အာဖဂန်တွင် ဆက်လက်တိုက်ခိုက်မည်ဟု အမေရိကန်သမ္မတ ကြေငြာ

သြဂုတ် ၂၂၊ ၂၀၁၇
M-Media

– အမေရိကန်စစ်တပ် အလျင်အမြန်ထွက်သွားသည့်အခါ ဖြစ်ပေါ်လာနိုင်သည့် မခန့်မှန်းနိုင်သော၊ လက်မခံနိုင်သော ရလဒ်များကို ရှောင်ရှားရန်အတွက် အာဖဂန်နစ္စတန်တွင် ဆက်လက်တိုက်ခိုက်သွားမည်ဟု အမေရိကန်သမ္မတ ဒေါ်နယ်ထရမ့်က ပြောကြားလိုက်သည်။

ကာကွယ်ရေးဦးစီးချုပ်အဖြစ် ယမန်နေ့ညနေ မိန့်ခွန်းတွင် ထရမ့်က ထိုကဲ့သို့ ပြောကြားခဲ့ခြင်းဖြစ်သည်။

မိမိ၏ မူလရည်ရွယ်ချက်မှာ အာဖဂန်မှ အမေရိကန်တပ်များ ဆုတ်ခွာရန်ဖြစ်သော်လည်း ထိုသို့ထွက်ခွာသွားပြီးနောက် လစ်ဟာသွားမည့်နေရာတွင် အလ်ကိုင်းဒါးနှင့် IS ကဲ့သို့ အဖွဲ့များက ၀င်ရောက်နေရာယူသွားမည်ကို စိုးရိမ်သောကြောင့် တပ်များဆက်ထားရန် ဆုံးဖြတ်ခဲ့ခြင်းဖြစ်သည်ဟု ဆိုသည်။

မိမိတို့၏ ချဉ်းကပ်မှုမှာ လက်ရှိတွင် အတွေးထက်၊ လက်တွေ့ကို ပိုမိုအခြေခံရမည်ဖြစ်ကြောင်း၊ အာဖဂန်တွင် လုံခြုံရေးအရ အကူအညီပေးမှုမှာ အချည်အနှီးမဟုတ်ကြောင်း ထရမ့်က ထည့်သွင်းပြောဆိုခဲ့သည်။ သို့သော်လည်း အခြားဒေသများတွင် ဒီမိုကရေစီတည်ဆောက်ရေးအတွက်မူ စစ်တပ်များ စေလွှတ်တော့မည် မဟုတ်ဟု ၎င်းက ဆိုသည်။

အာဖဂန်တွင် အမေရိကန်တပ်ဖွဲ့များ တိုက်ခိုက်နေသည်မှာ ၁၆ နှစ် ရှိလာခဲ့ပြီဖြစ်ပြီး၊ လက်ရှိတွင် အမေရိကန်တပ်ဖွဲ့ဝင် ၈၄၀၀ ရှိနေကာ၊ တပ်သားသစ် ၄၀၀၀ ကို အမေရိကန်က ထမ်မံစေလွှတ်သွားရန် ရှိနေသည်။

အာဖဂန်တွင် အမေရိကန်တပ်ဖွဲ့ဝင် အမြင့်ဆုံးအရေအတွက်မှာ သမ္မတအိုဘားမားလက်ထက် ၂၀၁၀-၂၀၁၁ ခုနှစ်တွင်ဖြစ်ပြီး အင်အား ၁ သိန်းနီးပါး ရှိခဲ့သည်။

အမေရိကန်၏ စစ်ရေးထောက်မှုကို ရရှိနေသည့် ပါကစ္စတန်မှာ အကြမ်းဖက်အဖွဲ့အစည်းများကို ခိုလှုံခွင့်ပေးထားသည်ဟု သတင်းများထွက်ပေါ်နေမှုနှင့်ပတ်သက်၍ ထရမ့်က ယမန်နေ့မိန့်ခွန်းတွင် ထည့်သွင်းပြောကြားခဲ့ပြီး ပါကစ္စတန်ကို ပိုမိုတင်းကြပ်သည့်နည်းလမ်းဖြင့် ချဉ်းကပ်သွားမည်ဟု ဆိုသည်။

Ref: Aljazeera