အင်ဒိုနီးရှားရှိမြန်မာသံရုံး ဓာတ်ဆီဗုံးဖြင့် တိုက်ခိုက်ခံရ

စင်တက်ဘာ ၃၊ ၂၀၁၇
M-Media

ဂျကာတာမြို့ရှိ မြန်မာသံရုံး

– ဂျကာတာမှာရှိတဲ့ မြန်မာသံရုံးဟာ ဒီနေ့မနက်အစောပိုင်းမှာ ဓာတ်ဆီဗုံးနဲ့ တိုက်ခိုက်ခံခဲ့ရပြီး မီးလောင်မှု အနည်းငယ်ဖြစ်ပွားခဲ့တယ်လို့ အင်ဒိုနီးရှားရဲတပ်ဖွဲ့က သတင်းထုတ်ပြန်ထားကြောင်း Reuters သတင်းဌာနက ဖော်ပြပါတယ်။

လက်ရှိ ရခိုင်ပြည်နယ်မှာ ဖြစ်ပွားနေတဲ့ ကိစ္စတွေနဲ့ပတ်သက်ပြီး ကမ္ဘာ့ အစ္စလာမ်ဘာသာဝင်အများဆုံးရှိရာ အင်ဒိုနီးရှားနိုင်ငံမှာ တင်းမာမှုတွေ မြင့်တက်နေတဲ့အချိန် ဒီလို တိုက်ခိုက်မှုမျိုး ဖြစ်လာတာဖြစ်ပါတယ်။

သံရုံးနောက်ဖက်လမ်းမှာ ပတ္တယောင်လှည့်နေတဲ့ ရဲတပ်ဖွဲ့ဝင်တစ်ဦးဟာ ဒေသစံတော်ချိန် ဒီနေ့မနက် ၂ နာရီ ၃၅ မှာ သံရုံးရဲ့ ဒုတိယထပ် မီးလောင်နေတာကို တွေ့ရှိခဲ့ပြီးတဲ့နောက် သံရုံးကို စောင့်နေတဲ့ လုံခြုံရေးတပ်ဖွဲ့ကို သတင်းပေးပို့ခဲ့တယ်လို့ ဂျကာတာရဲတပ်ဖွဲ့က ထုတ်ပြန်တဲ့ ကြေငြာချက်မှာ ဖော်ပြထားပါတယ်။

မီးညှိမ်းခဲ့ပြီးနောက် ရဲတပ်ဖွဲ့ဟာ မီးစာတပ်ထားတဲ့ ဘီယာပုလင်းအကွဲကို တွေ့ရှိခဲ့ပြီး သံသယရှိသူဟာ MPV ကားနဲ့ အခင်းဖြစ်ပွားရာနေရာကနေ ထွက်ပြေးသွားတယ်လို့ ကြေငြာချက်က ဆိုပါတယ်။

လက်ရှိမှာ ဒီအဖြစ်အပျက်အတွက် စုံစမ်းစစ်ဆေးမှုပြုလုပ်နေတယ်လို့ ရဲတပ်ဖွဲ့ ပြောရေးဆိုခွင့်ရှိသူ အာဂို ယူဝိုနိုက ပြောကြားခဲ့ပါတယ်။ တိုက်ခိုက်မှုနောက်ကွယ်က လှုံ့ဆော်မှုကိုတော့ ရဲတပ်ဖွဲ့က မသိရှိသေးပါဘူး။

မနေ့က တက်ကြွလှုပ်ရှားသူအချို့ဟာ သံရုံးရှေ့မှာ ဆန္ဒပြမှုတစ်ခု ပြုလုပ်ခဲ့ပြီး နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ နိုဘယ်ဆုကို ရုပ်သိမ်းဖို့ တောင်းဆိုခဲ့ကြပါတယ်။

ဒီနေ့မနက်ပိုင်းမှာလည်း ဂျကာတာမြို့လယ်ကောင်မှာ ဆန္ဒပြမှုတွေ ဖြစ်ပွားခဲ့ပြီး ရိုဟင်ဂျာ မွတ်စလင်တွေ လူ့အခွင့်အရေး ချိုးဖောက်ခံနေရတာနဲ့ပတ်သက်လို့ ဖြေရှင်းရေးမှာ အင်ဒိုနီးရှားအစိုးရက တက်တက်ကြွကြွပါဝင်ဖို့ အစ္စလာမ့်မစ်အဖွဲ့အစည်းတွေက လူတွေနဲ့ တက်ကြွလှုပ်ရှားသူတွေက တောင်းဆိုခဲ့ကြပါတယ်။

Ref: Reuters