အမေရိကန်စစ်သင်္ဘောမှ ပျောက်ဆုံးစစ်သည်များ၏ အလောင်းတစ်ချို့ ပြန်တွေ့

သြဂုတ် ၂၂၊ ၂၀၁၇
M-Media

– ယမန်နေ့က စင်ကာပူ ရေပိုင်နက်အတွင်း ဆီတင်သင်္ဘောတစ်စီးနှင့် တိုက်မိခဲ့သည့် အမေရိကန် စစ်သင်္ဘောမှ ပျောက်ဆုံးနေသည့် အလောင်းများကို ရှာဖွေတွေ့ရှိပြီဟု သိရသည်။

USS John S McCain သင်္ဘော၏ အဆိုပါအဖြစ်အပျက်အတွင်း အမေရိကန် ရေတပ်သားအချို့ ဒဏ်ရာရရှိကာ ၁၀ ဦး ပျောက်ဆုံးခဲ့သည်။

သင်္ဘောကို ချန်ဂီရေတပ်အခြေစိုက်စခန်းတွင် ရပ်နားထားပြီး ရေငုပ်သမားများက သင်္ဘောဝမ်းအတွင်း ၀င်ရောက်ရှာဖွေရှာရာ၌ ရေတပ်သားအချို့၏ အလောင်းများကို တွေ့ရှိခဲ့သည်။

အမေရိကန် ပစိဖိတ် ရေယာဉ်စု၏ ရေတပ်ဗိုလ်ချုပ် စကော့ ဆွစ်ဖ်က ယနေ့ပြုလုပ်ခဲ့သည့် ရှာဖွေမှုအတွင်း သင်္ဘောသားအခန်းများတွင် အလောင်းတစ်ချို့ကို ရေငုပ်သမားများက တွေ့ခဲ့သည်ဟု အတည်ပြုခဲ့သည်။

မလေးရှား ရေတပ်သင်္ဘောတစ်စီးမှာလည်း အမေရိကန်တပ်သားအလောင်းတစ်ခုကို ရှာဖွေတွေ့ရှိထားပြီး USS John S McCain သင်္ဘောမှ ပျောက်ဆုံးသွားသည့် တပ်သားလားဆိုသည်ကို အမေရိကန်ရေတပ်က စစ်ဆေးနေသည်။

ပျောက်ဆုံးနေသည့် စစ်သားများအား ရှာဖွေမှုအတွင်း အမေရိကန်၊ အင်ဒိုနီးရှား မလေးရှားနှင့် စင်ကာပူရေတပ်တို့ကလည်း ပါဝင်ကူညီနေသည်။

အဆိုပါအဖြစ်အပျက်မှာ တစ်နှစ်အတွင်း အမေရိကန်ရေတပ်ရှိ သင်္ဘောများ၏ ၄ ကြိမ်မြောက် မတော်တဆဖြစ်မှုဖြစ်ပြီး ပြီးခဲ့သည့် ၂ လအတွင်း ၂ ကြိမ်မြောက်ဖြစ်သည်။ လက်ရှိတွင် ပစိဖိတ်ရှိ ရေတပ်လုပ်ငန်းများအားလုံးကို အမေရိကန်က ရပ်တန့်ထားသည်။

Ref: BBC