လှေဖြင့်လာသည့် ရိုဟင်ဂျာဒုက္ခသည်များကို ယာယီနေထိုင်ခွင့်ပြုမည်ဟု မလေးရှားပြော

စက်တင်ဘာ ၈၊ ၂၀၁၇
M-Media

စက်တင်ဘာ ၇ ရက်နေ့က နတ်မြစ်ကို ဖြတ်ကူးရန် လှေစောင့်နေသော ရိုဟင်ဂျာ မိန်းကလေးငယ်တစ်ဦး ရေသောက်နေစဉ်

– မြန်မာနိုင်ငံက အကြမ်းဖက်မှုတွေကြောင့် လှေနဲ့ ထွက်ပြေးလာရတဲ့ ရိုဟင်ဂျာတွေကို ကမ်းခြေစောင့်အဖွဲ့တွေက နှင်ထုတ်သွားမှာမဟုတ်ဘဲ ယာယီ နေရာထိုင်ခင်း စီစဉ်ပေးသွားမယ်လို့ မလေးရှား ရေကြောင်း အာဏာပိုင်အဖွဲ့ အကြီးအကဲ ဇူလ်ကီဖလီ အဘူ ဘာကာက ပြောကြားလိုက်ပါတယ်။

သြဂုတ်လ ၂၅ ရက်နေ့က ရိုဟင်ဂျာလက်နက်ကိုင်တွေဟာ ရခိုင်ပြည်နယ်မြောက်ပိုင်းက ရဲကင်းစခန်းတွေကို တိုက်ခိုက်ခဲ့ပြီးတဲ့နောက်ပိုင်း တစ်ကျော့ပြန် ဖြစ်ပေါ်လာတဲ့ မတည်မငြိမ်မှုတွေအတွင်းမှာ ရိုဟင်ဂျာ ၁၆၀၀၀၀ လောက်ဟာ အိမ်နီးချင်း ဘင်္ဂလားဒေ့ရ်ှနိုင်ငံကို ထွက်ပြေးခဲ့ရတယ်လို့ ကုလက ဆိုပါတယ်။

အဘူဘာကာကတော့ ဒီလို မတည်ငြိမ်မှုတွေကြောင့် ရိုဟင်ဂျာတွေဟာ လာမယ့် သီတင်းပတ်အနည်းငယ်အတွင်းမှာ စက်လှေနဲ့ မလေးရှားကို ၀င်ရောက်လာဖွယ်ရှိတယ်လို့ ရှုမြင်ကြောင်း ပြောကြားခဲ့ပါတယ်။

“အခြေခံလိုအပ်ချက်တွေကို ဖြည့်ဆည်းပေးပြီး ပြန်လည်နှင်ထုတ်ဖို့ စောစောပိုင်းမှာ စီစဉ်ထားပေမယ့် နောက်ဆုံးမှာတော့ လူသားချင်း စာနာထောက်ထားမှု အကြောင်းအရင်းတွေကြောင့် ဒီလို လုပ်တော့မှာ မဟုတ်ပါဘူး” လို့ သူကဆိုပြီး လတ်တလော ဒုက္ခသည်တွေ ရောက်မလာသေးဘူးလို့ ဆိုပါတယ်။

လက်ရှိ မလေးရှားမှာ ရိုဟင်ဂျာ တစ်သိန်းကျော်လောက် လိုလှုံနေရပြီး စစ်အာဏာရှင်လက်အောက် ဖိနှိပ်ချုပ်ချယ်ခံရတဲ့ မြန်မာနိုင်ငံက အခြားတိုင်းရင်းသား တော်တော်များများလည်း မလေးရှားမှာ ဒုက္ခသည်အဖြစ် ရောက်ရှိနေကြပါတယ်။

မလေးရှားဟာ ကုလရဲ့ ဒုက္ခသည်ဆိုင်ရာ သဘောတူညီချက်မှာ လက်မှတ်ရေးမထိုးထားပေမယ့် ဒုက္ခသည်တွေကို လက်ခံပေးထားကာ ပြန်လည်နေရာချထားရေးလုပ်ငန်းတွေမှာ ပါဝင်ကူညီပေးနေပါတယ်။

ထိုင်းနိုင်ငံကလည်း မြန်မာနိုင်ငံက မတည်ငြိမ်မှုတွေကြောင့် ထွက်ပြေးလာရသူတွေကို လက်ခံထားမယ်လို့ ပြီးခဲ့တဲ့တစ်ပတ်မှာ ပြောကြားထားပါတယ်။ ထိုင်းနိုင်ငံမှာ ရိုဟင်ဂျာ ၅၉၀၀၀ လောက်ရှိပြီး အခြားတိုင်းရင်းသားတွေလည်း ဒုက္ခသည်အဖြစ် ရောက်ရှိနေပါတယ်။

Ref: Alarabiya