နိုင်ငံရေးချောက်ချခံရသည့် ထိပ်တန်းအစ္စလာမ့်ဓမ္မပညာရှင်တစ်ဦးကို အလိုရှိစာရင်းမှ အင်တာပိုလ် ပယ်ဖျက်

စက်တင်ဘာ ၁၁၊ ၂၀၁၇
M-Media

– အီဂျစ်အစိုးရက နိုင်ငံရေးအရ လုပ်ကြံတိုင်ကြားမှုများကြောင့် ကမ္ဘာကျော် အစ္စလာမ့်ဓမ္မပညာရှင် ယူစွပ်ဖ် အလ်-ကွာရာဒါဝီကို နိုင်ငံတကာရဲတပ်ဖွဲ့ (အင်တာပိုလ်)က အလိုရှိစာရင်းမှ ပယ်ဖျက်လိုက်သည်ဟု ယူကေအခြေစိုက် အာရပ် လူ့အခွင့်အရေးဆိုင်ရာအဖွဲ့ (AOHR) က ပြောကြားခဲ့သည်။

အီဂျစ်နိုင်ငံမှာ အလ်-ကွာရာဒါဝီကို အလိုရှိသူစာရင်းထဲ ထည့်သွင်းပေးရန်အတွက် ၂၀၁၄ ခုနှစ်တွင် တောင်းဆိုခဲ့ပြီး စုံစမ်းစစ်ဆေးမှုများအရ ကွာရာဒါဝီအပေါ် ပြုလုပ်ထားသည့် စွပ်စွဲချက်များမှာ အီဂျစ်အာဏာပိုင်များကို မထောက်ခံသည့်အတွက် လုပ်ကြံတိုင်ကြားခြင်းသာဖြစ်ကြောင်း အင်တာပိုလ်က တွေ့ရှိခဲ့ရသည်ဟု AOHR မှ ထုတ်ပြန်သော ကြေငြာချက်တွင် ဖော်ပြထားသည်။

အသက် ၉၁ နှစ်အရွယ်ရှိ ကွာရာဒါဝီမှာ နိုင်ငံတကာ အစ္စလာမ့်ဓမ္မပညာရှင်များ အစည်းအရုံး ဥက္ကဌဖြစ်ပြီး လက်ရှိတွင် ကာတာနိုင်ငံ၌ နေထိုင်နေသည်။

၂၀၁၃ ခုနှစ် အီဂျစ်စစ်အာဏာသိမ်းမှုပြီးနောက် ဓားပြမှု၊ မီးရှို့မှု၊ လူသတ်မှုတို့ဖြင့် ကွာရာဒါဝီမှာ အလိုရှိစာရင်း အသွင်းခံရခြင်းဖြစ်သည်။

အင်တာပိုလ်၏ စုံစမ်းစစ်ဆေးမှုတွင် ထိုအဖြစ်အပျက်များ ဖြစ်ပွားစဉ်က ကွာရာဒါဝီမှာ အီဂျစ်တွင် ရှိမနေဘဲ လုပ်ကြံဖန်တီး တိုင်ကြားထားခြင်းသာဖြစ်ကြောင်း၊ ၎င်း၏ အသက်အရွယ်နှင့် ဂုဏ်သိက္ခာအရ ထိုပြစ်မှုများကို ကျူးလွန်မည်ဟု ယုံကြည်လောက်စရာ အနေအထားမရှိကြောင်း တွေ့ရှိခဲ့ရသည်ဟု AOHR က ဆိုသည်။

“အလ်-ကွာရာဒါဝီကို အလိုရှိစာရင်းသွင်းတဲ့ကိစ္စရဲ့ နောက်ကွယ်မှာ ယူအေအီးအပါအ၀င် နိုင်ငံတော်တော်များများ ပါဝင်ပါတယ်။ သူ့ရဲ့အမည်ကို အလိုရှိစာရင်းသွင်းလိုက်တာ့ အီမရိတ်မီဒီယာနဲ့ နောက်ပိုင်းမှာ အီဂျစ်မီဒီယာတွေ၊ အီဂျစ်အစိုးရ ဆန့်ကျင်သူတွေကို အပုပ်ချတဲ့သူတွေဟာ ၀မ်းသာအားရဖြစ်ခဲ့ကြတယ်။ ဒါပေမယ့် ဒီအူမြူးတာဟာ ကြာကြာမခံခဲ့ဘဲ အမှန်တရား ပေါ်ထွက်လာပြီး အရာရာတိုင်းက လမ်းကြောင်းမှန်ပေါ် ပြန်ရောက်သွားပါတယ်” ဟု AOHR ဥက္ကဌ မိုဟာမက် ဂျမီးလ်က ပြောကြားခဲ့သည်။

Ref: Aljazeera