လွှတ်တော်ဥက္ကဌဟောင်း ဟာလီမာယာကွဘ်ကို သမ္မတသစ်အဖြစ် စင်ကာပူ ကြေငြာ

စက်တင်ဘာ ၁၃၊ ၂၀၁၇
M-Media

– သမ္မတလောင်းအဖြစ် အမည်စာရင်းတင်သွင်းမှု လုပ်ငန်းစဉ်တွေအပြီးမှာ လွှတ်တော်ဥက္ကဌဟောင်း ဟာလီမာယာကွဘ်ကို နိုင်ငံရဲ့ ၈ ယောက်မြောက် သမ္မတအဖြစ် စင်ကာပူနိုင်ငံက ကြေငြာလိုက်ပါတယ်။

မလေးလူမျိုးတစ်ဦးဖြစ်တဲ့ ဟာလီမာဟာ စင်ကာပူနိုင်ငံရဲ့ ပထမဆုံး အမျိုးသမီးသမ္မတအဖြစ် မှတ်တမ်းဝင်ခဲ့ပြီး စက်တင်ဘာ ၁၄ ရက်နေ့ ည ၆ နာရီမှာ သမ္မတနန်းတော်မှာ ကျမ်းသစ္စာကျိန်ဆိုရမှာဖြစ်တယ်လို့ ၀န်ကြီးချုပ်ရုံးက ထုတ်ပြန်တဲ့ ကြေငြာချက်မှာ ဖော်ပြထားပါတယ်။

“စင်ကာပူပြည်သူတိုင်းဟာ ပုခုံချင်းထိတဲ့အထိ စည်းလုံးညီညွတ်နေဖို့လိုပါတယ်။ ကျွန်မတို့ဟာ အဆုံးစွန်ဆုံး အောင်မြင်မှုဆီ မရောက်သေးပါဘူး။ အကောင်းဆုံးဟာ ရောက်မလာသေးပါဘူး။ ကျွန်မတို့ကြားထဲက ကွဲပြားမှုတွေကိုဖယ်ကာ၊ တူညီမှုတွေမှာ အလေးထား အာရုံစိုက်သွားဖို့ ကျွန်မ တောင်းဆိုပါတယ်” လို့ ဟာလီမာယာကွဘ်က ဒီနေ့မနက်မှာ ပြည်သူတွေကို ပြောကြားခဲ့ပါတယ်။

စင်ကာပူနိုင်ငံဟာ ဘာသာစုံ လူမျိုးစုံဝါဒကို တန်ဖိုးထားတဲ့တိုင်းပြည်ဖြစ်ပြီး၊ သူမအနေနဲ့ အခုလို သမ္မတဖြစ်လာတာဟာ နိုင်ငံရဲ့ ဘာသာစုံ၊ လူမျိုးစုံဝါဒကို ဖော်ကျူးနေတာဖြစ်ကြောင်း၊ အမျိုးသမီးတွေဟာ ပြင်းပြင်းထန်ထန် ကြိုးစားမယ်ဆိုရင် နိုင်ငံရဲ့ဦးသျှောင်ဖြစ်နိုင်ကြောင်း သူမက ထည့်သွင်း ပြောဆိုခဲ့ပါတယ်။

စင်ကာပူရဲ့ သမ္မတရာထူးဟာ ဒီတစ်ကြိမ်မှာ မလေးလူ့အဖွဲ့အစည်းက ထမ်းဆောင်ဖို့ အလှည့်ကျတာဖြစ်ပြီး ဟာလီမာယာကွဘ်၊ စီးပွားရေးသမား မိုဟာမက် ဆာလေဟ် မာရီကန်နဲ့ ဖာရစ်ခန်းတို့က သမ္မတလောင်းအဖြစ် အမည်စာရင်း တင်သွင်းခဲ့ကြတာပါ။

ဒါပေမယ့် မာရီကန်နဲ့ ဖာရစ်တို့ဟာ သတ်မှတ်ထားတဲ့ လိုအပ်ချက်တွေ ပြည့်မီခြင်း မရှိတာကြောင့် ဟာလီမာက ပြိုင်ဘက်မရှိ သမ္မတဖြစ်လာတာဖြစ်ပါတယ်။

စင်ကာပူရဲ့ သမ္မတရာထူးဟာ နိုင်ငံရဲ့ ဦးသျှောင် အမှတ်သညာတစ်ခု ဖြစ်ပါတယ်။ စင်ကာပူနိုင်ငံရဲ့ ပထမဆုံး သမ္မတအဖြစ် မလေးလူမျိုး ယူစွဖ်အစ္စဟက်က တာဝန်ထမ်းဆောင်ခဲ့တာဖြစ်ပြီး ဟာလီမာက စင်ကာပူသမ္မတဖြစ်လာတဲ့ ဒုတိယမြောက် မလေးလူမျိုး ဖြစ်ပါတယ်။

ဝန်ကြီးချုပ်က ချီူးကျူး

စင်ကာပူဝန်ကြီးချုပ် လီရှန်လွန်းက ဟာလီမာကို ချီးကျူးခဲ့ပြီး သူမအနေနဲ့ တာဝန်တွေကို ကျေပွန်စွာ ထမ်းဆောင်နိုင်မယ်လို့ ယုံကြည်ကြောင်း၊ သူမဟာ လူ့အဖွဲ့အစည်းခေါင်းဆောင်၊ လွှတ်တော်အမတ်၊ ၀န်ကြီးနဲ့ လွှတ်တော်ဥက္ကဌ ရာထူးတွေကို အောင်မြင်စွာ ထမ်းဆောင်နိုင်ခဲ့ကြောင်း ဒီနေ့မနက် Facebook
စာမျက်နှာပေါ်မှာ ရေးသားခဲ့ပါတယ်။

“နယ်ပယ်တိုင်းမှာ စင်ကာပူပြည်သူတွေရဲ့ လက်တွဲလုပ်ဆောင်ခဲ့တဲ့ ရင့်ကျက်တဲ့အတွေကအကြုံကို သမ္မတအဖြစ် တာဝန်ထမ်းဆောင်မှုအထိ သူမက ယူဆောင်လာမှာဖြစ်ပါတယ်” လို့ ၀န်ကြီးချုပ်က ပြောကြားခဲ့ပါတယ်။

သမ္မတလောင်းအဖြစ် ၀င်ရောက်ယှဉ်ပြိုင်ခဲ့ကြတဲ့ မာရီကိန်နဲ့ ဖာရစ်ခန်းတို့ကိုလည်း ကျေးဇူးတင်ကြောင်း လီရှန်လွန်းက ထည့်သွင်း ရေးသားခဲ့ပါတယ်။

Ref: CNA