အစ္စလာမ်နှင့် ဗုဒ္ဓဘာသာကို စော်ကားသည့် ခရစ်ယာန်ဘုန်းကြီးနှစ်ဦးကို စင်ကာပူက ပြည်ဝင်ခွင့်မပေး

စက်တင်ဘာ ၉၊ ၂၀၁၇
M-Media

စင်ကာပူ ပြည်ထဲရေးဝန်ကြီး မစ္စတာ ရှန်မူဂမ်

– အခြားသော ဘာသာတရားများအပေါ် ထိခိုက်အမုန်းပွားစေသည့် တရားဟောမှုများကို ပြုလုပ်ခဲ့သော နိုင်ငံခြား ခရစ်ယာန်တရားဟောဆရာနှစ်ဦး၏ နိုင်ငံအတွင်း တရားဟောခွင့် လျှောက်ထားမှုကို ပယ်ချခဲ့သည်ဟု စင်ကာပူ ပြည်ထဲရေးဝန်ကြီးဌာန MHA က ယမန်နေ့တွင် ပြောကြားခဲ့သည်။

နိုင်ငံရပ်ခြား ဘာသာရေးဆရာများမှာ စင်ကာပူတွင် လာရောက်တရားဟောပြောခွင့် ရရှိရန်အတွက် MWP ပါမစ် လိုအပ်ပြီး ခရစ်ယာန်တရားဟောဆရာနှစ်ဦးက ထိုအတွက်လျှောက်ထားမှုကို MHA ၏ အကြံပြုချက်ဖြင့် လူ့စွမ်းအားအရင်းအမြစ် ၀န်ကြီးဌာန (MOM) က ပယ်ချခဲ့သည်ဟု ၀န်ကြီးဌာနမှ ထုတ်ပြန်သည့် ကြေငြာချက်တွင် ဖော်ပြထားသည်။

“မွတ်စလင်တရားဟောဆရာတွေ စင်ကာပူကိုလာရောက်ခွင့် ပိတ်ပင်တာမျိုးလိုပဲ မကြာသေးခင်က ခရစ်ယာန် တရားဟောဆရာတွေကိုလည်း ပိတ်ပင်ခဲ့ပါတယ်။ နိုင်ငံခြားမှာဟောတဲ့ သူတို့ရဲ့ တရားတွေထဲမှာ အစ္စလာမ်ကို တော်တော်လေးစော်ကားထားပါတယ်။ ဒါ့ကြောင့် သူတို့ကို လာခွင့်မပေးဖို့ ကျွန်တော်တို့ ဆုံးဖြတ်ခဲ့တာပါ” ဟု စင်ကာပူ ပြည်ထဲရေးဝန်ကြီး မစ္စတာ ရှန်မူဂမ်က ပြောကြားခဲ့သည်။

အဆိုပါ ခရစ်ယာန်တရားဟောဆရာနှစ်ဦးတွင် တစ်ဦးက အလ္လာဟ်ဆိုသည်မှာ ‘မှားယွင်းသော ဘုရား’ ဟု ဆိုပြီး၊ ‘အစ္စလာမ်ဆိုသည့် အမှောင်တိုက်တွင်း ပိတ်မိနေသူများအတွက်’ ဆုတောင်ပေးရန်လည်း ပရိတ်သတ်ကို တိုက်တွန်းခဲ့သည်။

ထို့ပြင် ဗုဒ္ဓဘာသာဝင်များမှာ Tohuw များဖြစ်ကြောင်း စော်ကားပြောဆိုခဲ့သည်။ Tohuw ဆိုသည်မှာ ဂျူးဘာသာစကားဖြစ်ပြီး ‘ဆုံးရှုံးသော၊ ဘ၀မရှိသော၊ နာမ်ပိုင်းဆိုင်ရာ အလင်းပျောက်သောသူများ’ ဟု အဓိပ္ပါယ်ရသည်။ ထို့ပြင် ဗုဒ္ဓဘာသာဝင်များအား ခရစ်ယာန်ဘာသာသို့ သွတ်သွင်းကာ ကယ်တင်ရမည်ဟုလည်း ဟောကြားခဲ့ကြောင်း MHA ၏ ထုတ်ပြန်မှုတွင် ဖော်ပြထားသည်။

အခြား ခရစ်ယာန်တရားဟောဆရာတစ်ဦးမှာလည်း အစ္စလာမ်သာသနာ၊ တမန်တော်မုဟမ္မဒ်တို့ကို စော်စော်ကားကား ပြောကြားဖူးသည်ဟု ဆိုသည်။

“လူမျိုးစုံ၊ ဘာသာစုံရှိတဲ့ စင်ကာပူလူ့အဖွဲ့အစည်းမှာ ဒီလိုပြောကြားမှုတွေကို လက်မခံပါဘူး။ ဘယ်ဘာသာကပဲဖြစ်စေ အခြားဘာသာတရားတွေကို နှိမ့်ချပြီး ဘာသာတရားတွေကြားမှာ အမြင်ဆိုးတွေဖြစ်အောင် ဖြန့်နေတဲ့ တရားဟောဆရာတွေကို စင်ကာပူက ခွင့်ပြုမှုမှာ မဟုတ်ပါဘူး” ဟု MHA ၏ ကြေငြာချက်ထဲတွင် ဖော်ပြထားသည်။

“ဒါဟာ စင်ကာပူ လွတ်လပ်ရေးရကတည်းက ထိန်းသိမ်းလာခဲ့တဲ့ လူမှုသဟဇာတဖြစ်မှုကို ကာကွယ်ဖို့ဖြစ်ပါတယ်”

သောကြာနေ့ တရားဟောကြားမှုတွင် ခရစ်ယာန်နှင့် ဂျူးများအား နှိမ့်ချသည့်စကားများ ပြောဆိုခဲ့သောအိန္ဒိယမှ မွတ်စလင်တရားဟောဆရာတစ်ဦးကို ယခုနှစ်အစောပိုင်းတွင် စင်ကာပူက တရားစွဲဆို ဒဏ်ရိုက်ခဲ့ပြီး ပြည်နှင်ဒဏ်ပေးခဲ့သည်။

Ref: CNA