ဘာသာခြာများ၏ ၀တ်ပြုရာနေရာကို တိုက်ခိုက်ရန် စီစဉ်သည့် IS တစ်ဦးအား မလေးရှား ဖမ်းဆီး

စက်တင်ဘာ ၁၄၊ ၂၀၁၇
M-Media

– မွတ်စလင်မဟုတ်သူများနှင့် ၎င်းတို့၏ ၀တ်ပြုရာနေရာများကို တိုက်ခိုက်ရန်အတွက် ဆီးရီးယားမှ အမိန့်ရထားသော IS အဖွဲ့ဝင်တစ်ဦးကို ဖမ်းဆီးနိုင်ခဲ့သည်ဟု မလေးရှား ရဲတပ်ဖွဲ့က ပြောကြားလိုက်သည်။

အသက် ၂၁ နှစ်အရွယ် အလုပ်လက်မဲ့ အမျိုးသားတစ်ဦးဖြစ်ပြီး ဆီလန်ဂေါနှင့် မလာကာပြည်နယ်တို့တွင် စက်တင်ဘာ ၈ ရက်နေ့မှ ၁၀ ရက်နေ့အထိ ပြုလုပ်သော စစ်ဆင်ရေးတွင် ဖမ်းဆီးခဲ့ခြင်းဖြစ်သည်။

“အိမ်နီးချင်းနိုင်ငံက M-16 ရိုင်ဖယ်၊ AK-47 ရိုင်ဖယ်နဲ့ လက်ပစ်ဗုံးတွေဝယ်ပြီး မွတ်စလင်မဟုတ်သူတွေနဲ့ သူတို့ရဲ့ ၀တ်ပြုရာနေရာတွေကို တိုက်ခိုက်ဖို့အတွက် ဆီးရီးယားက မလေးရှားနိုင်ငံသား IS အဖွဲ့ဝင်တစ်ယောက်ရဲ့ ညွှန်ကြားချက်ကို သူ ရရှိထားပါတယ်” ဟု မလေးရှား ထောက်လှမ်းရေးအကြီးအကဲ မိုဟာမက် ဖူဇီ ဟာရွန်က ပြောကြားခဲ့သည်။

မည်သည့်ဝတ်ပြုရာအဆောက်အဦးများအား တိုက်ခိုက်မည်ဆိုသည့် အချက်ကို ထုတ်ဖော်ပြောကြားခဲ့ခြင်း မရှိပေ။

အဆိုပါအမျိုးသားမှာ ယခုနှစ်အစောပိုင်းက IS နှင့်ဆက်သွယ်ခဲ့ပြီး IS လိုလားသည့် အဘူဆက်ယက်ဖ် လက်နက်ကိုင်အဖွဲ့မှ ၀ရမ်းပြေး မလေးရှားနိုင်ငံသား မဟ်မူဒ် အဟ်မဒ်ထံမှ ညွှန်ကြားချက်ရရှိခဲ့ခြင်းဖြစ်သည်။

ရဲတပ်ဖွဲ့မှာ ၎င်း၏ နေအိမ်မှ ဓာတ်တုဗေဒပစ္စည်းများကိုလည်း သိမ်းဆည်းရမိခဲ့သည်။

ထို့ပြင် ဖိလစ်ပိုင်တောင်ပိုင်းမှ IS အဖွဲ့၊ မြန်မာနိုင်ငံမှ လက်နက်ကိုင်အဖွဲ့တို့နှင့် သွားရောက်ပူးပေါင်းရန် စီစဉ်နေသည့် အသက် ၃၈ နှစ်အရွယ် အမျိုးသားတစ်ဦး၊ ယခုနှစ်နှောင်းပိုင်းတွင် ဆီးရီးယားရှိ IS အဖွဲ့နှင့် သွားပေါင်းမည့် အသက် ၄၁ နှစ်အရွယ် အမျိုးသားတစ်ဦးတို့ကိုလည်း ဖမ်းဆီးခဲ့သည်ဟု ဖူဇီက ပြောကြားခဲ့သည်။

Ref: CNA