အင်ဒိုမှ အသက် ၁၀၄ နှစ်အရွယ်အဖွား ဟဂ်ျပြုရန် ဆော်ဒီသို့ရောက်ရှိ

သြဂုတ် ၂၈၊ ၂၀၁၇
M-Media

မာရီယာဟာ ဒီနှစ် ဟဂ်ျကာလအတွင်း မက္ကာကို ရောက်ရှိလာမယ့် ဟဂ်ျပြုသူတွေထဲမှာ အသက်အကြီးဆုံး ပုဂ္ဂိုလ်လည်း ဖြစ်ပါတယ်။

– အင်ဒိုနီးရှားနိုင်ငံ သမိုင်းတစ်လျှောက်မှာ အသက်အကြီးဆုံး ဟဂ်ျပြုသူ ဖြစ်လာမယ့် အသက် ၁၀၄ နှစ်အရွယ် အဖွားအို မာရီယာ မာဂ်ဟာနီ မိုဟာမက်ဟာ စနေနေ့က ဂျစ်ဒါမြို့ကို ရောက်ရှိလာခဲ့ပါတယ်။

မာရီယာဟာ ဒီနှစ် ဟဂ်ျကာလအတွင်း မက္ကာကို ရောက်ရှိလာမယ့် ဟဂ်ျပြုသူတွေထဲမှာ အသက်အကြီးဆုံး ပုဂ္ဂိုလ်လည်း ဖြစ်ပါတယ်။

ဘုရင် အဘ်ဒူလ်အဇစ်လေဆိပ်ကို ဆိုက်ရောက်လာတဲ့ မာရီယာကို ယဉ်ကျေးမှုနဲ့ ပြန်ကြားရေးဝန်ကြီး အဘ်ဒူလ်ခါလစ် အလ်-ဇဟ်ရာနီ၊ ဂျစ်ဒါမှာရှိတဲ့ အင်ဒိုသံရုံးက သံအမတ်၊ မိုဟာမက် ရှရစ်ဖ် ဒီန်နဲ့ အင်ဒိုနီးရှား ဟဂ်ျအဖွဲ့ခေါင်းဆောင် အာရ်ရှဒ် ဟာဒီယာတို့အပါအ၀င် ဆော်ဒီအာဏာပိုင်တွေက ကြိုဆိုခဲ့ကြပါတယ်။

မာရီယာက အခုလို ဟဂ်ျပြုခွင့် ရရှိတဲ့အတွက် ၀မ်းသာပီတိဖြစ်မိကြောင်း ပြောကြားခဲ့ပြီး လေဆိပ်မှာ လုပ်ပေးထားတဲ့ အစီအမံတွေနဲ့ သက်ကြီးရွယ်အိုတွေကို စောင့်ရှောက်ပေးမှုကိုလည်း ချီးကျူးခဲ့ပါတယ်။

ကျန်းမာရေးဌာနကလည်း လေဆိပ်မှာ မာရီယာရဲ့ ကျန်းမာရေးအခြေအနေကို စစ်ဆေးပေးခဲ့ပါတယ်။

“အလ္လာဟ်အရှင်မြတ်ကို ကျေးဇူးတင်မိပါတယ်။ ကျွန်မ မက္ကာကို သွားရမယ်။ ဟဂ်ျလုပ်ရတော့မယ်လေ” လို့ သူမက ပြောကြားခဲ့ပါတယ်။

မာရီယာဟာ အသက် ၉၀ အရွယ်က အွမ္မရာဟ်ဘုရားဖူးခရီးစဉ်အဖြစ် မက္ကာကို လာရောက်ဖူးပြီး အခုတစ်ခေါက်ဟာ မြင့်မြတ်ရာနယ်မြေကို ဒုတိယအကြိမ် ရောက်ရှိလာတာ ဖြစ်ပါတယ်။

အင်ဒိုသံရုံး တာဝန်ရှိသူတွေက မာရီယာဟာ ကျန်းမာရေးကောင်းမွန်ပြီး ဟဂ်ျကျင့်စဉ်တွေကို အခက်အခဲမရှိ ဆောင်ရွက်နိုင်လိမ့်မယ်လို့ ပြောကြားခဲ့ပါတယ်။

အခုနှစ် ဟဂ်ျရာသီအတွင်းမှာ အင်ဒိုနီးရှားက ဘုရားဖူးခရီးသည်ပေါင်း ၂၂၁၀၀၀ လောက် လာရောက်မှာ ဖြစ်ပါတယ်။ လက်ရှိမှာ ကမ္ဘာတစ်ဝှမ်းက လူပေါင်း ၁.၅ သန်းလောက် ရောက်ရှိနေပြီ ဖြစ်ပါတယ်။

ကမ္ဘာ့ အစ္စလာမ်ဘာသာဝင်အများဆုံးနိုင်ငံဖြစ်တဲ့ အင်ဒိုနီးရှားနိုင်ငံမှာ ဟဂ်ျကျင့်စဉ်ကို လာရောက်ဖို့အတွက် စောင့်ဆိုင်းနေတဲ့စာရင်းမှာ လူ ၃.၂ သန်းလောက် ရှိနေပြီး ပျမ်းမျှ ၃၇ နှစ်လောက်ကြာမှ အလှည့်ရောက်မယ့် အနေအထားဖြစ်ပါတယ်။

Ref : Alarabiya, The National