ကဘူးလ်ရှိ ဗလီတစ်လုံးကို IS အကြမ်းဖက်အဖွဲ့က ဗုံးခွဲတိုက်ခိုက်

သြဂုတ် ၂၆၊ ၂၀၁၇
M-Media

– အာဖဂန်နစ္စတန်နိုင်ငံမြို့တော် ကဘူးလ်ရှိ ရှီအာဗလီဝတ်ကျောင်းတော်တစ်လုံးတွင် သောကြာနေ့ ၀တ်ပြုဆုတောင်းမှုအတွင်း အသေခံဗုံးခွဲမှု၊ သေနတ်ဖြင့် ပစ်ခတ်မှုတို့ ဖြစ်ပွားခဲ့သောကြောင့် အနည်းဆုံး လူ ၂၀ သေဆုံးခဲ့ပြီး ဒါဇင်နှင့်ချီ၍ ဒဏ်ရာရရှိခဲ့သည်။

ကဘူးလ်မြို့မြောက်ဖက် အီမာမ် ဇမန်ဗလီဝတ်ကျောင်းတော်တွင် ဖြစ်ပွားခဲ့ခြင်းဖြစ်ပြီး ဗလီဝတ်ကျောင်းတော်အတွင်း အသေခံဗုံးခွဲပြီးနောက် သေနတ်သမားများက ၀င်ရောက်ပစ်ခတ်ခဲ့ကြသည်။ IS အကြမ်းဖက်အဖွဲ့က ၎င်းတို့၏ လက်ချက်ဖြစ်သည်ဟု ပြောကြားခဲ့သည်။

တိုက်ခိုက်မှုအတွင်း သေဆုံးသူ ၂၀ ကျော်ရှိခဲ့ပြီး ဒဏ်ရာရသူ အနည်းဆုံး ၄၀ ရှိကာ သေဆုံးသူ အရေအတွက်မှာ မြင့်တက်လာနိုင်သည်။

အခင်းဖြစ်ပွားနေစဉ် ရဲတပ်ဖွဲ့ဝင်များမှာ ဗလီအတွင်းသို့ ၀င်ရောက်ရန် ကြိုးစားခဲ့ပြီး တိုက်ခိုက်သူများက ဗုံးထပ်မံခွဲသောကြောင့် ပြန်လည်ဆုတ်ခွာခဲ့ရသည်ဟု ရဲတပ်ဖွဲ့တာဝန်ရှိသူ မိုဟာမက် ဆာဒစ် မူရာဒီက ပြောကြားခဲ့သည်။

သေနတ်သမားများမှာ ကျည်ဆံများ ကုန်သွားပြီးနောက် ၀တ်ပြုသူများကို ဓားများဖြင့် လိုက်ထိုးခဲ့ကြပြီး သေဆုံးသူများတွင် အမျိုးသမီးများနှင့် ကလေးငယ်များလည်း ပါဝင်သည်။

IS မှာ အာဖဂန်နစ္စတန်ရှိ ရှီအာများ၏ ၀တ်ပြုရာနေရာများကို တိုက်ခိုက်မည်ဟု ကြေငြာထားပြီး ပြီးခဲ့သည့်လကလည်း ကဘူးလ်မြို့ရှိ အီရတ်သံရုံးကို IS က တိုက်ခိုက်မှု ပြုလုပ်ခဲ့သည်။

Ref: Aljazeera