ရခိုင်ပြည်နယ်တွင် အကြမ်းဖက်တိုက်ဖျက်ရေး ပူးပေါင်းဆောင်ရွက်ရန် ဘင်္ဂလားဒေ့ရှ် ကမ်းလှမ်း

သြဂုတ် ၂၉၊ ၂၀၁၇
M-Media

– ရခိုင်ပြည်နယ်အတွင်းမှာရှိတဲ့ လက်နက်ကိုင်တွေနဲ့ပတ်သက်ပြီး အကြမ်းဖက်တိုက်ဖျက်ရေးလုပ်ငန်းကို ပူးပေါင်းဆောင်ရွက်သွားဖို့ ဘင်္ဂလားဒေ့ရ်ှက မြန်မာနိုင်ငံကို ကမ်းလှမ်းလိုက်ပါတယ်။

မနေ့က ဒါကာမှာ ဘင်္ဂလားဒေ့ရ်ှနိုင်ငံဆိုင်ရာ မြန်မာသံအမတ် ဦးအောင်မြင့်ကို ဘင်္ဂလားဒေ့ရ်ှနိုင်ငံခြားရေး ၀န်ကြီးဌာနက ဆင့်ခေါ်မှုအတွင်း ဒီလိုကမ်းလှမ်းလိုက်တာဖြစ်ပြီး၊ အမည်မဖော်လိုတဲ့ တာဝန်ရှိသူတစ်ဦးက ဒါဟာ ကမ်းလှမ်းမှုအသစ် ဖြစ်တယ်လို့လည်း ဆိုပါတယ်။

“လုံခြုံရေးဆိုင်ရာ စိုးရိမ်မှုတွေကို ဖယ်ရှားရေးအတွက် မြန်မာနိုင်ငံကို ကူညီချင်တဲ့ သဘောထားကို ပြသလိုက်တာပါ” လို့ အဲဒီ တာဝန်ရှိသူက ဆိုပါတယ်။

မနေ့က မြန်မာသံအမတ် ဆင့်ခေါ်ခံရမှုဟာ ၄၈ နာရီအတွင်း ၂ ကြိမ်မြောက်ဖြစ်ပြီး သံအမတ်က ထုတ်ပြန်တဲ့ ကြေငြာချက်မှာ နှစ်နိုင်ငံ လုံခြုံရေးတပ်ဖွဲ့တွေဟာ နယ်စပ်တစ်လျှောက် ပူးပေါင်းဆောင်ရွက်ရေး ဘင်္ဂလားဒေ့ရ်ှက အဆိုပြုခဲ့တယ်လို့ ဖော်ပြထားပါတယ်။

လက်ရှိ ရခိုင်ပြည်နယ်မှာ အစွန်းရောက်အကြမ်းဖက်သမားတွေရဲ့ တိုက်ခိုက်မှုနဲ့ပတ်သက်ပြီး မြန်မာအစိုးရက ‘ဘင်္ဂါလီ အကြမ်းဖက်သမား’ လို့ သုံးနှုန်းတာနဲ့ပတ်သက်ပြီးလည်း ဘင်္ဂလားဒေ့ရ်ှဖက်က ဆွေးနွေးခဲ့ပါတယ်။

“ဒီအသုံးအနှုန်းအတွက် အလွန်အမင်း စိုးရိမ်မိကြောင်း သံအမတ်ကို ပြောကြားခဲ့ပြီး၊ ဒီစကားလုံးမသုံးရေး အထက်အာဏာပိုင်တွေကို ပြောကြားဖို့လည်း တောင်းဆိုခဲ့ပါတယ်” လို့ ဘင်္ဂလားဒေ့ရှ် နိုင်ငံခြားရေးဌာနက တာဝန်ရှိသူတစ်ဦးက ပြောပါတယ်။

၂၀၁၆ ခုနှစ် သြဂုတ်ကလည်း ၂ နိုင်ငံ နယ်နမိတ်ချင်း ထိစပ်နေတဲ့ နေရာတွေမှာ လက်နက်ကိုင်တွေ တိုက်ဖျက်ရေး ပူးပေါင်းဆောင်ရွက်မှုတွေ လုပ်သွားဖို့ ဘင်္ဂလားဒေ့ရ်ှက ကမ်းလှမ်းခဲ့ဖူးပါတယ်။

ဒီကိစ္စနဲ့ပတ်သက်လို့ အခုနှစ် ဧပြီလအတွင်းမှာ ဘင်္ဂလားဒေ့ရှ် နယ်ခြားစောင့်တပ်ဖွဲ့တွေနဲ့ နယ်ခြားစောင့်ရဲတပ်ဖွဲ့တွေဟာ ဆွေးနွေးမှုတွေလည်း ပြုလုပ်ခဲ့ပါတယ်။

Ref : Dhaka Tribune