဖွဲ့နဲ့ အစောင့်တွေဆီရောက်သွားပါတယ်။ သူတို့ကတော့ ပြန်မပစ်ပါဘူး။ အမိန့်မရလို့မပစ်တာလို့ သူတို့က ပြောပါတယ်။ ရဲဆိုရင် အခင်းဖြစ်တဲ့နေရာက ထွက်ပြေးသွားပါတယ်” လို့ အေမစ်က ပြောကြားခဲ့ပြီး သေနတ်သမား ၄ ယောက်မှာ ၂ ယောက်က ထွက်ပြေးလွတ်မြောက်သွားတယ်လို့ ဆိုပါတယ်။

တိုက်ခိုက်မှုဖြစ်ပွားပြီးတဲ့နောက်ပိုင်းမှာ ဟီရတ်မြို့သားတွေဟာ ရဲတပ်ဖွဲ့ရဲ့ တုန့်ပြန်မှု အားနည်းတာကို မကျေနပ်တဲ့အတွက် ဆန္ဒပြမှုတွေ ပြုလုပ်ခဲ့ပြီး ထိပ်တိုက်တွေ့ဆုံမှုတွေဖြစ်ခဲ့ကာ၊ ရဲကင်းတွေလည်း မီးရှို့ခံခဲ့ရပါတယ်။

ဒီနေ့ပြုလုပ်ခဲ့တဲ့ ချီတက်ဆန္ဒပြမှုမှာ ပြည်သူတွေက လူနည်းစုတွေကို ပိုမိုကာကွယ်ပေးဖို့ တောင်းဆိုခဲ့ကြပြီး၊ ဆန္ဒပြပွဲကို ဦးစီးခဲ့တဲ့ ဂျာဝဒ်က ဒီချီတက်မှုမှာ ရှီအာနဲ့ စွန်နီမွတ်စလင်တွေ အတူပါဝင်ခဲ့တယ်လို့ ပြောပါတယ်။ အစိုးရကတော့ လုံခြုံရေးကို ထူထပ်စွာ ချထားခဲ့ပါတယ်။

“ဟီရတ်က စည်းလုံးပါတယ်။ ဒဏ်ရာရသူတွေကို ဆေးရုံပို့တဲ့အခါ စွန်နီမွတ်စလင်တွေ တော်တော်များများက လိုအပ်တဲ့သွေးကို လှူဒါန်းခဲ့ပါတယ်။ လူတိုင်းက စိတ်ဆိုးနေကြတာဗျ။ ရှီအာ၊ စွန်နီဆိုတာတွေကို အခုအချိန်မှာ ဘယ်သူမှ ဂရုမစိုက်ဘူး။ ဒီအကြမ်းဖက်သမားတွေက ကျွန်တော်တို့အားလုံးကို ပစ်မှတ်ထားနေတာ”

ရှီအာဗလီဝတ်ကျောင်းတော်ကို တိုက်ခိုက်မှုအတွက် ဘယ်အဖွဲ့ကမှ တာဝန်မယူသေးပေမယ့် တနင်္လာနေ့က မြို့တော်ကဘူးလ်မှာ ဖြစ်ပွားခဲ့ပြီး အာဖဂန် လုံခြုံရေးအစောင့် ၂ ဦး သေဆုံးခဲ့တဲ့ အီရတ်သံရုံးတိုက်ခိုက်မှုဟာ သူတို့လက်ချက်ဖြစ်တယ်လို့ IS က ပြောဆိုခဲ့ပါတယ်။

ဒီနေ့မနက် ကန်ဒါဟာမှာဖြစ်ပွားခဲ့တဲ့ တိုက်ခိုက်မှုကို တာလီဘန်က သူတို့လုပ်တာဖြစ်ကြောင်း ပြောကြားခဲ့ပါတယ်။ မနေ့က ဟဲလမန်ပြည်နယ်နဲ့ ပက်တီယာပြည်နယ်တွေမှာလည်း တိုက်ခိုက်မှုတွေ ဖြစ်ပွားခဲ့ပါတယ်။

Ref: Aljazeera