ကမ္ဘာ့အရှည်ဆုံးစာရင်းတွင် ပါဝင်မည့် တံတားတစ်စင်းကို လာမည့်နှစ် ကူဝိတ် ဖွင့်မည်

သြဂုတ် ၄၊ ၂၀၁၇
M-Media

– ကမ္ဘာပေါ်တွင် အရှည်ဆုံးတံတားများမှ တစ်စင်းဖြစ်လာမည့် ရှိခ် ဂျာဘာရ် အလ်-အဟ်မဒ်တံတား (Sheikh Jaber Al-Ahmad) ကို ကူဝိတ်နိုင်ငံက ၂၀၁၈ ခုနှစ် နှစ်ကုန်ပိုင်းတွင် ဖွင့်လှစ်တော့မည်ဟု သိရသည်။

၄၃.၁၄ ကီလိုမီတာရှည်လျားသည့် အဆိုပါတံတားမှာ ကူဝိတ်ပင်လယ်အော်ကို ဖြတ်၍ ကူဝိတ်စီးတီးနှင့် ဆူဘီယဟ် ဒေသတို့ကို ဆက်သွယ်ထားပြီး ကူဝိတ်ဒီနာ ၇၃၈ သန်း (ကန်ဒေါ်လာ ၂.၆ ဘီလီယံ) အကုန်အကျခံ ဆောက်လုပ်ထားသည်။

လက်ရှိတွင် ဆောက်လုပ်ရေးလုပ်ငန်း၏ ၈၀ ရာခိုင်နှုန်းခန့် ပြီးစီးနေပြီး ကူဝိတ်နိုင်ငံနှင့် ပင်လယ်ကွေ့ဒေသအတွင်း အခန့်ငြားဆုံး တံတားတစ်စင်း ဖြစ်လာဖွယ် ရှိနေသည်။

ကူဝိတ်စီးတီးနှင့် ဆူဘီယဟ်ဒေသသို့ လက်ရှိတွင် ကားဖြင့် သွားရောက်ပါက ၁၀၄ ကီလိုမီတာရှိပြီး မိနစ် ၉၀ ခန့် ကြာမြင့်ကာ တံတားပြီးဆုံးပါက ၃၇.၅ ကီလိုမီတာသာ ဝေးတော့မည်ဖြစ်ပြီး မိနစ် ၃၀ အတွင်း အရောက်သွားနိုင်မည်ဖြစ်သည်။

ကူဝိတ်နိုင်ငံတွင် လမ်းတံတားများ သုံးစွဲမှုအတွက် ပြည်သူများက အခွန်အကောက် မပေးရသော်လည်း ယခု တံတားအတွက် အသုံးပြုခ ကောက်ခံမည်ဟု ကူဝိတ် ပြည်သူ့လုပ်ငန်းဝန်ကြီးဌာနက ပြောကြားခဲ့သည်။

လက်ရှိတွင် ကမ္ဘာ့အရှည်ဆုံး တံတားမှာ ၂၀၁၁ ခုနှစ်က တရုတ်နိုင်ငံတွင် ဖွင့်လှစ်ခဲ့သည့် Danyang–Kunshan Grand တံတားဖြစ်ပြီး ၁၆၅ ကီလိုမီတာ ရှည်လျားသည်။

Ref: Alarabiya