ဗလီအားလုံးကို အချိန်မရွေးဝင်စစ်နိုင်သည်ဟု ဧရာဝတီတိုင်း အိုလမာအစ္စလာမ်အဖွဲ့မှ ပြောကြား

စက်တင်ဘာ ၁၊ ၂၀၁၇
M-Media

– ဧရာဝတီတိုင်းဒေသကြီးအတွင်းရှိ ဗလီများတွင် ဧည့်သည်လက်မခံရန်နှင့် စစ်ဆေးလိုပါက အချိန်မရွေး စစ်ဆေးနိုင်ရန် ညွှန်ကြားထားကြောင်း ဧရာဝတီတိုင်းဒေသကြီး အိုလမာအစ္စလာမ်အဖွဲ့ချုပ်မှ သိရသည်။

ဗလီများတွင် တရားအားထုတ်သူများမှလွဲပြီး ဆေးရုံလာတက်သူ၊ ပြက္ခဒိန်လာရောင်းသူနှင့် အလှူလာခံသည့်သူများ အပါအ၀င် ဧည့်သည်များကို တည်းခိုခန်းမှာသာ တည်းခိုင်းထားပြီး လက်ခံထားကြောင်း၊ သံသယရှိ၍ စစ်ဆေးလိုပါက အချိန်မရွေး စစ်ဆေးလို့ရကြောင်း ဧရာဝတီတိုင်းဒေသကြီး အိုလမာအစ္စလာမ်အဖွဲ့ချုပ် ဥက္ကဌ ဦးကိုလတ်ထံမှ သိရသည်။

“ကျွန်တော်တို့ ညွှန်ကြားထားတာက ဗလီတွေမှာ တရားအားထုတ်တဲ့သူကလွဲလို့ ကျန်တဲ့ ဧည့်သည်ဆောင်သည်တွေကို ဘယ်သူမှ လက်မခံဖို့နဲ့ တစ်ချို့ကလည်း ဇဝေဇ၀ါတွေနဲ့ ဖြစ်နေလို့ဆိုရင် ကျွန်တော်တို့နဲ့ ဆက်သွယ်ပြီးတော့ ဧရာဝတီတိုင်းတစ်တိုင်းလုံးမှာရှိတဲ့ ဗလီတွေကို ကြိုက်တဲ့အချိန်မှာ ကြိုက်သလို စစ်မယ်ဆိုလို့ရှိရင်လည်း အစစ်ဆေးခံဖို့ အဆင်သင့်ရှိပါတယ်” ဟု ဧရာဝတီတိုင်းဒေသကြီး အိုလမာ အစ္စလာမ်အဖွဲ့ချုပ်ဥက္ကဌ ဦးကိုလတ်က ပြောသည်။

ရခိုင်ပြည်နယ်တွင် ဖြစ်ပွားနေသည့် အကြမ်းဖက်မှုများနှင့် ပတ်သက်၍ အစ္စလာမ်ဘာသာဝင်များအကြား မည်သည့်တစ်ခုမှ ပြောကြားထားခြင်းမရှိဘဲ ဘာသာပေါင်းစုံ ငြိမ်းငြိမ်းချမ်းချမ်းပင် နေထိုင်နေကြပြီး ကောလဟာလများ ထွက်ပေါ်နေသော်လည်း ပြည်သူများအနေဖြင့် စိုးရိမ်ပူပန်မှုမရှိဘဲ လိုအပ်ပါက ညသန်းခေါင်လည်း ဗလီများကို စစ်ဆေးနိုင်ကြောင်း သိရသည်။

“ရခိုင်ပြည်နယ်နဲ့ ထိစပ်နေတဲ့တိုင်းဆိုတော့ ဘာသာမတူသူတွေအချင်းချင်းကြားမှာ စိုးရိမ်မှုတွေ ရှိနေကြတာ သဘာဝပါ။ ဒါပေမယ့် ဧရာဝတီတိုင်းဟာ အမြဲတမ်းအေးချမ်းပြီး ဘာသာကြီးတွေကြားမှာလည်း ငြိမ်းချမ်းရေးအဖွဲ့အစည်းကြီးတွေ ခိုင်ခိုင်မာမာ ဖွဲ့စည်းထားတယ်။ ဘာသာမတူတဲ့သူတွေကြားမှာလည်း လက်တွဲဆောင်ရွက်မှုတွေ ခိုင်ခိုင်မာမာ ရှိနေတဲ့အတွက် ကောလဟာလသတင်းတွေကြောင့် ကြောက်လန့်နေတာ မဖြစ်သင့်ဘူး။ အခု အကျွန်တော်တို့လမ်းပဲကြည့် လမ်းထဲမှာ ဗလီရှိသလို၊ လမ်းထိပ်မှာလည်း ဘုန်းကြီးကျောင်းတွေ အများကြီးရှိနေတယ်။ လမ်းသူလမ်းသားတွေကလည်း ဗုဒ္ဓဘာသာနဲ့ အစ္စလာမ်ဘာသာဝင်တွေ ရောနှောပြီး တစ်ယောက်နဲ့တစ်ယောက် ကူညီ အေးအေးချမ်းချမ်းနေနေကြတာပဲ။ ဘာပြဿနာမှ မရှိပါဘူး” ဟု ပုသိမ်မြို့၊ ကွင်းတန်းကုလားတန်းလမ်းတွင် နေထိုင်သူ ကိုယ်ဇော်ထိုက်က ပြောသည်။

ဧရာဝတီတိုင်းဒေသကြီးတွင် ဗလီကျောင်း ၁၄၈ ကျောင်းရှိနေပြီး အများဆုံးမှာ ပုသိမ်မြို့နယ်တွင် တည်ရှိနေကြောင်း တိုင်းဒေသကြီး အိုလမာအစ္စလာမ်အဖွဲ့ချုပ်မှသိရသည်။

မျိုးမင်းထွန်း (မြစ်မခ)

(၂၀၁၇ ခုနှစ် စက်တင်ဘာ ၁-၇ ရက်နေ့ထုတ် Hot News ဂျာနယ်တွင် ဖော်ပြထားသည့်အတိုင်း ကူးယူဖော်ပြသည်။)