တောင်အာရှ ၃ နိုင်ငံတွင် လူပေါင်း ၁၆ သန်း ရေဘေးသင့်နေ

သြဂုတ် ၁၈၊ ၂၀၁၇
M-Media

– တောင်အာရှနိုင်ငံများဖြစ်ကြသည့် အိန္ဒိယ၊ နီပေါနှင့် ဘင်္ဂလားဒေ့ရ်ှတို့တွင် မိုးသည်းထန်စွာ ရွာသွန်းပြီး ရေကြီးရေလျှံမှုများ ဖြစ်ပွားနေသောကြောင့် လူပေါင်း ၁၆ သန်းကျော်မှာ ရေဘေးသင့်ဒဏ်ကို ခံစားနေရကာ ရောဂါဘယဖြစ်ပွားမှု၊ အစာရေစာပြတ်လပ်မှု၊ သေဆုံးမှု အန္တရာယ်များနှင့် ရင်ဆိုင်နေရသည်။

နီပေါနှင့် ဘင်္ဂလားဒေ့ရ်ှနိုင်ငံတို့၏ ၃ ပုံ ၁ ပုံမှာ ရေကြီးမှုဒဏ်ကို ခံစားနေရကြောင်း၊ နှစ်ပေါင်းများစွာအတွင်း ဆိုးရွားသည့် လူသားချင်းစာနာထောက်မှုဆိုင်ရာ ပြဿနာဖြစ်လာပြီး ဆိုးဆိုးရွားရွားရေကြီးမှုဒဏ်ကို ခံစားနေရသည့် သန်းပေါင်းများစွာသော ပြည်သူများ၏ လိုအပ်ချက်များကို ဖြည့်ဆည်းပေးရေး အလျင်အမြန်ဆောင်ရွက်ရန် လိုအပ်နေကြောင်း နိုင်ငံတကာ ကြက်ခြေနီနှင့် လခြမ်းနီအဖွဲ့မှ အာရှပစိဖိတ်ဆိုင်ရာ လက်ထောက်ဒါရိုက်တာ မာတင်ဖော်လာက ပြောကြားခဲ့သည်။

ရေကြီးမှုကြောင့် ပြီးခဲ့သည် တစ်ပတ်အတွင်း အိန္ဒိယနိုင်ငံတွင် ၂၃၉ ဦး၊ နီပေါတွင် ၁၂၈ ဦးနှင့် ဘင်္ဂလားဒေ့ရ်ှတွင် ၃၉ ဦး စုစုပေါင်း လူပါင်း ၄၀၀ ကျော် သေဆုံးခဲ့သည်။

ဘင်္ဂလားဒေ့ရ်ှတွင် ရေကြီးမှုမှာ စံချိန်တင်ခဲ့ပြီး ယမုံနာမြစ်ကဲ့သို့ အဓိကမြစ်များမှာ သမိုင်းတစ်လျှောက် ဆိုးဆိုးဝါးဝါး ရေကြီးမှုနှင့် ရင်ဆိုင်ခဲ့ရသည့် ၁၉၈၈ ခု အခြေအနေထက်ပင် ပိုမိုဆိုးရွားခဲ့သည်။

ရေကြီးမှုကြောင့် နီပေါနိုင်ငံတွင် ဒေသအများအပြားမှာ ဆက်သွယ်ရေး ပြတ်တောက်သွားခဲ့ပြီး အစားအသောက်၊ သောက်သုံးရေနှင့် လျှပ်စစ်ဓာတ်အား ပြတ်တောက်ခြင်းတို့ကိုလည်း ကြုံတွေ့နေရသည်။

Ref: Aljazeera