အမုန်းစကားပြောသည့် လူဖြူအစွန်းရောက် အကောင့်များကို Facebook ပိတ်ပစ်

သြဂုတ် ၁၇၊ ၂၀၁၇
M-Media

– ရုန်းရင်းဆန်ခတ်မှုများဖြင့် ပြီးဆုံးခဲ့သည့် ဗာဂျီးနီးယားပြည်နယ် ချားလော့စ်ဗီလီမှ ဆန္ဒပြပွဲတွင် ပါဝင်ခဲ့သည့် လူဖြူအစွန်းရောက်များ၏ Facebook နှင့် Instagram အကောင့်များကို Facebook က ပိတ်ပစ်နေသည်ဟု သိရသည်။

ကုမ္ပဏီ၏ ပြောရေးဆိုခွင့်ရှိသူ ရူချီကာ ဘုဒ်ရာဂျာက လူဖြူအစွန်းရောက်တစ်ဦးဖြစ်သည့် ခရစ္စတိုဖာ ကန့်ဝဲလ်၏ အကောင့်များ၊ ပေ့ခ်ျများကို ပိတ်ပစ်ခဲ့သည်ဟု ပြောကြားခဲ့သည်။ ကန့်ဝဲလ်မှာ ဆန္ဒပြမှုနှင့် နောက်ပိုင်း ဖြစ်ပွားခဲ့မှုများ၏ ဗီဒီယိုကို ဆိုရှယ်မီဒီယာများတွင် လွှင့်တင်ခဲ့သူဖြစ်သည်။

Facebook မှာ လူဖြူအစွန်းရောက် လှုပ်ရှားမှုနှင့် ဆက်နွယ်နေသည့် ပေ့ခ်ျ ၈ ခုကိုလည်း ပိတ်ပစ်ခဲ့ပြီး ၎င်းတို့မှာ အမုန်းစကား၊ အမုန်းဆောင်အဖွဲ့အစည်းများနှင့် ပတ်သက်သည့် ကုမ္ပဏီ၏ စည်းမျဉ်းစည်းကမ်းများကို ချိုးဖောက်မှုကြောင့်ဖြစ်သည်ဟု ဘုဒ်ရာဂျာက ထည့်သွင်းပြောဆိုခဲ့သည်။

ပြီးခဲ့သည့်စနေနေ့က လူဖြူအစွန်းရောက်များ၏ ဆန္ဒပြပွဲကို စီစဉ်သူ ကန်ဝဲလ်ကို ဥပဒေအဖွဲ့အစည်းတစ်ခုဖြစ်သော Southern Poverty Law Center က အစွန်းရောက်တစ်ဦးအဖြစ် စာရင်းသွင်းထားသည်။

Ref: Alarabiya