ကမ္ဘာ့ဖလားခြေစစ်ပွဲအောင်သည့်အတွက် ဆော်ဒီက တစ်နိုင်ငံလုံးကို အခမဲ့ ဖုန်းပြောခွင့်ပေး

စက်တင်ဘာ ၈၊ ၂၀၁၇
M-Media

ခြေစစ်ပွဲ အောင်မြင်ပြီးနောက် အောင်ပွဲခံနေသည့် ဆော်ဒီအသင်းသားများ

– ဆော်ဒီလက်ရွေးစင် ဘောလုံးအသင်း ရုရှားနိုင်ငံတွင် ကျင်းပပြုလုပ်မည့် ၂၀၁၈ ကမ္ဘာ့ဖလားခြေစစ်ပွဲ အောင်မြင်မှုကို ဂုဏ်ပြုသည့်အတွက် ဆော်ဒီ နိုင်ငံပိုင် ဆက်သွယ်ရေး ကုမ္ပဏီ Saudi Telecom Company (STC) က ပြည်သူများအား ၂ ရက်တာ အခမဲ့ ဖုန်းပြောခွင့် ပေးခဲ့သည်ဟု သိရသည်။

STC ဖုန်းလိုင်းကို အသုံးပြုသူများမှာ ဒေသစံတော်ချိန် ကြာသာပတေးနေ့ မနက် ၁၂ နာရီမှ စနေနေ့မနက် ၁၂ နာရီအထိ ဖုန်းပြောခွင့်ရမည်ဖြစ်သည်။

ကုမ္ပဏီစီအီးအို ဒေါက်တာ ခါလစ် အိခ်ျ ဘီယာရီက ယခုအစီအစဉ်တွင် ပြည်တွင်း၊ ပြည်ပသို့ အခမဲ့ ကြိုက်သလောက် ခေါ်ဆိုနိုင်မည်ဟု ပြောကြားခဲ့သည်။

အဆိုပါ အစီအစဉ်မှာ STC ၏ ကြိုတင်ငွေပေးစနစ်၊ လသွင်းစနစ် စသည့် ဖုန်းလိုင်းအားလုံးအတွက် အကျုံးဝင်ပြီး ဗုဒ္ဓဟူးနေ့မှစ၍ ပြည်သူများအား STC က မက်ဆေ့ပို့ အကြောင်းကြားခဲ့သည်။

ဆော်ဒီမှာ အင်္ဂါနေ့က အုပ်စုနောက်ဆုံးပွဲတွင် ဂျပန်အသင်းအား ၁ ဂိုး ဂိုးမရှိဖြင့် အနိုင်ကစားပြီး အုပ်စုဒုတိယဖြင့် ခြေစစ်ပွဲအောင်ခဲ့ကာ ၂၀၀၆ ခုနှစ်နောက်ပိုင်း ပထမဆုံးအကြိမ် ကမ္ဘာ့ဖလား နောက်ဆုံးအဆင့်သို့ တက်ရောက်ခွင့် ရခြင်းဖြစ်သည်။

ဂျပန်၊ အီရန်၊ တောင်ကိုရီးယားတို့လည်း တိုက်ရိုက် ခြေစစ်ပွဲအောင်ခဲ့ပြီး ဆီးရီးယားနှင့် သြစတေးလျတို့မှာ play-off ကစားကာ နောက်ဆုံးအဆင့် တက်ရောက်နိုင်ရန် ကြိုးစားရမည်ဖြစ်သည်။

Ref: Alarabiya