ဟိန္ဒူနတ်ဘုရားကို စော်ကားသည့် ကြော်ငြာအတွက် အိန္ဒိယက သြဇီကို ကန့်ကွက်

စက်တင်ဘာ ၁၁၊ ၂၀၁၇
M-Media

– ဟိန္ဒူနတ်ဘုရားတစ်ပါးဖြစ်သည့် Ganesha သိုးသားစားနေသည်ကို ဖော်ကျူးထားသော ကြော်ငြာတစ်ခုကြောင့် အိန္ဒိယက သြစတေးလျကို သံတမန်နည်းလမ်းဖြင့် ဆန့်ကျင်ကန့်ကွက်ကြောင်း ပြောကြားခဲ့သည်ဟု သိရသည်။

သြစတေးလျ အသားလုပ်ငန်းတစ်ခုမှ ရိုက်ကူးထုတ်လွှင့်သော အဆိုပါကြော်ငြာတွင် ဘာသာပေါင်းစုံမှ နတ်ဘုရားများ တစ်ဝိုင်းတည်းထိုင်၍ အသားစာနေပုံကို ဖော်ကျူးထားခြင်းဖြစ်ပြီး၊ နတ်ဘုရား Ganesha မှာ မည်သည့်အခါမှ အသားစားခြင်း မရှိခဲ့သောကြောင့် ဟိန္ဒူဘာသာဝင်များမှာ ထိုကြော်ငြာအတွက် ဒေါသထွက်ခဲ့ကြသည်။

ကန်ဘာရာရှိ အိန္ဒိယကော်မရှင်ရုံးက ၎င်းတို့အနေဖြင့် သြစတေးလျအစိုးရ၏ ဌာန ၃ ခုကို သံတမန်နည်းလမ်းဖြင့် ဆန့်ကျင်ကန့်ကွက်ထားကြောင်း၊ လူအများ၏ ‘ဘာသာရေးယုံကြည်ချက်ကို စော်ကားနာကျင်စေသည့်’ အတွက်ကြောင့် အဆိုပါကြော်ငြာကို ဖယ်ရှားပေးရန် သြစတေးလျ မွေးမြူရေးဌာန (MLA) ကို တိုက်တွန်းထားကြောင်း ကြေငြာချက် ထုတ်ပြန်ခဲ့သည်။

“လူ့အဖွဲ့အစည်း တော်တော်များများကလည်း ဒီကြော်ငြာကို ဆန့်ကျင်ကန့်ကွက်ကြောင်း သြဈေးလျအစိုးရနဲ့ MLA ကို အသိပေးထားပါတယ်” ဟု အဆိုပါ ကြေငြာချက်တွင် ဖော်ပြထားသည်။

သြစတေးလျ ကြော်ငြာအရည်အသွေးဆိုင်ရာ ဗျူရိုက အဆိုပါကြော်ငြာမှာ ဘာသာအယူဝါဒ အများအပြားမှ တိုင်ကြားမှုပေါင်း ၃၀ ကျော် ရရှိထားသည်ဟု ပြောကြားခဲ့သည်။

သြစတေးလျ ဟိန္ဒူကောင်စီက သိုးသားရောင်းချမှုအတွက် နတ်ဘုရား Ganesha ပုံကို အသုံးပြုထားသော အဆိုပါကြေငြာမှာ ‘ရိုင်းစိုင်းပြီး ဆိုးရွားသည့် လုပ်ရပ်’ ဖြစ်ကြောင်း ပြောကြားခဲ့သည်။

ထိုကြော်ငြာကို ဖယ်ရှားပေးရေးအတွက် အွန်လိုင်းတောင်းဆိုလွှာတစ်ခုလည်း ပေါ်ထွက်နေပြီး လက်မှတ်ထိုးသူ ၄၄၀၀ ကျော် ရှိနေပြီဖြစ်သည်။

Ref: BBC