ဘာကာတိုက်စစ်မှူး နေးမာ ပီအက်စ်ဂျီသို့ ရောက်ပြီ

သြဂုတ် ၄၊ ၂၀၁၇
M-Media

ကမ္ဘာ့ ပြောင်းရွှေ့ကြေးအမြင့်ဆုံး ကစားသမားများ

– ဘာစီလိုနာအသင်း၏ ဘရာဇီးလ်တိုက်စစ်မှူး နေးမာမှာ ပီအက်စ်ဂျီအသင်းနှင့် ၅ နှစ်တာ စာချုပ်ကို မနေ့က အပြီးသတ်ချုပ်ဆိုနိုင်ခဲ့ပြီး ၎င်းအား ခေါ်ယူရာတွင် ကုန်ကျခဲ့သည့် ယူရို ၂၂၂ သန်းမှာ ကမ္ဘာ့စံချိန်တင် ပြောင်းရွှေ့ကြေးလည်း ဖြစ်ခဲ့သည်။

ပီအက်စ်ဂျီမှ ထုတ်ပြန်သော ကြေငြာချက်တွင် နေးမာမှာ ၂၀၂၂ ခုနှစ်အထိ အသင်းတွင် ရှိမည်ဖြစ်ပြီး တစ်ပတ်လျှင် အခွန်လွတ်လစာငွေ ယူရို ၅၅၀၀၀၀ ၀န်းကျင် ရရှိမည်ဖြစ်ကြောင်း၊ စနေနေ့တွင် ပရိတ်သတ်များနှင့် မိတ်ဆက်ပေးသွားမည်ဖြစ်ကြောင်း ဖော်ပြခဲ့သည်။

“ပီအက်စ်ဂျီအသင်းကို ပြောင်းရွှေ့ရတဲ့အတွက် ကျွန်တော် အလွန်အမင်း ပျော်ရွှင်မိပါတယ်။ ကျွန်တော် ဥရောပစရောက်တည်းက ဒီအသင်းဟာ အမြဲတမ်း ယှဉ်ပြိုင်နိုင်စွမ်းအရှိဆုံး၊ ရည်မှန်းချက်အကြီးဆုံး အသင်းတွေထဲက တစ်သင်းဖြစ်ပါတယ်။ အသင်းသစ်က ကစားသမားတွေနဲ့ ပေါင်းစည်းဖို့ ကျွန်တော့်ကို လှုံ့ဆော်နိုင်ဆုံးအရာက ပရိတ်သတ်တွေလိုချင်တဲ့ ဆုဖလားတွေကို ရယူနိုင်အောင် ကူညီပေးချင်တဲ့ စိတ်ဓာတ်ဖြစ်ပြီး ဒါဟာ အကြီးမားဆုံးစိန်ခေါ်မှုလည်း ဖြစ်ပါတယ်” ဟု နေးမာက ပြောကြားခဲ့သည်။

ယခုကဲ့သို့ ဘာစီလိုနာမှ ပြောင်းရွှေ့သွားခြင်းကြောင့် နေးမာမှာ ကမ္ဘာ့အကောင်းဆုံးကစားသမားဆု ၅ ကြိမ်ရ မက်ဆီ၏ လောင်းရိပ်အောက်မှာ လွတ်မြောက်ကာ၊ ပြင်သစ်တွင် အတောက်ပဆုံး ကြယ်တစ်ပွင့် ဖြစ်လာမည်ဟု ခန့်မှန်းမှုများလည်း ရှိနေသည်။

နေးမာအပြောင်းအရွှေ့အတွက် သုံးစွဲခဲ့သည့် ငွေကြေးမှာ ဥရောပဘောလုံးအဖွဲ့ချုပ်က ချမှတ်ထားသည့် ဘဏ္ဍာရေးညီမျှမှုစည်းမျဉ်း FFP နှင့် ညိစွန်းမှုရှိနေလားဆိုသည့် မေးခွန်းများလည်း ထွက်ပေါ်နေသည်။

ပီအက်စ်ဂျီအသင်းက နေးမာအတွက် စာချုပ်လျော်ကြေး ယူရို ၂၂၂ သန်းကို လာလီဂါအဖွဲ့အား ပေးအပ်ခဲ့သော်လည်း လက်ခံခဲ့ခြင်းမရှိဘဲ နောက်ပိုင်းတွင် ဘာစီလိုနာက ထိုငွေကြေးကို ၎င်းတို့ လက်ခံရရှိကြောင်း ကြေငြာခဲ့သည်။

Ref: Aljazeera